ގާ އަތުރައިގެން މަގު ހެދުމަކީ ކޮންމެހެން ލާޒިމު ކަމެއްނޫން ކަމަށާއި އެކަމުގައި ގޮތް ނިންމާނީ ރައްޔިތުންކަމަށް ރައީސް ޑރ މުޙައްމަދު މުއިއްޒު ވިދާޅުވެއްޖެއެވެ.
ރައީސް އެފަދައިން ވިދާޅުވީ ބ ކަމަދޫގައި ކުރިއަށް ދިޔަ ޖަލްސާގައި ވާހަކަ ދައްކަވަމުންނެވެ.
ރައީސް ވިދާޅުވީ، ލޯކަލް ޓޫރިޒަމް ކުރިއަރައިގެން އަންނައިރު ރަށްރަށް ތަރައްޤީ ކުރުމުގައި ބަލަންޖެހޭ ކަންކަން އެބަހުރި ކަމަށެވެ. އެގޮތުން ރައްޔިތުން ބޭނުންވަނީ މަގުތައް ރީތިކޮށް ބޭއްވުމަށް ކަމަށާއި، އަސާސީ ކަންކަން ފުދިފައި ހުންނަންވެސް ރައްޔިތުން ބޭނުންވާކަމަށް ރައީސް ވިދާޅުވިއެވެ.
އެގޮތުން ބަލާއިރު، ތާރު އެޅުން ނުވަތަ ގާ އަތުރައިގެން މަގުތައް ހެދުމަކީ މާ މުހިންމު ކަމެއް ނޫން ކަމަށާއި، އަދި އެއީ އެހާ ރަނގަޅު ކަމެއް ވެސް ނޫންކަމަށް ރައީސް ވިދާޅުވިއެވެ.
ރައީސް ވިދާޅުވީ، ރަށްތައް ކުރިއަރައިގެންދާނީ ރައްޔިތުން އެދޭގޮތަށް ކަމަށާއި، ރައްޔިތުންގެ ހިޔާލާއި މަޝްވަރާވެސް ހޯއްދަވާނެ ކަމަށެވެ. އަދި ވިދާޅުވީ، މަގުތައް ތަރައްޤީ ކުރާއިރު، ޤުދުރަތީ ރީތިކަންވެސް ދެމެހެއްޓޭނެ ގޮތަށް އެކަން ކުރުން މުހިއްމު ކަމަށެވެ.
މީގެ އިތުރުން، ކަމަދޫ ކައުންސިލުންވެސް ހުށަހަޅާފައިވަނީ އެގޮތްކަން ރައީސް ފާހަގަ ކުރެއްވިއެވެ.
ރަށުގެ ރައްޔިތުން ބޭނުންވާ ގޮތަށް، އިގުތިސޯދީ ގޮތުން އިތުރު ކުރިއެރުމެއް ލިބޭނެ ގޮތަށް ކުރިއަށް ގެންގޮސްދިނުން. ރައްޔިތުން ބޭނުންވާ ގޮތަކަށް އަޅުގަނޑުމެން ކުރިއަށް ދާނީ
ރައީސުލްޖުމްހޫރިއްޔާގެ މި ދަތުރުފުޅުގައި، އެ އަތޮޅުގެ މީހުން ދިރިއުޅޭ ރަށްރަށަށް ޒިޔާރަތްކުރައްވައި، ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކާ ބައްދަލުކުރައްވައި، އެ ރަށްރަށުގެ ތަރައްޤީއަށް ބޭނުންވާ ކަންކަމާއި ރައްޔިތުން އެންމެ އެދޭ ކަންކަމާ ގުޅޭގޮތުން މަޝްވަރާ ކުރައްވާނެއެވެ. އަދި ރަށްރަށުގެ ރައްޔިތުންނާ ބައްދަލުކުރައްވައި، އެ ރައްޔިތުންގެ ހާލު ބައްލަވާނެއެވެ.
ރައީސުލްޖުމްހޫރިއްޔާގެ މި ދަތުރުފުޅުގައި، މާޅޮސްމަޑުލު ދެކުނުބުރީގެ މީހުން ދިރިއުޅޭ 13 ރަށަށް ވަޑައިގަތުމަށް ހަމަޖެހިފައިވެއެވެ. އެ ގޮތުން ކަމަދޫ، ކުޑަރިކިލު، ކެންދޫ، އޭދަފުށި، ތުޅާދޫ، ގޮއިދޫ، ފެހެންދޫ، ފުޅަދޫ، ހިތާދޫ، ކިހާދޫ، ދޮންފަން، ދަރަވަންދޫ އަދި މާޅޮހަށް ޒިޔާރަތްކުރެއްވުމަށް ވަނީ ހަމަޖެހިފައެވެ.
