އެމްޑީޕީން ކުރިއަށްގެންދާ ”ހަވަރުބެރު“ ޕެނަލް ބައްދަލުވުމުގައި ވާހަކަފުޅު ދައްކަވަމުން، ކުރީގެ މެންބަރު ޔައުގޫބް ވަނީ ބަދަލު ދިނުމުގެ މައްސަލައަށް އަލިއަޅުއްވާލައްވާފައެވެ. އޭނާ ފާހަގަކުރެއްވި ގޮތުގައި، މި ސަރުކާރު އުފެދުނުއިރު ބަދަލު ދިނުމުގެ މަސައްކަތްތައް ވަނީ ނިމުމަކަށް އައިސްފައެވެ. އަދި ރަސްމާލެ ޕްރޮޖެކްޓަކީ ޢަމަލީގޮތުން ވުޖޫދުގައި އޮތް މަޝްރޫޢެއް ނޫންކަމަށާއި، އެ ޕްރޮޖެކްޓާ ގުޅިގެން އެއްވެސް ފަރާތަކަށް ދޭންޖެހޭ ފައިސާއެއް ނެތްކަމަށް އޭނާ ވިދާޅުވިއެވެ.
އެހެންނަމަވެސް، ޢާންމު އުސޫލުތަކާއި ޢަމަލުކުރަންޖެހޭ މިންގަނޑުތަކާ ޚިލާފަށް، ވަކި ފަރާތަކަށް އެ ޕްރޮޖެކްޓު ހަވާލުކުރުމަށްފަހު، އޭގެ ތެރެއިން އެންމެ ފަހުން 375 މިލިއަން ރުފިޔާގެ ބަދަލެއް ނުޙައްޤުން ނަގާފައިވާކަމަށް އޭނާ ތުހުމަތުކުރެއްވިއެވެ. ޔައުގޫބް ވިދާޅުވި ގޮތުގައި، ވޭތުވެދިޔަ ދޮޅު އަހަރެއްހާ ދުވަހުގެ ތެރޭގައި ރައީސް ޑރ. މުޙައްމަދު މުޢިއްޒު ވަނީ އެމްޑީޕީން އެ ޕްރޮޖެކްޓުގެ ފައިސާ ބަޖެޓުގައި ނުހިމެނި ވާހަކަ އެކި ފުރުޞަތުތަކުގައި ހިއްސާކުރައްވާފައެވެ.
އިތުރަށް ވާހަކަފުޅު ކުރިއަށް ގެންދަވަމުން، ޔައުގޫބް ވިދާޅުވީ އެމްޑީޕީގެ ސަރުކާރުން ބަދަލު ދިނުމުގެ މަސައްކަތްތައް ކުރިއަށް ގެންގޮސްފައިވަނީ އޭ.ސީ.ސީގެ އިރުޝާދުގެ މަތިން، މަޖިލިސް މެދުވެރިކޮށް ބަދަލު ދިނުމުގެ އުސޫލެއް އެކުލަވާލައިގެން ކަމަށެވެ. މި އުސޫލު މަޖިލީހުން ފާސްވެގެން އައިއިރު، މިހާރުގެ އެޓަރނީ ޖެނެރަލް އަޙްމަދު އުޝާމްވެސް ވަނީ ފާސްކުރެއްވުމަށް ވޯޓު ދެއްވާފައިކަމަށް އޭނާ ފާހަގަކުރެއްވިއެވެ.
ނަމަވެސް، މިހާރުގެ ސަރުކާރުން ވަނީ އެ ކޮމިޓީ އުވާލައި، އުސޫލުތައް ބާޠިލުކޮށްފައިކަމަށާއި، އެއްވެސް އުސޫލެއް ނެތި ފުށިދިއްގަރު ފަޅުގެ ޕްރޮޖެކްޓާ ގުޅުވައި ސަރުކާރުން ބަދަލު ދީފައިވާކަމަށް ޔައުގޫބް ފާހަގަކުރެއްވިއެވެ.
ޔައުގޫބްގެ ވާހަކަފުޅުގައި އިތުރަށް ފާހަގަކުރެއްވި ގޮތުގައި، މިއަދު އެމްޑީޕީގެ ސަރުކާރުގެ އެއްވެސް ފަރާތެއްގެ މައްސަލައެއް ނުފެނުމުން، ބަދަލު ދިނުމުގެ މައްސަލައާއި އެހެނިހެން ތުހުމަތުތައް ކުރުމަށްފަހު، މިހާރުގެ ސަރުކާރުން މަސައްކަތްކުރަމުންދަނީ މި މައްސަލަތައް ކޯޓަށް ގެންދިއުމަށްކަމަށް އޭނާ ތުހުމަތުކުރެއްވިއެވެ.
އޭނާ އިތުރަށް ވިދާޅުވި ގޮތުގައި، ރަސްމާލެ ޕްރޮޖެކްޓަށް 400 މިލިއަން ރުފިޔާ ބަޖެޓުކޮށްދިންނަމަ، އެ ފައިސާ އޮތްގޮތަށް އަމިއްލަ ބޭނުމަށް ރައީސް މުޢިއްޒު ނަންގަވާނެކަން އެނގޭތީ، އެމްޑީޕީން އެ ފައިސާ ބަޖެޓުގައި ނުހިމެނީކަމަށް ޔައުގޫބް ވިދާޅުވިއެވެ.
