މޯލްޑިވް ގޭހުގެ ކްރެޑިޓް ކާޑުން އެ ކުންފުނީގެ މުވައްޒަފަކު އަމިއްލަ ޚަރަދުތަކެއް ކޮށްފައިވާތީ އެ މުވައްޒަފު ލައްކައަކަށްވުރެ ގިނަ ފައިސާ ދެއްކުމަށް ސިވިލް ކޯޓުން ޙުކުމްކޮށްފިއެވެ.
މިއީ މޯލްޑިވް ގޭސްގެ މުވައްޒަފެއްގެ ގޮތުގައި ހުރެ އެ ކުންފުނީގެ ކްރެޑިޓް ކާޑު ބޭނުންކޮށްގެން އެ މުވައްޒަފު އަމިއްލަ ޚަރަދުތަކެއް ކޮށްފައިވާތީ އެ ފައިސާ ހޯދުމަށް ކުންފުނިން ސިވިލް ކޯޓަށް ހުށަހެޅި މައްސަލައެކެވެ.
އޭގެ ތެރޭގައި 2009 ވަނަ އަހަރާއި 2010 ވަނަ އަހަރު ކޮށްފައިވާ ޚަރަދުތައް ހިމެނެއެވެ. އެގޮތުން 161،035 ރުފިޔާ އަމިއްލަ ކަންކަމަށް އެ މުވައްޒަފު ޚަރަދު ކޮށްފައިވާއިރު، އޭގެ ތެރެއިން 131،035 ރުފިޔާ އަދިވެސް ނުދައްކާ އެބައޮތްކަމަށް މައްސަލައިގައިވެއެވެ.
މި މައްސަލައިގައި އޭސީސީން ތައްޔާރުކޮށްފައިވާ ރިޕޯޓުގައިވެސް ކުންފުނީގެ ކްރެޑިޓް ކާޑު އަމިއްލަ ބޭނުންތަކަށް ބޭނުންކުރިކަމަށް ބަޔާންކޮށްފައިވެއެވެ.
މީގެ އިތުރުން، އެ ރިޕޯޓުގައިވާ ފައިސާ ހޯދުމަށް އެދި 2020 ވަނަ އަހަރު ކުންފުނިން އޭރުގެ މަޖިލީހަށްވެސް ސިޓީ ފޮނުވާފައިވެއެވެ. އެ ލިއުންތައް ކުންފުނިން ވަނީ ހެކީގެ ގޮތުގައިވެސް ހުށަހަޅާފައެވެ.
ދައުވާގެ ދިފާއުގައި މުވައްޒަފުގެ ފަރާތުން ބުނީ، އޭސީސީގެ ރިޕޯޓުގައި ފާހަގަކޮށްފައިވާ ގިނަ ޚަރަދުތަކަކީ ކުންފުނީގެ ރަސްމީ ޚަރަދުތަކެއް ކަމަށެވެ. އަދި އަމިއްލަ ބޭނުމަށް ހޭދަކުރި ފައިސާވެސް ކުންފުނީގެ ކޯޕަރޭޓް ކާޑު އެކައުންޓަށް ޖަމާކޮށް، އެ ފައިސާ ކުންފުންޏަށް ދައްކައި ނިމިފައިވާކަމަށް އޭނާ ބުނެފައިވެއެވެ.
އެހެންނަމަވެސް އެކަންކަން ސާބިތު ކުރުމަށްޓަކައި އޭނާ ބުނާ ބުނުން ފިޔަވައި އިތުރު ހެއްކެއް ހުށަހަޅާފައެއް ނުވެއެވެ.
ސިވިލް ކޯޓުން ވަނީ ދެފަރާތުން ދެއްކި ވާހަކަތަކަށް ރިއާޔަތްކޮށް އެ ފައިސާއަކީ މުވައްޒަފު ދައްކަންޖެހޭ ފައިސާކަމަށް ޙުކުމް ކޮށްފައެވެ.
އެހެންކަމުން 31،035 ރުފިޔާ 15 ދުވަސް ތެރޭގައި ދައްކައި ޚަލާސް ކުރުމަށް ކޯޓުން ވަނީ ޙުކުމްކޮށްފައެވެ.
ސިވިލް ކޯޓުގައި މި މައްސަލަ ބެއްލެވީ ގާޒީ ރިޒްމީނާ އިދްރީސްއެވެ.
