އެކި ކަންކަމުގައި ސަރުކާރުގެ ވަޒީރުން ހާޒިރުކުރަން ޖެހޭ ޙާލަތްތަކުގައި މަޖިލީހުން އެކަމާ ފަސްޖެހުމަކީ ދެރަ ކަމެއްކަމަށް ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު ހުސައިން ޒިޔާދު ވިދާޅުވެއްޖެއެވެ.
ޒިޔާދު އެފަދައިން ވިދާޅުވީ މޯލްޑިވްސް އިންޓެލެކްޗުއަލް ޕްރޮޕަޓީ އޮފީހުގެ ބިލަށް ބަހުސް ކުރައްވަމުންނެވެ.
ޒިޔާދު ވިދާޅުވީ، މިއީ މުހިއްމު ބިލެއް ކަމަށާއި، މި ބިލުގެ ދަށުން އޮފީހެއް އުފެދިގެންދާއިރު އެ އޮފީސްވެސް ބަލަހައްޓާނީ ކޮންމެވެސް ވަޒީރެއްގެ ޒިންމާގެ ދަށުން ކަމަށެވެ. ވީއިރު، ވަޒީރުން އެކި ކަންކަމުގައި މަޖިލީހަށް ޖަވާބުދާރީ ކުރުވުމަށް ހާޒިރުކުރަން ޖެހޭ ޙާލަތްތަކުގައި މަޖިލީހުން އެކަމާ ފަސްޖެހުމަކީ ދެރަ ކަމެއްކަމަށް ޒިޔާދު ވިދާޅުވިއެވެ.
މި އޮފީސް ހިނގާ ނުހިނގާ ގޮތް ބަލަން ވަޒީރަކު ހާޒިރުކުރަން ޖެހޭ ޙާލަތްތަކުގައި މަޖިލިސް ފަސްޖެހޭ ފަސްޖެހުމަކީ އަޅުގަނޑު ޤަބޫލު ކުރާ ގޮތުގައި ވަރަށް ދެރަވަރު ކަމެއް
ޒިޔާދު ވިދާޅުވީ، ދައުލަތުގައި ފައިސާއެއް ނެތްކަމަށް އެއްކޮޅުން ވާހަކަތައް އަޑުއިވޭއިރު އަނެއްކޮޅުން އިވެމުންދަނީ އައު އޮފީސްތައް އުފައްދާ ވާހަކަ ކަމަށާއި، ނޫސްތަކުން މުޅިންވެސް ފެންނަމުންދަނީ ސާޕްލަސް ބަޖެޓެއްގެ ވާހަކަ ކަމަށެވެ.
ކަން މިހެން ހުރުމާއެކު އެކަންކަން ސާފުކޮށް ބެލުމުގައި ރައްޔިތުންގެ މަޖިލީހުގެ ޒިންމާ ވަރަށް ބޮޑުވާކަން މެމްބަރު ފާހަގަ ކުރެއްވިއެވެ.
ނޫސްތަކުގައި އޮންނަނީ ސާޕްލަސް ބަޖެޓެކޭ، ކަރަންޓު ހުންނަނީ ދެދުވަހުން އެއް ދުވަހު ހަމައަށް، އެ ހިސާބުގައި ޤައުމު އޮންނައިރުގައި މަޖިލީހުގެ ޒިންމާ ވަރަށް ބޮޑުވޭ އިއްޒަތްތެރި ރައީސް.
މީގެ އިތުރުން، މޯލްޑިވްސް އިންޓެލެކްޗުއަލް ޕްރޮޕަޓީ އޮފީހުގެ ބިލަކީ ފިކުރީ މުދާ ރައްކާތެރި ކުރުމާ ގުޅޭ ބިލަކަށްވާއިރު، ޤައުމުގެ ކަންކަން މިއަދު އޮތީ ހަރުމުދާވެސް ރައްކާތެރިކުރަން ޖެހޭ ޙާލަތުގައިކަމަށް މެމްބަރު ވިދާޅުވިއެވެ.
މެމްބަރު ޒިޔާދު އިތުރަށް ވިދާޅުވީ، ދައުލަތުގައި ފައިސާހުރިނަމަ ރައްޔިތުންނަށް ބޭނުންވާ އަސާސީ ކަންކަން އެންމެ ފުރަތަމަ ފުރިހަމަ ކޮށްދޭން ޖެހޭކަމަށެވެ. އަދި ވިދާޅުވީ، ވަޒީރުން މަޖިލީހަށް ގެންނަން ޖެހެނީވެސް ރައްޔިތުންގެ ޙާލަތާ ގުޅޭ އެތައް ކަމެއްގެ ސުވާލު ވަޒީރުންނާ ކުރައްވަން ބޭނުންވާތީ ކަމަށެވެ.
މެމްބަރު ޒިޔާދު ވަނީ މަޖިލީހަށް ސަރުކާރު ޖަވާބުދާރީ ނުކުރެވޭކަން ފާހަގަ ކުރައްވައި އެކަމުގެ ކަންބޮޑުވުން ފާޅު ކުރައްވާފައެވެ.
