ޖުމްހޫރީ މައިދާނުގައި ހަދާފައިވާ، ފެންއަރުވާ ވަޑާން ކުޑަ އީދުގައި އަލުން ހުޅުވުމުގެ މަސައްކަތް ކުރަމުން ދާކަމަށް ލޯކަލް ގަވަމަންޓް މިނިސްޓަރ އާދަމް ޝަރީފް އުމަރު ވިދާޅުވެއްޖެ އެވެ.
މިނިސްޓްރީން މަސައްކަތް ކުރީ ރަމަޟާން މަހަށް ފެން އަރުވާވަޑާންގެ މަސައްކަތް ނިންމައި ހުޅުވުމަށެވެ. އެކަމަކު ބައެއް ސަބަބުތަކާ ހުރެ މަސައްކަތް ލަސްވީ އެވެ.
ފެން އަރުވާވަޑާން ހުޅުވުމަށް ކުރަމުން ގެންދާ މަސައްކަތްތަކާއި ގުޅޭގޮތުން މިނިސްޓަރ މިއަދު ކުރެއްވި ޕޯސްޓެއްގައި ވިދާޅުވީ ޖުމްހޫރީ މައިދާނުގައި ހަލާކުވެ ވީރާނާ ވަމުން ދިޔަ ފެންއަރުވާ ވަޑާންގެ މަރާމާތުގެ މަސައްކަތް ފެށީ ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން ކަމަށެވެ. އަދި އެމަނިކުފާނު އެދިވަޑައިގަތީ ކުޑަ އީދަށް އަލުން ތަން ހުޅުވުމަށްކަމަށްވުމާއި އެކު އެ މަސައްކަތް ބާރު ސްޕީޑުގައި ކުރިޔަށް ދާކަމަށް މިނިސްޓަރ ވިދާޅުވި އެވެ.
ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ހުޅުވި މި ފެން އަރުވާވަޑާންގެ މަަސައްކަތް ކުރީ އެމްޓީސީސީންނެވެ.
advertisment