ބަންގްލަދޭޝްގެ އިންޓަރިމް ލީޑަރުގެ މަގާމަށް ފުންނާބު އުސް ބެންކަރު މުހައްމަދު ޔޫނުސް އައްޔަނުވެފައިވުމަށް ރައީސް ޑރ މުހައްމަދު މުއިއްޒު މަރުހަބާ ވިދާޅުވެއްޖެއެވެ.
ބަންގްލަދޭޝްގައި ވަރުގަދަ މުޒާހަރާތަކެއް ކޮށް ބާރުތަކަށް ބޮޑެތި ބަދަލުތައް ގެނެސްފައިވާއިރު، ރައީސް ޑރ މުއިއްޒުވަނީ މަޝްހޫރު އިކޮނޮމިސްޓު ޑރ ޔޫނުސްއަށް އެ ގައުމުގެ ވަގުތީ ސަރުކަރުގެ ޗީފް އެޑްވައިޒަރުގެ މަގާމު ލިބިފައިވާކަމަށް އެކްސް މެދުވެރިކޮށް މަރުހަބާ ވިދާޅުވެފައެވެ.
ރައީސް ވިދާޅުވީ، ބަންގްލަދޭޝްއަކީ ރާއްޖޭގެ ޒަމާންވީ އެކުވެރިއެއްކަމަށާއި އެ ގައުމަކީ ގާތް ބައިވެރިއެއްކަމަށެވެ. އެމަނިކުފާނު ވިދާޅުވީ، ރާއްޖެއިން ބޭނުންވަނީ އެ ގައުމުގައި އެއްބައިވަންތަކަމާއި ސުލްހަ ގާއިމުވެފައި އޮތުމްކަމަށެވެ. އަދި އެ ގައުމުގެ ރައްޔިތުންނަށް ޑރ ޔޫނުސްގެ ބެއްލެވުމުގެ ދަށުން ފަހި ދުވަސްތަކަކަށް އެދިވަޑައިގަންނަވާކަމަށްވެސް ހިއްސާކުރެއްވިއެވެ.
