އިސްރާއީލުގެ ޕާސްޕޯޓު ބޭންކުރުމަކީ 20 ވަނަ ރައްޔިތުންގެ މަޖިލީހަށް ފަސޭހަކަމާއިއެކު ކުރެވޭނެ މަސައްކަތެއްކަމަށް މާފަންނު ދެކުނު ދާއިރާގެ މެމްބަރު އަބްދުﷲ ރިފާއު ވިދާޅުވެއްޖެއެވެ.
ސަންގުޓީވީގެ ހަބަރަށްފަހު ޕްރޮގްރާމްގައި އިސްރާއީލުގެ ޕާސްޕޯޓުގައި ރާއްޖެއަށް ފަތުރުވެރިން އައުން މަނާކުރުމުގެ މަސައްކަތްތަކާއި ގުޅޭގޮތުން ވާހަކަދައްކަވަމުން ރިފާއު ވިދާޅުވީ، ފަލަސްތީނުގެ މައްސަލައިގައި ރާއްޖޭގެ ސްޓޭންޑު ވަރަށް ސާފުކަމަށެވެ. އަދި ނުކުރެވި އޮތް ހަމައެކަނި ކަމަކީ ޕާސްޕޯޓު ބޭންކުރުންކަމަށާއި އެހެންނަމަވެސް އެ ޕާސްޕޯޓު ބޭން ކުރުމުގައި ލިބޭ ފައިދާތަކާއި ގެއްލުންތަކާއިމެދުވެސް ވިސްނާލުން މުހިންމުކަަމަށް ވިދާޅުވިއެވެ.
އޭނާ ވިދާޅުވީ، އިހުލާސްތެރިކަމާއިމެދު ފަލަސްތީނު މިނިވަންކުރުމަށް ގޮވާލާ ކުރަމުން ދާ މަސައްކަތްތަކުގައި ދެމިތިބުން މާ ރަނގަޅުކަމަށެވެ. އަދި ރައީސް ޑރ މުހައްމަދު މުއިއްޒު އެންޓީގާ އެންޑް ބާބިއުޑާއަށް ކުރެއްވި ދަތުރުގައި ލިބިވަޑައިގެންނެވި ކޮންމެ ފުރުސަަތެއްގައިވެސް އެމަނިކުފާނު ވަނީ އެ ވާޙަކަތައް ފާހަގަކުރައްވާފައިކަމަށް ވިދާޅުވިއެވެ.
އޭނާ ވިދާޅުވީ، ރައީސް އެ ވާޙަކަތައް ދައްކަވަމުން ގެންދެވީ ވަރަށް ސާބިތުކަމާއިއެކުކަމަށެވެ. އެހެންކަމުން އިސްރާއީލުގެ ޕާސްޕޯޓު މަނާކުރުމަކީ ޕީއެންސީގެ މެޖޯރިޓީ އޮތް މަޖިލީހަށް ވަރަށް ފަސޭހައިން ބާރު އެޅޭނެ ކަމެއްކަމަށްވެސް ފާހަގަކުރެއްވިއެވެ.
ރިފާއު ވިދާޅުވީ، ޕާސްޕޯޓޫ ބޭން ކުރާއިރު، ރާއްޖެއަށް އަންނަ އިސްރާއީލުގެ ފަތުރުވެރިންގެ އަދަދުތައް ބަލާލުން މުހިންމުކަމަށެވެ. އޭނާ ވިދާޅުވީ، ރާއްޖެއަށް އަންނަ ހާހެއް ހާ އިސްރާއިލުގެ ފަތުރުވެރިން ނޭރުވުމުން ފަލަސްތިނުގެ މައްސަލައިގައި ކުރިއެރުންތަކެއް ލިބިގެންދޭތޯ ނުވަތަަ ކުރިއެރުން ލިބެނީ ބައިނަލްއަގުވާމީ މައިދާނުގައި އެ ވާޙަކަތައް ދައްކައިގެންތޯވެސް ދެނެގަތުން މުހިންމުކަމަށެވެ.
އޭނާ ވިދާޅުވީ، ބައިނަލްއަގުވާމީ ޕްލެޓްފޯމުތަކުގައި އެ ވާހަކަތައް ދައްކައި ރާއްޖޭގެ ސްޓޭންޑް ސާފުކޮށްދިނުން މާ މުހިންމުކަމަށެވެ. އަދި ސަރުކާރުންވާނީ ފަލަސްތީނާއި އެއްކޮޅަށް ކުރާ ކޮންމެ މަސައްކަތެއްގައިވެސް ބައިވެރިވެފައިކަމަށް ފާހަގަކުރެއްވިއެވެ.
އޭނާ ވިދާޅުވީ، ރާއްޖެއިން އޮތީ ފަލަސްތީނާއި އެއްކޮޅަށް އިސްރާއިލާއި ދެކޮޅަށް ކަމަށެވެ. އަދި އެ ސްޓޭންޑު ވަރަށް ސާފުކަމަށްވެސް ވިދާޅުވިއެވެ. އަދި ފަލަސްތީނުގެ ހައްގުގައި ކުރެވެން އޮތް ކޮންމެ ކަމެއްވެސް ކުރާނެކަމުގެ ޔަގީންކަން ރައީސްވަނީ ދެއްވާފައިކަމަށްވެސް ވިދާޅުވިއެވެ.