ރަސްމާލެ މަޝްރޫއުގެ ދަށުން ބިން ކުއްޔަށް ދިނުމާ ގުޅޭގޮތުން އީގަލް ހިލްސް ކުންފުންޏާއެކު ވެވޭ އެއްބަސްވުމުގެ ތަފްސީލުތައް އާންމުކުރުމަށް އިދިކޮޅު އެމްޑީޕީގެ ރިޔާސީ ޓިކެޓަށް ވާދަކުރައްވާ އެ ޕާޓީގެ ކުރީގެ ޗެއާޕާސަން ފައްޔާޒް އިސްމާއީލް ގޮވާލައްވައިފިއެވެ.
ފައްޔާޒް އެކްސްގައި އާންމުކުރެއްވި ބަޔާނެއްގައި ވިދާޅުވީ، ރައީސް ޑރ. މުހައްމަދު މުއިއްޒުގެ ސަރުކާރުން ރަސްމާލެ ކުއްޔަށް ދިނުމާ ގުޅޭ އެއްބަސްވުމުގެ މާއްދާތައް ހާމަނުކުރުމަކީ ޤާނޫނީ ގޮތުންނާއި އިޤްތިޞާދީ ގޮތުން ބޮޑެތި ކަންބޮޑުވުންތަކެއް އުފެދޭ ކަމެއް ކަމަށެވެ.
އެއްބަސްވުމުގެ ޝަރުތުތަކާއި، އެ މަޝްރޫއުގެ މޮޑެލްގެ ސަބަބުން ދުރު މުސްތަޤްބަލުގައި ނުކުމެދާނެ ނަތީޖާތައް އާންމުންނަށް ފުރިހަމައަށް ސާފުކޮށް އެނގުމެއް ނެތި، އެ އެއްބަސްވުން ކުރިއަށް ގޮސް ނިންމާލައިގެން ނުވާނެ ކަމަށް ފައްޔާޒް ވަނީ ވިދާޅުވިއެވެ. އޭނާ ފާހަގަކުރެއްވީ، އެއްބަސްވުމުގެ ޝަރުތުތައް އާންމުންނަށާއި މަޖިލީހަށް އަދި މީޑިއާއަށް ވެސް ފޯރުކޮށްދީފައިނުވާއިރު، ދޫކުރާ ބިމުގެ އަގާ އެއްވަރުގެ ފައިދާއެއް ލިބޭނެކަމެއް ވެސް ކަށަވަރުނުކުރެވޭ ކަމެވެ.
ދިވެހި ސަރުކާރުގެ ނޫސްބަޔާނުގައި ބުނެފައިވާ 20 ބިލިއަން އެމެރިކާ ޑޮލަރަކީ ހުރިހާ ފޭސްތަކަކަށް ބެހިގެން ލިބޭނެ އަދަދު ކަމާއި އެއީ ކޮންޓްރެކްޓްގެ ދަށުން އުފެދޭ އިލްތިޒާމެއް ނޫން ކަމަށް ވެސް އޭނާ ވިދާޅުވިއެވެ. އީގަލް ހިލްސްއިން އިންވެސްޓް ކުރަންޖެހޭ އިކުއިޓީގެ މިންވަރާއި، އެކަން ކުރަންޖެހޭ މުއްދަތާއި، ހާސިލްކުރަންޖެހޭ މައިލްސްޓޯންތަކާއި، ނުވަތަ ޕާފޯމަންސް ގަރަންޓީތަކާއި، ޑީފޯލްޓް އުސޫލުތަކާއި، އަދި އެކަން ނުކޮށްފިނަމަ އަނބުރާ ހޯދޭނެ އުސޫލުތައް ދައްކާފައިނުވާކަން އޭނާ ފާހަގަކުރެއްވިއެވެ.
ދިވެހިރާއްޖެއަށް ”10 އިންސައްތައިގެ ރެވެނިއު ޝެއަރއެއް“ ދޭނެ ކަމަށް ބުނެފައިވާއިރު، އާމްދަނީ ބަހާނެ ގޮތުގެ މިންގަނޑު ހިސާބުކުރަނީ ޖުމްލަ އާމްދަނީން ކަމެއް، ހިންގުމުގެ އާމްދަނީން ކަމެއް، ނުވަތަ ފައިދާއިން ކަމެއް، އަދި އޭގެ ތެރޭގައި ތިންވަނަ ފަރާތްތަކުގެ އޮޕަރޭޓަރުން ހިމެނޭކަމެއް ނުވަތަ ހަމައެކަނި މާސްޓަރ ޑިވެލޮޕަރުގެ އަމިއްލަ އާމްދަނީކަން ނޭނގޭކަން އޭނާ ފާހަގަކުރެއްވިއެވެ.
ރަސްމާލެއަކީ ހާއްސަ އިގްތިސާދީ ޒޯނެއް (SEZ) ކަމަށް ވެގެންދާނެތޯ، ނުވަތަ ބޭރުގެ ގަންނަ ފަރާތްތަކަށް ލިބޭނީ ކޮން ރެސިޑެންސީ ކެޓަގަރީއެއްކަމެއް ވެސް ސާފުކޮށް ނުދޭ ކަމަށާއި، އެ މަޝްރޫއު ކުރިއަށް ގެންދިއުމަށްޓަކައި އިސްލާހު ކުރަންޖެހޭ ގާނޫނުތަކާއި، އަލަށް ތައާރަފްކުރަންޖެހޭ ގާނޫނުތަކަކީ ކޮބައިކަން ސަރުކާރުން ހާމަކޮށްފައެއް ނުވާކަން ވެސް އޭނާ ފާހަގަކުރެއްވިއެވެ.
އޭގެ އިތުރުން، އެ މަޝްރޫއު ހިންގާ ބިން އެހެން ފަރާތަކަށް ކުއްޔަށް ދޭ ހިސާބުން އިތުރު 99 އަހަރަށް ކޮންޓްރެކްޓެއް އުފަންވާނެތީ، އެއީ އަބަދުގެ އަބަދަށް ދިވެހި ރައްޔިތުންގެ ބިމެއް ބޭރުގެ ފަރާތްތަކަށް ދިނުމުގެ ގޮތުގައި އެނާގެ ބަޔާނުގައި ސިފަކުރެއްވިއެވެ.
ފައްޔާޒް ވިދާޅުވީ ރަސްމާލެ ކުއްޔަށްދޭ އެއްބަސްވުމުގެ ތަފްސީލުތައް ރައްޔިތުންނަށް އަދި މަޖިލީހަށް ވެސް އެނގެންޖެހޭ ކަމަށެވެ. ދައުލަތުގެ ބޮޑު ބިމެއް ނުވަތަ ފަޅެއް ދިގު މުއްދަތަކަށް ކުއްޔަށް ދޫކުރާއިރު، އެ އެއްބަސްވުމުގައި ހިމެނޭ މާއްދާތަކަކީ އާންމު ރައްޔިތުންނަށް އެނގެންޖެހޭ މައުލޫމާތުތަކެއް ކަމަށާއި، ދެފުށް ފެންނަ ގޮތަށް އެ މައުލޫމާތުތައް ހާމަކުރުމަކީ ސަރުކާރުގެ މަސްއޫލިއްޔަތެއް ކަމަށް އޭނާ ފާހަގަކުރެއްވިއެވެ.
ސަރުކާރުން އެއްބަސްވުމުގެ ތަފްސީލުތައް ހާމަނުކޮށް ކުރިއަށް ދިއުމަކީ ޤާނޫނީ ގޮތުންނާއި އިޤްތިޞާދީ ގޮތުން ބޮޑެތި ކަންބޮޑުވުންތަކެއް އުފެދޭ ކަމެއް ކަމަށް ފައްޔާޒް ވިދާޅުވިއެވެ. އެގޮތުން ރަސްމާލެ ހިއްކަން 1.4 ބިލިއަން ޑޮލަރު ހަރަދުވާއިރު، އަދި ސަރުކާރުން އެއްވެސް އެކުއިޒިޝަން ޕޭމަންޓެއް ނަގާފައިނުވާއިރު، މަޝްރޫއިން ރާއްޖެއަށް ފައިދާއެއް ވާން އެތައް އަހަރެއް ނަގާނެ ކަމަށް ފައްޔާޒު ވިދާޅުވިއެވެ.
ރާއްޖެ އިގްތިސާދީ ގޮތުން ދަތި ހާލަތެއްގައި އޮތްއިރު، އަވަސް މުސްތަގުބަލެއްގައި ޑޮލަރު ރާއްޖެއަށް ވެއްދޭނެ ފަދަ ގޮތަކަށް އެ އެއްބަސްވުމުގެ ޝަރުތުތައް އެކުލަވާލާފައި ނެތުމަކީ ސަރުކާރަށް ހުއްޖަތެއް ދެއްކެން އޮތް ކަމެއް ނޫންކަން ވެސް ފައްޔާޒު ފާހަގަކުރެއްވިއެވެ.
