އެމްޑީޕީގެ ކޮންގްރެސްގެ ތެރެއިން ކައުންސިލުތަކުގެ މަޝްރޫއުތަކަށް ބޭނުންވާ އިންވެސްޓްމެންޓް ހޯދުމަށް ކުރިއަށް ގެންދާ ރަށްވެހި ތަރައްގީ އިންވެސްޓްމެންޓް ފޯރަމްގައި އައްޑޫ ސިޓީ ކައުންސިލުން 8 މަޝްރޫއަކަށް އިންވެސްޓަރުން ހޯދަން ހުޅުވާލައިފިއެވެ.
އައްޑޫގައި ހިންގަން 8 މަޝްރޫއެއް އައްޑޫ ސިޓީގެ މޭޔަރު އަލީ ނިޒާރު ހުށަހެޅުއްވިއިރު، އެ ޕްރޮޖެކްޓުތަކަށް ޖުމްލަ 119 މިލިއަން ރުފިޔާ އާއި 158 މިލިއަން ރުފިޔާއާ ދެމެދުގެ އަދަދަކަށް އިންވެސްޓްމެންޓް ބޭނުންވާކަމަށް މޭޔަރުގެ ޕްރެޒެންޓޭޝަންގައި ވިދާޅުވެފައިވެއެވެ.
އެ މަޝްރޫއުތަކަކީ:
- އައްޑޫ ސިޓީ ނޭޗާ ޕާކްގައި 6-10 އީކޯ ސްޓޭ ޔުނިޓް ގާއިމްކޮށް، އެތަނުގައި ވަކި ސަރަހައްދެއް ކޮމާޝަލް ޒޯނެއްގެ ގޮތުގައި ތަރައްގީކުރުމުގެ މަޝްރޫއު: އެ މަޝްރޫއަށް ބޭނުންވަނީ 3-6 މިލިއަން ރުފިޔާގެ އިންވެސްޓެމެންޓެއް
- ކޮންވެންޝަން ސެންޓަރާއި ހޮޓެލްގެ މަޝްރޫއު: 50 ކޮޓަރި ހިމެނޭ ގޮތަށް އިވެންޓްހޯލްތަކާއެކު ތަރައްގީކުރެވޭނެ އެ ސެންޓަރަށް 15-20 މިލިއަން ރުފިޔާގެ އިންވެސްޓެމެންޓެއް ބޭނުންވޭ
- ރެންޓަލް ޔުނިޓްތަކާއި އެކްޓިވިޓީތަކާއި ކާނާގެ ވިޔަފާރިތަކާއެކު ފޭދޫ ދިގިރަށް ޕަބްލިކް ބީޗު ތަރައްގީކުރުން: އެ މަޝްރޫއަށް 1-3 މިލިއަން ރުފިޔާގެ އިންވެސްޓެމެންޓެއް ބޭނުންވޭ
- ހިތަދޫގެ ކުރީގެ މީޑީއާ ސެންޓަރު ސަރަހައްދުގައި މިއުޒިއަމް އެންޑް ކަލްޗުރަލް ހެރިޓޭޖު ސެންޓަރުގެ ގާއިމްކުރުމުގެ މަޝްރޫއު: އެ މަޝްރޫއަށް 2-3 މިލިއަން ރުފިޔާގެ އިންވެސްޓްމެންޓެއް ބޭނުންވޭ
- ހޯމް ސޯލާ އެންޑް ބެޓަރީ ޕްރޮގްރާމް: އައްޑޫގައި ވިޔަފާރީގެ އުސޫލުން އެ ހިދުމަތް ފޯރުކޮށްދީ، 50-75 މިލިއަން ރުފިޔާގެ އާމްދަނީއެއް ހޯދިދާނެ
- ވާރޭފެން ރައްކާކުރުމުގެ މަޝްރޫއު: ދަނޑުވެރިކަމާއި ކުއްލި ހާލަތްތަކަށް ފެން ރައްކާކުރެވޭ ނިޒާމެއް ގޭގޭގައި ގާއިމްކުރުމުގެ މަޝްރޫއަކަށް 45 މިލިއަން ރުފިޔާގެ އިންވެސްޓްމެންޓެއް ބޭނުންވޭ
- ކްލައިމެޓް ޗޭންޖް އެންޑް މެރިން ރިސާޗް ފެސިލިޓީ: ފަރުތަކާއި، ކުޅިތަކާއި ތިމާވެށީގެ ދިރާސާތައް ހެދުމަށް އެ މަރުކަޒު ގާއިމްކުރުމަށް 2.5-5 މިލިއަން ރުފިޔާގެ އިންވެެސްޓްމެންޓެއް ބޭނުންވޭ
- ގްރީން ވޭސްޓް ކޮމްޕޮޒިޓިން ފެސިލިޓީ: އައްޑޫގައި އުފައްދާ ކުނީގެ ތެރެއިން ގްރީން ވޭސްޓް ކޮމްޕޮސްޓުގެ ގޮތުގައި ދަނޑުވެރިންނަށާއި ރިސޯޓުތަކަށް ދޫކުރުމުގެ މަޝްރޫއެއް 0.8-1.2 މިލިއަން ރުފިޔާގެ އިންވެސްޓްމެންޓެއް ބޭނުންވޭ
މޭޔަރު އަލީ ނިޒާރު ވިދާޅުވީ، އެ މަޝްރޫއުތަކަށް ބޭނުންވާ ބިންތައް ކައުންސިލުން ފޯރުކޮށްދޭނެ ކަމަށާއި ވެވެން ހުރި ހުރިހާ އެހީތެރިކަމެއް ދެމުން ގެންދާނެ ކަމަށެވެ.
އެ މަޝްރޫއުތައް ހުށަހެޅުމުން، ސުވާލުކުރަން ދިން ފުރުސަތުގައި އެމްޑީޕީގެ ޗެއާޕާސަން، ރައީސް މުހައްމަދު ނަޝީދު ވަނީ، އެ 8 ޕްރޮޖެކްޓަށް އެމްޑީޕީގެ ޕްރޮޖެކްޓް އޮފީހުން އިންވެސްޓްމެންޓް ހޯދައިދެވޭނެ ކަމަށެވެ. އަދި އައްޑޫ ސިޓީން ހުށަހަޅާފައިވަނީ ވަރަށް ރަނގަޅު 8 ޕްރޮޖެކްޓުތަކެއް ކަމަށް ވިދާޅުވިއެވެ.
