ގދ. ތިނަދޫގައި ހުންނަ ޑރ. ޢަބްދުއްޞަމަދު މެމޯރިއަލް ހޮސްޕިޓަލުގައި ކުރިއަށް ގެންދިޔަ ކެޓަރެކްޓް ސާޖަރީ އައި ކޭމްޕް ކާމިޔާބުކަމާއެކު ނިންމާލައިފިއެވެ.
މި ސެޕްޓެމްބަރު މަހުގެ 26 އިން 28 އަށް ތިން ދުވަހުގެ މުއްދަތަށް ކުރިއަށް ގެންދިޔަ އެ ކޭމްޕަކީ އުމުރުން ދުވަސްވީ ފަރާތްތަކަށް ޚާއްޞަކޮށްގެން، ލޮލުގެ ފަރުވާއާއި ކެޓަރެކްޓް ސާޖަރީގެ ޚިދުމަތް ރަށުގައި ތިބެގެން ފަސޭހަކަމާއެކު ލިބޭނެ މަގު ފަހިކޮށްދިނުމުގެ މަޤްޞަދުގައި ބޭއްވި ކޭމްޕެކެވެ.
އެ ހަރަކާތަކީ އޭޖްޑް ކެއާ މޯލްޑިވްސް އިސްނަގައިގެން، އެޓްމޮސްފިއަރ ފައުންޑޭޝަންގެ މާލީ އެހީތެރިކަމާއެކު ކުރިއަށްގެންދިޔަ ހަރަކާތެކެވެ. އަދި އެ ކޭމްޕުގައި އައިކެއާ ހޮސްޕިޓަލާއި ޑރ. ޢަބްދުއްޞަމަދު މެމޯރިއަލް ހޮސްޕިޓަލުން ވަނީ އަމަލީ ގޮތުން ބައިވެރިވެފައެވެ.
އެ ކޭމްޕުގައި އޮޕަރޭޝަންތައް ކުރިއަށް ގެންގޮސްދެއްވީ އައިކެއާ ހޮސްޕިޓަލުގެ ޕީޑިއަޓްރިކް އޮފްތަލްމޮލޮޖީ އަދި ކެޓަރެކްޓް ސާޖަރީގެ ޚާއްޞަ ޑޮކްޓަރު، ޑރ. އަރްޖުން މައްލާއެވެ. އެ މަސައްކަތުގައި ޑރ. ޢަބްދުއްޞަމަދު މެމޯރިއަލް ހޮސްޕިޓަލުގެ ކްލިނިކަލް ޓީމުން ބައިވެރިވެ، ބޭނުންވާ ފެސިލިޓީތަކާއި އެހެނިހެން އެހީތެރިކަން ވަނީ ފޯރުކޮށްދީފައެވެ.
ކޭމްޕުގެ ތެރެއިން އުމުރުން ދުވަސްވީ 9 މީހެއްގެ ކެޓަރެކްޓް ސާޖަރީ ކާމިޔާބުކަމާއެކު ވަނީ ފުރިހަމަކޮށްފައެވެ. މީގެ އިތުރުން، ކުރިން ރަޖިސްޓްރީވި ފަރާތްތަކާއި އާންމުން ހިމެނޭހެން ޑޮކްޓަރުގެ ކޮންސަލްޓޭޝަން އަދި ލޮލުގެ ނަންބަރު ޗެކްކުރުމުގެ (ރިފްރެކްޝަން) ޚިދުމަތް ވެސް ވަނީ ފޯރުކޮށްދީފައެވެ. އަދި އޮޕަރޭޝަން ކުރެވުނު ހުރިހާ ފަރާތްތަކަށް އޮޕަރޭޝަނަށްފަހު ބޭނުންވާ މުހިންމު އިރުޝާދުތަކާއި ބޭސް ވަނީ ހިލޭ ފޯރުކޮށްދީފައެވެ.
އެ ކޭމްޕާއެކު ސާޖަރީ ހެދި އުމުރުން ދުވަސްވީ ފަރާތްތަކަށް ފަރުވާ ހޯދުމަށްޓަކައި ރަށުން ބޭރަށް ކުރަންޖެހޭ ދަތުރުތައް ހުއްޓުމަކަށް އައިސް، އާއިލާގެ ގާތުގައި ތިބެގެން ލުއިފަސޭހަކަމާއެކު ފަރުވާ ލިބިގެންދިޔައެވެ.
އައިކެއާ ހޮސްޕިޓަލުން ހާމަކުރި ގޮތުގައި، ރާއްޖޭގެ އެކި ކަންކޮޅުތަކަށް ފެންވަރު ރަނގަޅު ލޮލުގެ ފަރުވާ ފޯރުކޮށްދިނުމަށް އެހެން ފަރާތްތަކާ ގުޅިގެން މަސައްކަތް ކުރުމުގައި އެ ހޮސްޕިޓަލުން އަބަދުވެސް ދެމިއޮންނާނެއެވެ.
އޭގެ އިތުރުން، ތިނަދޫގައި އެ ކޭމްޕް ކާމިޔާބުކަމާއެކު ކުރިއަށް ގެންދިއުމަށް މަގުފަހި ކޮށްދެއްވިކަމަށްޓަކައި އޭޖްޑް ކެއާ މޯލްޑިވްސް، އެޓްމޮސްފިއަރ ފައުންޑޭޝަން އަދި ޑރ. ޢަބްދުއްޞަމަދު މެމޯރިއަލް ހޮސްޕިޓަލުގެ ޓީމަށް އައިކެއާއިން ވަނީ ޚާއްސަ ޝުކުރެއް އަދާކޮށްފައެވެ.
