އިސްލާމީ ކަންތައްތަކާއި އައުޤާފާ ބެހޭ ވުޒާރާއިން ކޮންމެ އަހަރަކު ވެސް ސިލްސިލާކޮށް ބާއްވަމުން އަންނަ ”މަޢުރިފާ“ ފޮތް މައުރަޒު އިސްލާމީ މަރުކަޒުގެ ޖަލްސާކުރާ މާލަމުގައި ރަސްމީކޮށް ފަށައިފިއެވެ.
މިމަހުގެ 1 އިން 3ގެ ނިޔަލަށް ކުރިއަށްދާ މި މައުރަޒު އިފްތިތާހުކޮށްދެއްވީ މިނިސްޓަރ އޮފް ސްޓޭޓް ފޮރ އިސްލާމިކް އެފެއާޒް އެންޑް އެންޑައުމަންޓްސް ޑރ. މޫސާ އަންވަރު ހަސަންއެވެ.
އެ މައުރަޒު ކުރިއަށްދާނީ ކޮންމެ ދުވަހެއްގެ ވެސް ހަވީރު 16:00 އިން 18:00 އަށް އަދި ރޭގަނޑު 20:00 އިން 22:00 އަށެވެ.
މައުރަޒުގައި ޖުމްލަ 22 ފަރާތަކުން ބައިވެރިވާއިރު އޭގެ ތެރޭގައި ރާއްޖޭގެ ބޮޑެތި ބުކްޝޮޕްތަކުގެ އިތުރުން ޖަމްއިއްޔާ ޖަމާއަތްތަކާއި، މުއައްސަސާތަކާއި އަދި އަމިއްލަ ފޮތް ލިޔުންތެރިން ހިމެނެއެވެ.
މި ފަހަރުގެ މައުރަޒަށް ގެނެވުނު މުޅިން އައު އަދި ހާއްސަ އެއް ކަމަކީ، ލިޔުންތެރިންގެ ތަޖުރިބާ ހިއްސާކުރުމަށް ހާއްސަކޮށްގެން ހަދާފައިވާ ”ކޯނަރ“ އެވެ. މި ކޯނަރގެ މައިގަނޑު މަގްސަދަކީ ލިޔުންތެރިންގެ ފޮތްތަކާ ގުޅޭ ތަޖުރިބާތައް އާންމުންނާ ހިއްސާކޮށް، ޒުވާން ޖީލުގެ ހިތްތަކުގައި ލިޔުންތެރިކަމާއި ފޮތް ކިޔުމަށް ލޯބި ޖެއްސުމެވެ. އެގޮތުން އެ ކޯނަރގައި ޑރ. އާމާލް އަލީގެ ފޮތް ހުށަހެޅުއްވުމުގެ ހާއްސަ ސެޝަނެއް ވެސް ކުރިއަށްދާނެއެވެ.
މީގެ އިތުރުން، މައުރަޒަށް ޒިޔާރަތްކުރާ ފަރާތްތަކުގެ މެދުގައި ޝައުގުވެރިކަން އިތުރުކުރުމުގެ ގޮތުން ކޮންމެ ދުވަހަކު ވެސް ނަސީބުވެރި އެއް ފަރާތަކަށް 1،000 (އެއްހާސް) ރުފިޔާގެ ފައިސާގެ އިނާމެއް ދިނުމަށް ވަނީ ހަމަޖެހިފައެވެ. ގުރުއަތުލުން އޮންނާނީ ކޮންމެ ރެއެއްގެ 22:00 ގައެވެ.
