ސީރިޔާގެ އިދްލިބްގައި ހުންނަ އަސްކަރީ ވައިގެ ބަނދަރަކަށް އިސްރާއީލުން ވައިގެ ވަރުގަދަ ހަމަލާތަކެއް ދީފިއެވެ. މި ހަމަލާތަކާ ގުޅިގެން ސީރިޔާގެ މުސްތަގުބަލާ މެދު އިސްރާއީލާއި ތުރުކީއާ ދެމެދު އުފެދިފައިވާ ނުތަނަވަސްކަން މިހާރު ވަނީ އިންތިހާއަށް ބޮޑުވެފައެވެ.
އަންގާރަ ދުވަހު އިސްރާއީލުން އަމާޒުކުރީ އިދްލިބްގެ އަބޫ އަލް-ދުހޫރު އެއަރބޭސްގެ ރަންވޭއަށާއި އެ ތަނުގެ މުހިންމު ބައެއް ވަސީލަތްތަކަށެވެ. ޖުމްލަ އަށް (8) ހަމަލާއެއް އެ ސަރަހައްދަށް ދީފައިވާއިރު، މި ހަމަލާތަކުގައި އެއާބޭސްގެ ވަސީލަތްތަކަށް ބޮޑެތި މާއްދީ ގެއްލުންތަކެއް ވަނީ ލިބިފައެވެ. ނަމަވެސް މި ހާދިސާގައި އެއްވެސް މީހަކަށް އަނިޔާވިކަމުގެ ރިޕޯޓެއް އަދި ލިބިފައެއް ނުވެއެވެ. އިސްރާއީލުގެ ބޮޑުވަޒީރުގެ އޮފީހުން މި ހަމަލާތައް ދިފާއުކޮށް ބުނެފައިވަނީ ސީރިޔާގެ ތެރޭގައި ހިންގާ އަސްކަރީ މިފަދަ ހަރަކާތްތަކަކީ އެ ގައުމުގެ ސަލާމަތަށް އޮތް ސީދާ ނުރައްކަލެއް ކަމަށާއި މިކަމާ ގުޅޭގޮތުން މީގެ ކުރިންވެސް ތަކުރާރުކޮށް އިންޒާރު ދީފައިވާނެ ކަމަށެވެ.
ނަމަވެސް އިސްރާއީލުން ދައްކާ މި ވާހަކަތަކަށް ތުރުކީން ވަނީ ވަގުތުން ރައްދުދީ، ހަރުކަށި އިބާރާތުން އެކަން ކުށްވެރިކޮށްފައެވެ. އަންކާރާއިން ބުނި ގޮތުގައި، އިސްރާއީލުގެ މި އަމަލަކީ ސޫރިޔާގެ މިނިވަންކަމާއި ސިޔާދަތަށް އަރައިގަތުމުގެ އުދުވާނީ އަމަލެކެވެ. އަދި ބައިނަލްއަގުވާމީ ގާނޫނުތަކާ ހިލާފުވާ އިސްރާއީލު ޒިންމާދާރުކުރުވުމަށް ދުނިޔޭގެ މުޖުތަމައަށް ތުރުކީން ވަނީ ގޮވާލާފައެވެ. މީގެ އިތުރުން ތުރުކީގެ އަސްކަރީ ހަރަކާތްތަކަކީ އިސްރާއީލަށް އޮތް ނުރައްކަލެއް ކަމަށް ބުނެ ދައްކަނީ ހަމަލާތައް ދިފާއުކުރުމަށް ހަދާފައިވާ ކަނޑައެޅިގެން ދޮގު ބަހަނާތަކެއް ކަމަށްވެސް ތުރުކީ ސަރުކާރުން ބަޔާންކޮށްފައިވެއެވެ.
މި ނުރައްކާތެރި ހާދިސާއާ ގުޅިގެން ސަރަހައްދީ މަސްރަހު އިތުރަށް ގޯސްވެދާނެކަމުގެ އިންޒާރު އެމެރިކާއިން މިހާރު ވަނީ ދީފައެވެ. އެމެރިކާގެ ހާއްސަ މަންދޫބު ޓޮމް ބަރަކް ވިދާޅުވީ، އިސްރާއީލާއި ތުރުކީ އަދި ސީރިޔާއާ ދެމެދު ނުރައްކާތެރި އަސްކަރީ ކުރިމަތިލުމަކަށް މަގުފަހިވިޔަ ނުދިނުމަށާއި، ހިސާބުތައް ނުބައިވުމުގެ ސަބަބުން ނުކުމެދާނެ ނުރައްކާތައް ހުއްޓުވުމަށްޓަކައި ހާއްސަ މުވާސަލާތީ ނިޒާމެއް ގާއިމުކުރުމުގެ މަސައްކަތް ވޮޝިންޓަނުން ކުރަމުންދާ ކަމަށެވެ.
މި ފަހަކަށް އައިސް ސީރިޔާގެ ސަރަހައްދުގައި ހިނގަމުންދާ މިފަދަ ހަމަލާތަކުގެ ސަބަބުން އިސްރާއީލާއި ނޭޓޯގެ މެންބަރު ގައުމެއް ކަމަށްވާ ތުރުކީ، ސީރިޔާގެ ފަސްގަނޑުގައި ސީދާ އަސްކަރީ ކުރިމަތިލުމަކަށް ހިނގައިދާނެކަމުގެ ބިރުވެރިކަން މިހާރު ވަނީ ވަރަށް ބޮޑަށް އުފެދިފައެވެ. އެހެންނަމަވެސް، މަސްރަހު އިތުރަށް ހޫނުވިޔަނުދީ ފިނިކުރުމަށް ޓަކައި ޑިޕްލޮމެޓިކް އެކި ވަސީލަތްތައް މެދުވެރިކޮށް ދެފަރާތުގެ ދެމެދުގައި އަދިވެސް ދަނީ މަޝްވަރާތައް ކުރެވެމުންނެވެ.
