ޑިވެލޮޕްމެންޓު ބެންކް އޮފް މޯލްޑިވްސް ލިމިޓެޑްގެ ނަމުގައި ރައީސް ޑރ މުހައްމަދު މުއިއްޒު ސަރުކާރުގެ ކުންފުންޏެއް އުފައްދަވައިފިއެވެ.
ރައީސް އޮފީހުން މައުލޫމާތު ދީފައިވާގޮތުން ރައީސް ޑރ މުއިއްޒު ޑިވެލޮޕްމެންޓު ބެންކް އޮފް މޯލްޑިވްސް ލިމިޓެޑްގެ ނަމުގައި އުފައްދަވާފައިވާ ކުންފުންޏަކީ ސަތޭކަ އިންސައްތައް ސަރުކާރުގެ ހިއްސާ އޮންނަ ކުންފުންޏެކެވެ. އަދި މި ކުންފުނި އުފައްދާފައިވަނީޯ ދިވެހިރާއްޖޭގެ ކުންފުނީގެ ގާނޫނުން ރައީސްއަށް ލިބިދީފައިވާ ބާރުތަކުގެ ދަށުންކަމަށްވެސް ހިއްސާކޮށްފައިވެއެވެ.
ބަޔާނުގައިވާގޮތުން މި ކުންފުންޏަކީ ސަރުކާރުގެ ސިޔާސަތުތަކާއި އެއްގޮތަށް ދެމެހެއްޓިނިވި އިގްތިސާދީ އަދި އިޖްތިމާއީ ތަރައްގީއަށް އިންވެސްޓުކުރުމާއި، އުމްރާނީ ތައްގީއަށް ބޭނުންވާ ފައިސާ ހޯދުމާއި ޕީއެސްއައިޕީ މަޝްރޫޢުތައް ހިންގުމުގައި ކުރިމަތިވެގެންދާ މާލީ ގޮންޖެހުންތައް ހައްލުކުރުމުގެ މަސައްކަތްތައް ކުރުމަށް އެކުލަވާލާފައިވާ ކުންފުންޏެއްކަމަށެވެ. އަދި މި ކުންފުނި އުފެއްދުމުގެ މަގުސަދުތަކުގެ ތެރޭގައި ރާއްޖޭގެ ބެންކިން ނިޒާމުގައި ބޭރު ފައިސާ ބެހެއްޓުމުގެ ޝައުގުވެރިކަން އިތުރުކުރުންވެސް ހިމެނޭކަމަށް ބުނެފައިވެއެވެ.