ރައީސް ޑރ. މުހައްމަދު މުއިއްޒު ރައްޔިތުން ކުރި އިތުބާރު ދަމަހައްޓައި، ރައްޔިތުންނާއި ހަމައަށް ގެނެސްދޭނީ ހެޔޮވެރިކަމެއްކަމަށް އެމަނިކުފާނުގެ ސްޕެޝަލް އެޑްވައިޒަރ އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ ވިދާޅުވެއްޖެ އެވެ.
ލ. ފޮނަދޫ ދާއިރާގެ މަޖިލިސް ގޮނޑި ވެސް ކާމިޔާބު ކުރައްވާފައިވާ އަބްދުއްރަހީމަކީ މިވަގުތު ރައީސް މުއިއްޒުގެ އެންމެ ބޮޑު އިތުބާރެއް އޮތް، އެމަނިކުފާނުގެ އެންމެ އަރިސް މެމްބަރެވެ. ސަރުކާރުގެ ދިފާއުގައި ނިކުންނަވައި، އަބްދުއްރަހީމް ގެންދަވަނީ ރައީސް މުއިއްޒަށް އިދިކޮޅުގެ މެމްބަރުން އަމާޒު ކުރާ ފާޑުކިއުންތަކަށް ރައްދު ދެއްވަމުންނެވެ.
އެގޮތުން އޭނާ ވިދާޅުވީ ރައީސް މުއިއްޒު އަބަދުވެސް އިސް ކުރައްވާނީ ދިވެހި ގައުމާއި ރައްޔިތުން ކަމަށެވެ. އެމަނިކުފާނުގެ އަމާޒަކީ ރައްޔިތުންގެ އަޑުއަހައި، ހުރި ކަންބޮޑުވުންތައް ހައްލު ކުރުންކަމަށް އަބްދުއްރަހީމް ވިދާޅުވި އެވެ.
މިއީ ރައްޔިތުންނާއި އެންމެ ގާތުން މަސައްކަތް ކުރާނެ ވެރިކަންކަމަށް ތަކުރާރު ކުރައްވައި އަބްދުއްރަހީމް ވިދާޅުވީ، އެ ރައްޔިތުންގެ ބޮޑު އިތުބާރެއް ސަރުކާރަށް އެބައޮތް ކަމަށެވެ. އެހެންކަމުން އެ އިތުބާރު ދަމަހައްޓައި، ރައްޔިތުންނަށް ފުރިހަމަ ހިދުމަތެއް ސަރުކާރުން ދޭނެކަމަށް އަބްދުއްރަހީމް ވިދާޅުވި އެވެ.
ރައީސް ޑރ.މުޢިއްޒު އަބަދުވެސް އިސްކުރައްވާނީ ދިވެހި ރައްޔިތުންނާއި ދިވެހި ގައުމު.މަސައްކަތް ކުރައްވާނީ ރައްޔިތުންގެ އަޑު އައްސަވައިގެން ރައްޔިތުންނާއި ގާތުން.ރައްޔިތުންގެ ކަން ބޮޑުވުންތަކަށް ހައްލު ހޯއްދަވައި ދެއްވުމަކީ އެ މަނިކުފާނުގެ އަމާޒު.ރައީސް ޑރ.މުޢިއްޒަށް ރައްޔިތުން…
— Abdul Raheem Abdulla (@Banafsaa) May 3, 2024
އަބްދުއްރަހީމް ވިދާޅުވީ ރައީސް މުއިއްޒު ތަފާތު ދައްކަވާނީ، ތެދުވެރިކަމާއި އިހުލާސްތެރިކަމާއި އެކު ކަމަށެވެ. އަދި ގައުމުގެ މުއްސަނދިކަމަކީ ރައްޔިތުންގެ ހައްގެއްކަމަށް ވިދާޅުވި އެވެ.
އަބްދުއްރަހީމް ވިދާޅުވީ، ރައީސް މުއިއްޒު އެއް މަސް ދުވަހުގެ ތެރޭގައި ރާއްޖޭގެ 160 ރަށެއްގެ ކައުންސިލާއި ބައްދަލުކުރެއްވިކަމަށް ބުނާ ވާހަކައާއިމެދު މީހަކު ދާދި ފަހުން ސުވާލުކުރިކަމަށެވެ. އެގޮތުން އެއް މަސް ދުވަހުގެ ތެރޭގައި އެ އަދަދަށް ކައުންސިލުތަކާއި ބައްދަލުކުރެވިދާނެކަމަށް ހިއްސާކުރިކަމަށާއި ރައްދެއްގެ ގޮތުގައި އެއީ އެ މީހާއަށް ފެންނަ ގޮތްކަމަށް ވިދާޅުވިކމަށްވެސް އަބްދުއްރަހީމް ހާމަކުރެއްވިއެވެ.
އޭނާ ވިދާޅުވީ، އެއީ ސުވާލުކުރި މީހުންގެ ވިސްނުން ދަތުރުކުރާ ގޮތްކަމަށްވެސް ދެންނެވިކަމަށާއި ޕީޕީއެމް ޕީއެންސީއިން “މުއިއްޒު ދުވެލީގައި” ދަތުރުކުރަމުންދަނީ އެ ސަބަބާއި ގުޅިގެންކަމަށްވެސް ވިދާޅުވިއެވެ. އޭނާ ވިދާޅުވީ، އެއް މަސް ދުވަހުގެ ތެރޭގައި 160 ކައުންސިލާއި ބައްދަލުކުރެވުނީ އެ ދުވެލީގައި ކަންކަން ކުރިއަށް ގެންގޮސްގެންކަމަށެވެ.