ޗައިނާއަކީ ދިވެހިރާއްޖޭގެ ތަރައްގީގެ ދަތުރުގައި ސާބިތުކަމާއެކު ދެމިއޮތް ބައިވެރިއެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް ޑރ. މުއިއްޒު މިފަދައިން ވިދާޅުވީ، ޗައިނާގެ ގައުމީ ދުވަހުގެ މުނާސަބަތުގައި ފޮނުއްވެވި ތަހުނިޔާގެ މެސެޖުގައެވެ.
ރައީސްގެ މެސެޖުގައި ވަނީ، ޗައިނާގެ ރައީސް ޝީ ޖިންޕިންގ އަށާއި، ޗައިނާގެ ސަރުކާރަށާއި ރައްޔިތުންނަށް އިހްލާސްތެރިކަމާއެކު ތަހުނިޔާއާއި ހެޔޮއެދުންތައް އަރިސްކުރައްވާފައެވެ.
ރާއްޖެއާއި ޗައިނާއާ ދެމެދު އޮތް އެކުވެރިކަމަކީ، ދެ ފަރާތުގެ މެދުގައިވާ އިހްތިރާމާއި، އިތުބާރާއި، ތަރައްގީއާއި ފާގަތިކަމާއި މެދު އޮތް އެއްގޮތް ތަސައްވުރުގެ މައްޗަށް ބިނާވެފައިވާ އެކުވެރިކަމެއް ކަމަށާއި އަދި ޗައިނާއަކީ، ރާއްޖޭގެ ތަރައްގީގެ ދަތުރުގައި ސާބިތުކަމާއެކު ދެމިއޮތް ބައިވެރިއެއްކަން ރައީސް ފާހަގަކުރެއްވިއެވެ.
ރައީސް ވަނީ ދެ ގައުމުގެ ގުޅުމުގެ ސަބަބުން ރާއްޖޭގެ ރައްޔިތުންނަށް މުހިންމު ފުރުސަތުތަކެއް މެދުކެނޑުމެއް ނެތި ފަހިވަމުންދާކަން ފާހަގަކުރައްވާ މުސްތަގުބަލުގައި ދެ ގައުމުގެ ދެމެދުގައިވާ ”ކޮމްޕްރިހެންސިވް ސްޓްރެޓީޖިކް ކޯޕަރޭޓިވް ޕާޓްނަރޝިޕް“ އިތުރަށް ބަދަހިކޮށް، ގުޅުން އައު އުސްމިންތަކަކަށް ގެންދިއުމަށް ކުރެވޭ މަސައްކަތްތަކުގައި ސާބިތުކަމާއެކު ދެމިތިއްބަވާނެކަމުގެ ޔަގީންކަން ދެއްވާފައެވެ. އަދި އުންމީދަކީ ދެ ގައުމުގެ ރައްޔިތުންގެ މެދުގައިވާ އެކުވެރިކަން ދުވަހުން ދުވަހަށް އިތުރަށް ބަދަހިވެގެންދިއުންކަން ފާހަގަކުރައްވާ، ޗައިނާއަށް އިތުރު ފާގަތިކަމާއި ކުރިއެރުމަށް އެދިވަަޑައިގެންފައިވެއެވެ.
އޮކްޓޯބަރު މަހުގެ 1ވަނަ ދުވަ ޗައިނާގެ ޗައިނާގެ ގައުމީ ދުވަސް ފާހަގަކުރާއިރު، މި ދުވަސް ފާހަގަކުރަނީ 1949 ވަނަ އަހަރު ޕީޕަލްސް ރިޕަބްލިކް އޮފް ޗައިނާ އުފެދުނު ދުވަހާ ގުޅިގެންނެވެ. އެއީ 23 އަހަރަށް ދެމިގެންދިޔަ ޗައިނާގެ ދާހިލީ ހަނގުރާމައިގައި، އެ ގައުމުގައި ކުރިން ވެރިކަން ކުރަމުން އައި ޗައިނީސް ނެޝަނަލިސްޓް ޕާޓީގެ މައްޗަށް ޗައިނީސް ކޮމިއުނިސްޓް ޕާޓީން ކާމިޔާބު ހޯދި ދުވަހުގެ ގޮތުގައެވެ.
ރާއްޖެއާއި ޗައިނާއާ ދެގައުމުގެ ދެމެދު ސިޔާސީ ގުޅުން ގާއިމްކުރީ 1972 ވަނަ އަހަރުގެ އޮކްޓޫބަރު މަހުގެ 14 ވަނަ ދުވަހުއެވެ. މިއީ ދެ ގައުމުގެ ދެމެދުގައި ސިޔާސީ ގުޅުން ގާއިމްކުރިތާ 54 އަހަރު ފުރޭ އަހަރެވެ.
