އިންތިހާބު ފަސް ކުރުމުގެ ބިލު ތަސްދީގު ނުކުރައްވައި ބިލު އަނބުރާ މަޖިލީހަށް!

ރޯދަ މަހަށް ފަހު އިންތިހާބު ބާއްވާ ގޮތަށް ގާނޫނަށް ގެނައި އިސްލާހުގެ ބިލު ތަސްދީގު ނުކުރައްވައި އަލުން އަނބުރާ މަޖިލީހަށް ބިލު ރައީސުލްޖުމްހޫރިއްޔާ ޑރ. މުހައްމަދު މުއިއްޒު ފޮނުއްވައިފި އެވެ.

މަޖިލިސް އިންތިހާބާ ދިމާކޮށް ކުރައްވަމުން ގެންދަވާ ދަތުރުފުޅުގެ ތެރެއިން ރައީސް މުއިއްޒު މިވަގުތު ހުންނެވީ ހދ. އަތޮޅުގަ އެވެ. އަދި ދަތުރުފުޅުގައި ވެސް ވަނީ އެފަދަ އިޝާރާތެއް ކުރައްވާފަ އެވެ.

ރައީސް ބިލު އަނބުރާ ފޮނުވިކަން ސަރުކާރުގެ އޮފިޝަަލަކު ވަނީ ސަންގުއަށް ކަށަވަރުކޮށްދެއްވާފަ އެވެ. ކުރިން ސަރުކާރުން ބޭނުން ވީ ރޯދައިގެ ފަހަށް އިންތިހާބު ބޭއްވުމަށް ނަމަވެސް އެ ވިސްނުން ބަދަދަލުވި ސަބަބު ސާފެއްނޫނެވެ.

ގާނޫނުއަސާސީ ބުނާގޮތުގައި މަޖިލީހުން ފާސްކުރާ ބިލެއް ފޮނުވުމުން، ތަސްދީގު ކުރުމަށް ނުވަތަ ބިލު އަނބުރާ ފޮނުވުމަށް ރައީސުލްޖުމްހޫރިއްޔާއަށް 15 ދުވަސް ލިބިގެންވެ އެވެ.

ފެބްރުއަރީ 11 ގައި މަޖިލީހުން ފާސްކުރި ބިލަށް، މުއްދަތު ހަމަވީ މިއަދަށެވެ.

އަލުން އަނބުރާ ބިލު މަޖިލީހަށް ފޮނުވުމަށް ފަހު ބިލަށް އެއްވެސް ބަދަލެއް ނުގެނެސް މެމްބަރުންގެ އަޣުލަބިއްޔަތުން ފާސްކޮށްފި ނަމަ އެ ބިލެއް ރައީސުލްޖުމްހޫރިއްޔާ ތަސްދީގު ކުރުމަށް ފަހު ސަރުކާރުގެ ގެޒެޓުގައި ޝާއިއު ކުރަންވާނެކަމަށް ގާނުނުއަސާސީގައި ބުނެ އެވެ.

ބިލު އަނބުރާ ފޮނުވާލި ސަބަބެއްކަމަށް ބުނެފައި ވަނީ މިހާރު ބިލް އޮތްގޮތުން ވޯޓުދޭ މީހުންގެ ލިސްޓް ގެޒެޓްކުރާއިރު އައިޑީކާޑު ނަންބަރު އާއްމުކުރަން އޮތުމެވެ.

ދެވަނަކަމެއްގެ ގޮތުގައި ބުނެފައި ވަނީ އިލެކްޝަންސް ކޮމިޝަނުން ކަނޑަޅާ “ފޯކަލް ޕޮއިންޓް” ތަކަކަށް ބޮޑެތި ޒިންމާތަކެއް މަތިކޮށްފައިވީއިރު، އެ ފޯކަލްޕޮއިންޓަކީ ކިހިނެއް އައްޔަންކުރާ ކާކުކަންފަދަ އެއްވެސް ތަފްސީލެއް ބިލުގައި ބަޔާންވެފައި ނެތުމެވެ.

މީގެއިތުރުން ޤާނޫނުއަސާސީގެ 79 ވަނަ މާއްދާގެ (ށ) ގައި، މިހާރު އޮތް މަޖިލީހުގެ އުމުރު ހަމަވުމުގެ 30 ދުވަސްކުރީން އައު މަޖިލީހުގެ އިންތިޚާބުގެ ހުރިހާކަމެއް ނިންމަން ބުނާއިރު  މި ބިލުގައިވާގޮތަށް އިންތިޚާބު ބާއްވާ ނަމަ ޤާނޫނުއަސާސީގައި ކަނޑައަޅާފައި އެވާ މުއްދަތުގެ ކުރިން އިންތިޚާބުގެ ހުރިހާ ކަންކަން ނިމާނުލެވުމުގެ އިހްތިމާލު އޮތުމުން އެފަދަ ބިލުގައިވާ ގޮތަށް ކަނޑައެޅުމަކީ ޤަނޫނުއަސާސީއާ ޚިލާފުވާނޭ ކަމެއްގެ ގޮތުގައި ވަނީ ފާހަގަކޮށްފަ އެވެ.

ބިލު ފޮނުވައި ރައީސް ވިދާޅުވީ ޤާނޫނުއަސާސީގެ 75 ވަނަ މާއްދާގައި މަޖިލިސް މެންބަރުން ޤައުމުގެ މަޞްލަޙަތާ އެއްގޮތަށް ކަންކަންކުރަން ބުނަކަމާއި އެކަމަކު އިންތިޚާބުގެ ތާރީޚަށް ބަދަލު ގެންނަނީ މަޖިލީހުގެ ބައެއް މެންބަރުން އިންތިޚާބުގައި ވާދަކުރާތީ އަމިއްލަ މަޞްލަޙަތަކަށްކަމަށް ބެލުމުގެ ފުރުޞަތު އެބައޮތް ކަމަށެވެ. މިއާއި އެކު އިންތިޚާބާ ބެހޭ ޤާނޫނާ މިގޮތަށް ކުޅެ އިންތިޚާބު ބާއްވާ ތާރީޚު ބަދަލުކުރުމަކީ އިންތިޚާބާމެދު އޮތް އިތުބާރު ގެއްލޭނެކަމެއްގެ ގޮތުގައި ރައީސް ވިދާޅުވި އެވެ.