ޗައިނާ މެޝިނަރީ އިންޖިނިއަރިން ކޯޕަރޭޝަން (ސީއެމްއީސީ)ގެ ޗެއާމަން ވަންގްބޯ އާ މިއަދު ބައްދަލު ކުރައްވާފައިވާކަމަށާ ބައްދަލުވުމުގައި އެ ކޯޕަރޭޝަނާ ރާއްޖެއާ ދެމެދު އިތުރަށް ގުޅުން ބަދަހިކުރުމާ ގުޅޭގޮތުން މަޝްވަރާ ކުރެއްވި ކަމަށް ފޮރިން މިނިސްޓަރު މޫސާ ޒަމީރު ވިދާޅުވެއްޖެއެވެ.
މިއަދު އެކްސްގައި ކުރެއްވި ޕޯސްޓެއްގައި މިނިސްޓަރު ޒަމީރު ވިދާޅުވީ މިހާރު ޗައިނާއަށް ކުރައްވަމުންގެންދަވާ ދަތުރުފުޅުގައި ސީއެމްއީސީގެ ޗޭއާމަން ވަންގް އާ ބައްދަލުކުރައްވާ ވަރަށް ގިނަ ދާއިރާތަކުން ފުޅާދާއިރާއެއްގައި މަޝްވަރާކުރެވުނު ކަމަށެވެ.
އެގޮތުން ރާއްޖޭގެ ތަރައްޤީއަށް، ޚާއްޞަކޮށް، އިޖްތިމާޢީ ބޯހިޔާވަހިކަމާއި، އިޢާދަކުރަނިވި ހަކަތައިގެ ދާއިރާއިން، އެ ކޯޕަރޭޝަނުން މިހާރުވެސް ވަމުންދާ އެހީތެރިކަން ފާހަގަކޮށް އެކަމަށް ޝުކުރު އަދާކުރައްވާފައިވާ ކަމަށް މިނިސްޓަރު ވިދާޅުވިއެވެ. މިނިސްޓަރު ވިދާޅުވީ އޭގެއިތުރުން ރަސްމާލެ އާއި ގުޅީ ފަޅުގެ މަޝްރޫއުތަކުގައި ގުޅުން ބަދަހިކޮށް، ސީއެމްއީސީއާ އެކު އޮތް ގުޅުން އިތުރަށް ބަދަހިވެގެންދާނެ ކަމަށް އުއްމީދު ކުރައްވާ ކަމަށެވެ.
ޗައިނާއަށް ކުރައްވާ ރަސްމީ ދަތުރުގައި ރާއްޖޭގެ ފޮރިން މިނިސްޓަރު މޫސާ ޒަމީރު ރާއްޖޭގެ ތަރައްގީގައި މުހިންމު ދައުރުތައް އަދާކޮށްފައިވާ އެ ގައުމުގެ ކުންފުނިތަކާއި ބައްދަލުކުރައްވާނެކަމަށް ފޮރިން މިނިސްޓްރީއިން މީގެ ކުރިން ވަނީ ބުނެފައެވެ. މި މަހުގެ 20 ވަނަ ދުވަހުން ފެށިން ޖުލައި 24 ވަނަ ދުވަހުގެ ނިޔަލަށް ރަސްމީ ދަތުރުފުޅެއްގައި މިނިސްޓަރު ޒަމީރު ޗައިނާއަށް ފުރާވަޑައިގެންފައިވާއިރު މިނިސްޓްރީއިންވަނީ އެމަނިކުފާނުގެ ދަތުރާއި ގުޅޭ ތަފްސީލުތައް މީޑިއާތަކަށް ހާމަކޮށްފައެވެ.
މިނިސްޓްރީއިން ބުނެފައިވާގޮތުން މިނިސްޓަރު ޒަމީރު ފުރާވަޑައިގަތީ ޗައިނާގެ ފޮރިން މިނިސްޓަރު އެ ގައުމުގެ ކޮމިއުނިސްޓު ޕާޓީގެ ސެންޓްރަލް ކޮމިޓީގެ ޑިރެކްޓަރ އޮފް ދަ އޮފީސް ފޯރ ފޮރިން އެފެއަރޒް ވޭންގް ޔީގެ ދައުވަތަކަށް ކަމަށެވެ. އަދި މި ދަތުރުގައި ދެ ގައުމުގެ ހާރިޖީ ވުޒާރާގެ އިސްވެރިން ބައްދަލުކުރައްވައި ރަސްމީ މަޝްވަރާތައް ކުރިއަށް ގެންދަވާނެކަމަށާއި ސަރުކާރުގެ އިސްވެރިންގެ އިތުރުން ރާއްޖޭގައި ތަރައްގީގެ މަސައްކަތްތައް ކުރުމުގައި އިސް ރޯލުތައް އަދާކޮށްފައިވާ ޗައިނާގެ ކުންފުނިތަކާއިއެކުވެސް މިނިސްޓަރ ބައްދަލުކުރައްވާނެކަމަށް ބުނެފައިވެއެވެ.
މި ދަތުރުގައި މިނިސްޓަރ ޒަމީރުއައިއެކު ރާއްޖޭގެ ފިނޭންސް މިނިސްޓަރު ޑރ މުހައްމަދު ޝަފީގު އަދި ކޮންސްޓްރަކްޝަން މިނިސްޓަަރ ޑރ އަބްދުﷲ މުއްތަލިބުގެ އިތުރުން އެހެން ސީނިއާ ބައެއް އޮފިޝަލުންވެސް ބައިވެރިވެވަޑައިގަންނަވާނެކަމަށް މައުލޫމާތު ދީފައިވެއެވެ.
