ބ. ކަމަދޫއަށް ރާއްޖޭގެ ގައުމީ އެއާލައިންސް މޯލްޑިވިއަންގެ ސީޕްލޭން ހިދުމަތް ތައާރަފުކުރުމަށް އެއްބަސްވުމެއްގައި ސޮއިކޮށްފިއެވެ.
ކަމަދޫގައި ސީޕްލޭންގެ ހިދުމަތް ފެށުމަށް އެއްބަސްވުމުގައި ސޮއިކޮށްފައި ވަނީ ރައީސް ޑރ. މުހައްމަދު މުއިއްޒު ބ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ކަމަދޫއަށް ވަޑައިގެންނެވެ. އެގޮތުން، ކަމަދޫގެ ރައްޔިތުންނާއި ބައްދަލު ކުރުމަށް ބޭއްވި ރަސްމިއްޔާތުގައި ސޮއި ކުރި ޕްރޮޖެކްޓުތަކުގެ ތެރޭގައި ސީޕްލޭންގެ ހިދުމަތް ދިނުން ވެސް ހިމެނެ އެވެ.
މި އެއްބަސްވުމުގައި ސޮއިކޮށްފައި ވަނީ، މޯލްޑިވިއަންއާއި ހޯކްސް ހޮޓެލްއާއި ދެމެދުގައެވެ. އެގޮތުން، އެއްބަސްވުމުގައި މޯލްޑިވިއަންގެ ފަރާތުން ސޮއިކޮށްފައި ވަނީ، ކުންފުނީގެ މެނޭޖިންގ ޑިރެކްޓަރު، އިބްރާހިމް އިލްޔާސެވެ. އަދި، ހޯކްސް ހޮޓެލްގެ ފަރާތުން ސޮއިކުރެއްވީ، ކުންފުނީގެ ޖެނެރަލު މެނޭޖަރު، ހުސައިން އަމާންއެވެ.
ރާއްޖޭގެ އިގްތިސާދު މައިގަނޑު ގޮތެއްގައި ބިނާވެފައި އޮތީ، ފަތުރުވެރިކަމުގެ ސިނާއަތުގެ މައްޗަށެވެ. އެގޮތުން، ފަތުރުވެރިން އާންމު ގޮތެއްގައި، ރާއްޖެއަށް އައުމަށްފަހު، ހިޔާރުކުރާ އެކޮމޮޑޭޝަނަކީ ރިސޯޓުތަކެެވެ. އެގޮތުން، މިނިސްޓްރީ އޮފް ޓޫރިޒަމްގެ ތަފާސް ހިސާބުތަކަށް ބަލާލުމުންވެސް ފާހަގަވާ އެއްކަމަކީ، ރާއްޖެއަށް ޒިޔާރަތްކުރާ ފަތުރުވެރިންގެ ޖުމްލަ މާކެޓުގެ ބޮޑު އިންސައްތައެއް ހިޔާރުކުރަނީ ރިސޯޓެވެ. އެހެންނަމަވެސް، ރާއްޖޭގެ ފަތުރުވެރިކަމުގެ މާކެޓުގެ ތެރެއިން، ސަބް މާކެޓް ނުވަތަ ނީޝް މާކެޓެއްގެ ގޮތުގައި ލޯކަލް ޓޫރިޒަމް އޮތް އިރު، އެ މާކެޓް އިިތުރަށް ކުރިއެރުވުމަށްޓަކައި، ފަތުރުވެރިންނަށް ފަސޭހަކަމާއިއެކު، ރާއްޖެތެރެ ރަށްތަކަށް ދަތުރުކުރުމުގެ މަގެއް އޮތުން މުހިއްމެވެ. އެހެންކަމުން، ކަމަދޫގައި ސީޕްލޭން ހިދުމަތް ތައާރަފުކުރެވިގެންދިޔުމަކީ، ރާއްޖޭގެ ލޯކަލް ޓޫރިޒަމް އިތުރަށް ފުޅާކޮށް، އެ ރަށުގެ ކުދި އަދި މެދުފަތީންގެ ވިޔަފާރިތަކަށާއި، ޖުމަލްކޮށް، ރާއްޖޭގެ މުޅި އިގްތިސާދަށް އެތަކެއް ފައިދާއެއް ލިބިގެންދާނެ ކެމެކެވެ.
މޯލްޑިވިއަންގެ އުދުހުންތައް ފުޅާވުން
ބ. އަތޮޅު ކަމަދޫއަކީ މޯލްޑިވިއަންގެ ސީޕްލޭން، މި އަތޮޅަށް މުޅިން އަލަށް ތައާރަފުކުރެވޭ ހިދުމަތެއްނޫނެވެ. އެގޮތުން، ބ އަތޮޅުގެ ފުޅަދޫއާއި ފެހެންދޫގެ އިތުރުން ގޮއިދޫއަށްވެސް، އެ އެއާލައިންސްގެ ސީޕްލޭންގެ އުދުހުންތައް ކުރިއަށް ގެންދެއެވެ. އެހެންކަމުން، ބ. އަތޮޅުގެ އިތުރު ރަށަކަށް ފުޅާވެގެންދިޔުމަކީ، އެ އަތޮޅުގެ ރައްޔިތުންނަށް ދަތުރުފަތުރު ކުރުމަށް އިތުރު ލުއިފަސޭހަތަކެއް ލިބިގެންދާނެކަމެކެވެ. އަދި، މޯލްޑިވިއަންއަށް އިތުރު އާމްދަނީ ހޯދުމަށްވެސް ދޮރު ހުޅުވިގެންދާނެއެވެ.
މުސްތަގުބަލަށް އޮތް އުއްމީދު
ލޯކަލް ޓޫރިޒަމަކީ، ރާއްޖޭގެ ފަތުރުވެރިކަން އައު ހަރުފަތަކަށް ގެންދިޔުމަށްޓަކައި ވަރަށް މުހިއްމު ނީޝް މާކެޓެކެވެ. މި މާކެޓް އިތުރަށް ކުރިއަރުވާ، ރާއްޖޭގެ ފަތުރުވެރިކަމުގެ ސިނާއަތް އައު ހަރުފަތަކަށް ގެންދިޔުން ހަގީގަތަކަށް ހެދުމަށްޓަކައި، ރާއްޖޭގެ އެއް ރަށުން، އަނެއް ރަށަށް ފަސޭހަކަމާއިއެކު ދަތުރުކުރެވޭނެ، ރަނގަޅު ގުޅުމެއް ނުވަތަ ކަނެކްޓިވިޓީއެއް އޮތުމަކީ މުހިއްމުކަމެކެވެ. ރާއްޖޭގެ ރަންބިސް އަޅާ ކުކުޅުކަމަށްވާ ފަތުރުވެރިކަމުގެ ސިނާއަތް ކުރިއަރައިގެންދިޔުމަކީ، ރާއްޖޭގެ އިގްތިސާދަށް ލިބޭނެ ވަރަށް ބޮޑު ކުރިއެރުމެކެވެ. އެގޮތުން، އާހިރު ނަތީޖާއަކަށް ވެގެންދާނީ، ރާއްޖެ ހުރިހާ ރައްޔިތުން ފަހުރުވެރިވާ އިގްތިސާދެއް ބިނާވެ، ފުދުންތެރި ދިރިއުޅުމެއް، ދިވެހި ރައްޔިތުންނަށް ލިބުމުގެ އުންމީދު އައުވެގެންދިޔުމެކެވެ.
