މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ކޮންގްރެސް އިފުތިތާހުކުރުމަށް ބާއްވާ ޖަލްސާއަށް ވެރިކަންކުރާ ޕާޓީ ޕީއެންސީގެ ފަރާތުން އެ ޕާޓީގެ ނައިބު ރައީސް އަދި ފިޝަރީޒް މިނިސްޓަރު އަޙްމަދު ޝިޔާމް ވަޑައިގެންފިއެވެ.
އެމްޑީޕީގެ ކޮންގްރެސް އިފުތިތާހުކުރާ ޖަލްސާގައި ޝިޔާމް ޕީއެންސީގެ ފަރާތުން ބައިވެރިވެވަޑައިގަންނަވާއިރު، ޕީއެންސީގެ ކޮންގްރެސް ފެށުމުގެ ރަސްމިއްޔާތުގައި އެމްޑީޕީގެ ފަރާތުން ބައިވެރިވެވަޑައިގަތީ އެ ޕާޓީގެ ޗެއާޕާސަން އަދި ކުރީގެ ރައީސް މުޙައްމަދު ނަޝީދެވެ.
މީގެ ކުރިން ވެސް އެގޮތަށް ބޭއްވޭ އެކިއެކި ކޮންގްރެސްތަކުގައި ބައިވެރިވުމަށް އިދިކޮޅުގެ ލީޑަރުންނަށް ދައުވަތު އަރުވާކަން ފާހަގަކުރެވެއެވެ. ފާހަގަކުރެވޭ ގޮތުގައި އިތުރު ލީޑަރުންނަށްވެސް އެޕްޑީޕީގެ ކޮންގްރެސްގައި ބައިވެރިވެވަޑައިގަތުމަށް ވަނީ ދައުވަތު އަރުވާފައެވެ.
އެމްޑީޕީގެ ކޮންގްރެސް ރަސްމީކޮށް މިރޭ ފަށާފައިވާއިރު މި މަހުގެ 3 ވާ އާދިއްތަ ދުވަހުގެ ނިޔަލަށް އެ ކޮންގްރެސް ކުރިއަށްދާނެއެވެ. ޕާޓީގެ ކޮންގްރެސް ޖަލްސާ ޝަރަފުވެރިކޮށްދެއްވީ، އެ ޕާޓީގެ ޗެއާޕާސަން އަދި ކުރީގެ ރައީސް މުޙައްމަދު ނަޝީދެވެ.
އެމްޑީޕީގެ ކޮންގްރެސް މިރޭ ހުޅުވުމަށްފަހު މާދަމާ މެންދުރުފަހުން ފެށިގެން ރޭގަނޑަށް ބޭއްވުމަށް ހަމަޖެހިފައިވަނީ އިންވެސްޓްމަންޓް ފޯރަމެވެ. އިންވެސްޓްމެންޓް ފޯރަމް ފަށަން ހަމަޖެހިފައިވަނީ މާދަމާ މެންދުރު ފަހު 14:00 ގައެވެ. ކައުންސިލްތަކުން ހުށަހަޅާ މަޝްރޫއުތަކަށް އިންވެސްޓަރުން ހޯދަން ބާއްވާ އެ ފޯރަމްގައި ވެސް ރައީސް ނަޝީދު ވާހަކަ ދައްކަވާނެއެވެ.
ކޮންގްރެސްގެ މައިގަނޑު މަސައްކަތްތައް ފަށަން ހަމަޖެހިފައިވަނީ ހޮނިހިރު ދުވަހުގެ ހެނދުނުއެވެ. އެ ދުވަހު ޕާޓީގެ އަސާސީ ގަވައިދަށް ހުށަހަޅާ އިސްލާހުތަކަށް ބަހުސްކޮށް، ވޯޓަށް އަހާނެއެވެ.
