މިދިޔަ ދޮޅު އަހަރުގެ ތެރޭގައި ޕްރޮޖެކްޓުތައް ހިންގައި، ރައްޔިތުންނަށްވެފައިވާ ވައުދުތައް ފުއްދުމުގައި ގޮންޖެހުންތައް ދިމާވިނަމަވެސް އެ ހާލަތުން އަރައިގަނެވިފައިވާކަމަށް ރައީސުލުމްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ބ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ދެވަނަ މަންޒިލެއްގެ ގޮތުގައި ރައީސް މުއިއްޒު ވަޑައިގަތީ ކުޑަރިލުއަށެވެ. ރަށުގެ ރައްޔިތުންކީ ހޫނު މަރުހަބާއަށް ޝުކުރު އަދާކުރައްވައި ރައީސް މުއިއްޒު ވަނީ، ރިޔާސީ އިންތިހާބުގެ ދުވަސްވަރު ވެސް ވަޑައިގެންވެފައިވާ ވައުދުތައް ހަނދާނަށް ގެންނަވައި އެކަންކަން ފުއްދައިދެއްވާނެކަމުގެ ޔަގީންކަން ދެއްވާފަ އެވެ.
ރައީސް މުއިއްޒު ވިދާޅުވީ އެމަނިކުފާނު އަބަދުވެސް ރައްޔިތުންނަށް ދޭ ޔަގީންކަމަކީ، ރިޔާސީ އިންތިހާބުގައި އެމަނިކުފާނާއި ހަމައަށް ލިބުނު ޝަކުވާތަކާއި ކަންބޮޑުވުންތައް ހައްލު ކުރުންކަމަށެވެ. މިދިޔަ ދޮޅު އަހަރުގެ ތެރޭގައި ސަރުކާރަށް އެކި ގޮތްގޮތުން ގޮންޖެހުންތަކާއި ކުރިމަތިލާން ޖެހުނު ނަމަވެސް ރައީސް މުއިއްޒު ވިދާޅުވި ގޮތުގައި އެ ދަތިތަކުން ދަނީ އަރައިގަނެވުމުންނެވެ.
ކުޑަރިކިލަށް ދިމާވެފައިވާ އެންމެ ބޮޑު މައްސަލައެއްގެ ގޮތުގައި ރައީސް މުއިއްޒު ފާހަގަކުރެއްވީ، ފެނާއި ނަރުދަމާގެ މައްސަލައެވެ. އަދި މި މަހުގެ ތެރޭގައި މަސައްކަތުގެ އަމަލީ މަސައްކަތް ފަށައި، ގިނަ ވެގެން ހަތް މަސް ދުވަހުގެ ތެރޭގައި މަސައްކަތް ނިންމާލެވޭނެކަމަށް ރައީސް މުއިއްޒު ވިދާޅުވި އެވެ. މިއާއި އެކު ދެން ކުރިޔަށް ގެންދަން އޮތީ މަގުހެދުމުގެ މަސައްކަތްކަމަށްވުމާއި އެކު މި މަޝްރޫއުތައް ކުރިޔަށްދާނީ އެކުއެކީގައިކަމަށް ރައީސް މުއިއްޒު ވިދާޅުވި އެވެ.
ކުޑަރިކިލުގެ މަގު ހެދުމުގެ މަސައްކަތް ހަވާލުކޮށްފައި ވަނީ ރައީސް މުއިއްޒު ވިދާޅުވި ގޮތުގައި ރޯޑް ޑިވެލޮޕްމަންޓް ކޯޕަރޭޝަންއަށެވެ.
އިތުރު އެހެން ޕްރޮޖެކްޓެއްގެ ގޮތުގައި ރައީސް ދެން ވިދާޅުވީ، ރަށުގެ ސްކޫލު ތަރައްގީ ކުރުމެވެ. އެގޮތުން މަލްޓި ޕާޕަސް ހޯލުގެ މަސައްކަތް ކުރިޔަށް ގެންދާނެކަމަށް ވިދާޅުވި އެވެ. މީގެއިތުރުން ރަށުގެ ސިއްހީ މަރުކަޒުގެ މަސައްކަތާއި، އައު މިސްކިތެއް ބިނާކުރުމަށްޓަކައި ވަރަށް އަވަހަށް ބިމެއް ހަމަޖެހިގެންދާނެކަމަށް ރައީސް ވިދާޅުވި އެވެ. ރައީސް މުއިއްޒު ވިދާޅުވީ މިސްކިތް އެޅުމަށްޓަކައި ކޮންޓްރެކްޓުގައި ސޮއިކުރެވިފައިވާކަމަށާއި މިހާރު ކުރިޔަށް ދަނީ ބިމެއް ހަމަޖެއްސުމަށްޓަކައި ކުރަން ޖެހޭ މަޝްވަރާތައް ކަމަށެވެ.
ކުޅިވަރުގެ ދާއިރާގެ ތެރެއިން ތިން މަޝްރޫއުއެއް ކުރިޔަށް ގެންދިއުމަށް ހަމަޖެހިފައިވާއިރު، އެ މަސައްކަތާއި ގުޅުން ހުރި ބައެއް މަޝްވަރާތައް ކުރިޔަށްދާކަމަށް ރައީސް ވަނީ ވިދާޅުވެފަ އެވެ. އެއީ ފުޓް ބޯޅަ ދަނޑަކާއި، ހޭންޑް ބޯލް ކޯޓެއް ގާއިމު ކުރުމުގެ މަސައްކަތެވެ.
ތިން ދުވަހުގެ ދަތުރުފުޅެއްގައި، ބ. އަތޮޅުގެ ރަށްތަކަށް ކުރައްވާ ދަތުރުފުޅުގައި ރައީސް މުއިއްޒު ފުރާވަޑައިގަތީ މިއަދު އެވެ. މި ދަތުރުފުޅުގައި އެމަނިކުފާނާއި އެކު ދައުލަތުގެ ބައެއް ވަޒީރުންނާއި، ކުންފުނިތަކުގެ ބައިވެރިން ބައިވެވަޑައިގަންނަވަ އެވެ.
ރައީސް މުއިއްޒުގެ އަމާޒަކީ ރާއްޖޭގެ ހުރިހާ ރަށްތަކަށް ވެސް ވަޑައިގެން، ރަށުގެ ރައްޔިތުންނާއި ބައްދަލު ކުރައްވައި ދިމާވެފައިވާ ދަތިތައް ގާތުން ބައްލަވާލެއްވުމެވެ. އަދި އެކަންކަން ހައްލުކޮށްދެއްވައި، ރިޔާސީ އިންތިހާބުގައިވެފައިވާ ވައުދުތައް ފުއްދައިދެއްވާނެކަމުގެ ޔަގީންކަން ރައީސް ވަނީ ދެއްވާފަ އެވެ.
މި ދަތުުރުފުޅުގެ ބޭނުމެއްކަމަށް ވެސް ރައީސް މުއިއްޒު ވިދާޅުވެފައި ވަނީ، ރައްޔިތުންނާއި ވީހާވެސް ގާތުން މަސައްކަތް ކުރުމެވެ.
