އާ އަސާސީ ގަވައިދެއް ހުށަހަޅައި ގަނޑުކޮށް ފާސްކުރަން އުޅުމުން އެމްޑީޕީގެ ކޮންގްރެސްގެ ބައެއް މަންދޫބުން ފާޅުކުރެއްވި ކަންބޮޑުވުުންތަކަށް ޖަވާބު ދެއްވަމުން އެ އާ އަސާސީ ގަވައިދުގެ މާއްދާތަކަށް ވަކިވަކިން އިސްލާހު ހުށަހަޅަން އެއް މަސް ދުވަހުގެ މުއްދަތެއް ދީފައި އޮތްކަން އެ ޕާޓީގެ ކުރީގެ ޗެއާޕާސަން ފައްޔާޒު އިސްމާއިލް ފާހަގަކުރައްވައިފިއެވެ.
ފައްޔާޒު ވިދާޅުވީ، އޭނާ ކޮންގްރެސްއަށް ހުށަހެޅުއްވީ ޕާޓީން ކުރި އިއުލާނަކާ ގުޅިގެން މުޅި އަސާސީ ގަވައިދަށް ހުށަހެޅި އިސްލާހެއް ކަމަށާއި އެކަމަށް ހުޅުވާލާފައި އޮންނަތާ އެއް މަސް ވެފައިވާ ކަމަށެވެ.
އެއްވެސް މަންދޫބަކު، ހުށަހަޅާފައި ހުރި އެއްޗެއް ބެއްލެވިިންތޯ ސުވާލު އުފައްދަވައި ފައްޔާޒު ވިދާޅުވީ، އެކަން ބަލައިގެން އައި ނަމަ އެ ވާހަކަތައް ވާނީ ރަނގަޅު ވާހަކަތަކަށް ކަމަށެވެ. އަދި އެކަމަށް ބަލައިގެން އިސްލާހު ހުށަހެޅިނަމަ އެކަމުގެ ބަހުސް ކުރެވުނީސް ކަމަށް އޭނާ ވިދާޅުވިއެވެ.
”ތިއިން އެއްވެސް ބޭފުޅަކު އެ ވާހަކަ ދެއްކެވި އެއްވެސް ބޭފުޅަކު ބައްލަވާލެއްވިންތޯ ހުށަހަޅާފައި އޮތް އެއްޗެއް. އެހެންނަމަ ތިއީ ހަމަ ރަނގަޅު ވާހަކަ އިނގޭތޯ. މި ޕާޓީގައި އެބަ އޮވޭ އުސޫލުތަކެއް. މިތަނަކުން އިސްލާހު ހުށަހެޅޭ ގޮތަކަށް ނޫން މި އޮތީ،“
މީގެ ކުރިން ފައްޔާޒާއި ކުޑަހުވަދޫ ދާއިރާގެ ރައީސް ޝާތިރު ވާހަކަ ދައްކަވައިގެން ޝާތިރު އަސާސީ ގަވައިދަށް ހުށަހެޅުއްވި ވަރަށް ބައިވަރު ކަންކަން ރަނގަޅު ކަމަށް ނިންމައިގެން އެކަމަށް އެއްބަސްވެވަޑައިގެންނެވި ކަމަށް ފައްޔާޒު ވިދާޅުވިއެވެ. އަދި ޕާޓީގެ ލީގަލް ޑިރެކްޓަރު އެ ބަދަލުތައް ގެންނަން ނިންމި ނަމަވެސް، ކުރީގެ ޗެއާޕާސަން މާރިޔާ އަހުމަދު ދީދީގެ އެދިވަޑައިގަތުމުގެ މަތިން ކޮންގްރެސްއަށް އެކަންކަން ހުށަހަޅައިގެން ބަހުސްކޮށްގެން ވޯޓެއްގެ ތެރެއިން އެކަންކަން ފާސްކުރުމަކީ ރީތި ގޮތް ކަމަށް ވިދާޅުވުމުން އެގޮތަށް އެކަން ކުރަން ނިންމީ ކަމަށް އޭނާ ވިދާޅުވިއެވެ.
އެހެންކަމުން، މިހާރު އެ ފުރުސަތު ގެއްލިފައިވާ ކަމާއި ދެން ފުރުސަތު އޮތީ އޭނާ ހުށަހަޅުއްވާފައިވާ އަސާސީ ގަވައިދަށް އިސްލާހު ހުށަހެޅުމަށް ކަމަށް އޭނާ ވިދާޅުވިއެވެ.
”ދެން ގަނޑުކޮށް ކީއްވެތޯއޭ، އަޅުގަނޑު ހުށަހެޅީ ގަނޑުކޮށް އާ އަސާސީ ގަވައިދެއް. އެހެންވީމަ އެއަށް ތިބޭފުޅުންނަށް އެކިއެކި މާއްދާއަށް އިސްލާހު ހުށަހަޅަން އޮތޭ އެއް މަސް ދުވަސް ވަންދެން. ދެން ތިބޭފުޅުން އެއަށް ހުށަނާޅުއްވާަ، މިތަނުގައި އަޅުގަނޑު ވަކި މާއްދާއަކަށް ނޫނޭ ހުށަހެޅީ. އެހެންވީމަ ވަކިވަކި މާއްދާއަކަށް އަޅުގަނޑު މިތަނުގައި ހުށަހެޅަންޖެހޭކަމަށް އަޅުގަނޑު ގަބޫލެއް ނުކުރަން،“
މިއަދު ކޮންގްރެސްގައި ޝާތިރު ވަނީ އަސާސީ ގަވާއިދަށް ފަސް އިސްލާހެއް ހުށަހަޅައިފައެވެ. ޝާތިރު ހުށަހެޅި އިސްލާހުތަކުގެ ތެރޭގައި ގޮފިތައް އުވާލުމާއި، ކޮންގްރެސްގައި ބައިވެރިންގެ ނަންތައް ދިހަ ދުވަސްކުރިން އިއުލާންކުރުމާއި އިންތިހާބަކާ ނުލައި ގައުމީ މަޖިލީހަށް އައްޔަންކުރާ މެންބަރުންނަށް އިތުބާރު ނެތްކަމުގެ މައްސަލަތަކުގައި ވޯޓުނުލެވޭ ގޮތަށް ހެދުމާއި މުހިންމު ކޮމިޓީތަކެއް އައްޔަންކުރުމުގެ ބާރު ޗެއާޕާސަންގެ އަތުން ނަގައި ގައުމީ މަޖިލީހަށް ދިނުމާއި މިހާރު އޮންނަ ގޮތަށް ގައުމީ މަޖިލީހަށް ކޮންމެ ރަށަކުން ވެސް އެއް މެންބަރު އިންތިހާބުކުރަން ޖެހޭ ގޮތަށް ބޭއްވުން ހިމެނެއެވެ.
ނަމަވެސް، ޝާތިރު އިސްލާހު ހުށައެޅުއްވީ އަސާސީ ގަވައިދަށް ނޫން ކަމަށާއި، އޭނާ އިސްލާހު ހުށައެޅުއްވީ ފައްޔާޒްގެ އިސްލާހަށް ކަމަށް ރިޔާސަތުން އެންގިއެވެ. އެކަމަށް ރައްްދު ދެއްވައި ޝާތިރު ވިދާޅުވީ، އޭނާ އަސާސީ ގަވައިދަށް އިސްލާހު ހުށަހެޅި ކަމަށާއި، އެހެންނަމަވެސް ޕޯޑިއަމްގައި ލިބުނު ފުރުސަތުގައި ހަމައެކަނި ފާހަގަކުރެއްވީ ފައްޔާޒް ހުށަހެޅި އިސްލާހަށް އިސްލާހު ހުށައެޅުމަށް ކަމަށެވެ.
އެކަމާ ގުޅިގެން ރިޔާސަތުން ވިދާޅުވީ، އަސާސީ ގަވައިދަށް އިސްލާހު ހުށަހަޅަން އޮތް މުއްދަތު ނިމުނު ފަހުން އިސްލާހު ހުށަހެޅި ކަމަށާއި، އެއަށް ފަހު ހުޅުވާލީ ފައްޔާޒް ހުށަހަޅާއިފައިވާ އިސްލާހަށް އިތުރު އިސްލާހެއް ހުށައަޅަން ބޭނުންވާނަމަ އެކަން ހުށައެޅުމަށް އެކަނި ކަމަށެވެ.
