ރައީސް ޑރ މުހައްމަދު މުއިއްޒުގެ ސަރުކާރުގެ ޑެޕިއުޓީ މިނިސްޓަރުންތަކެއް އިންޑިއާގެ ބޮޑުވަޒީރު ނަރޭންދްރަ މޯދީއަށް އިހުތިރާމް ކުޑަކޮށް ސޯޝަލްމީޑިއާގައި ޕޯސްޓް ކުރުމަކީ ހުތުރު އަމަލެއް ކަމަށް ކުރީގެ ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.
އިންޑިއާގެ ބޮޑުވަޒީރަށް ކުޑައިމީސްކޮށް ވެރިކަންކުރާ ޕާޓީގެ އިސް ބައެއް މެމްބަރުންނާއި ސަރުކާރުގެ އިސް އޮފިޝަލުންތަކެއް ހިންގާފައިވާ އަމަލަށް އަލިއަޅުއްވައި ޝާހިދުވަނީ ނުރުހުން ފާޅުކުރައްވާފައެވެ. އެމަނިކުފާނު ވިދާޅުވީ، ވެރިކަން ކުރާ ޕާޓީއަށް ނިސްބަތްވާ ސަރުކާރުގެ ޑެޕިއުޓީ މިނިސްޓަރުންތަކެއް ހިންގާފައިވަނީ ހުތުރު އަމަލެއްކަމަށެވެ. ޝާހިދު ވިދާޅުވީ އެ މައްސަލައިގައި ޝާމިލުވާ މީހުންގެ މައްޗަށް ފިޔަވަޅު އެޅުމަށް ގޮވާލައްވާކަަމަށެވެ.
އޭނާ ވިދާޅުވީ، ރައްޔިތުންގެ ހާދިމުން އަބަދުވެސް ރިވެތި އުސޫލުތަކުގައި ހިފަހައްޓަންޖެހޭނެކަމަށާއި މިހާރު އެއީ ހަމައެކަނި ސޯޝަލްމީޑިއާ އެކްޓިވިސްޓުން ނޫންކަންވެސް ގަބޫލުކުރަންޖެހޭކަމަށެވެ. އެމަނިކުފާނު ވިދާޅުވީ، އެ މީހުންނަކީ ރައްޔިތުންގެ މަސްލަހަތު ހިމާޔަތްކުރުމުގެ ޒިންމާ އެޅިފައިވާ މީހުންކަންވެސް ގަބޫލުކުރަންޖެހޭކަމަށެވެ.
ޝާހިދު ވިދާޅުވީ، އިންޑިއާ އަކީ ޒަމާނުއްސުރެ ދިވެހިރާއްޖެއާއި ގާތް ގުޅުމެއް ބާއްވާފައިވާ ގައުމެއްކަމަށާއި، އެ ގައުމަކީ ރާއްޖެ އަށް އެހީ ފޯރުވުމުގައި އެންމެ ފުރަތަމަ ހަރަކާތްތެރިވާ ގައުމުކަންވެސް ތާރީހުން ފެނިގެންދާކަަމަށާއި އެ ގުޅުމަކީ އިހުތިރާމާއި ސަގާފަތުގެ އިތުރުން ރައްޔިތުންގެ ދެމެދުގައި އޮންނަ ގުޅުންތަކުގެ މައްޗަށް ބިނާވާ ގުޅުމެއްކަމަށްވެސް ފާހަގަކުރެއްވިއެވެ.
އިންޑިއާ އާއި ދެމެދު އުފެދިފައިވާ މައްސަލައާއިމެދު ކުރީގެ މިނިސްޓަރު ޝާހިދު ކަންބޮޑުވުން ފާޅުކުރެއްވިއިރު، ސަރުކާރުންވަނީ އޮފިޝަލުންތައް ހިއްސާކޮށްފައިވާ ހިޔާލު ސަރުކާރުން ނުގެންގުޅޭކަމަށް ބުނެ ބަޔާނެއް ނެރިފައިކަން ފާހަގަކޮށްލެވެއެވެ.
