ރަސްމާލެ ތަރައްޤީކުރުމަށް ޔޫއޭއީގެ އީގަލް ހިލްސް ކުންފުންޏާއެކު ސަރުކާރުން ކުރިއަށްގެންދާ 20 ބިލިއަން ޑޮލަރުގެ ބޮޑު މަޝްރޫޢު، ދެކުނުގެ އެންމެ ބޮޑު އާބާދީ ކަމަށްވާ އައްޑޫ ސިޓީއަށް ގެނައުން ރަނގަޅުކަމުގެ އިޝާރާތެއް ކުރީގެ ރައީސް، އަދި އެމްޑީޕީގެ ޗެއާޕާސަން މުހައްމަދު ނަޝީދު ކުރައްވައިފި އެވެ.
ތިން ދުވަހަށް ބަހާލައިގެން ކުރިޔަށް ގެންދާ އެމްޑީޕީގެ ކޮންގްރެސްގެ ތެރެއިން މިއަދުގެ ސެޝަންއެއްގެ ގޮތުގައި ކުރިޔަށް ގެންގޮސްފައި ވަނީ ”ރަށްވެހި ތަރައްގީ – އިންވެސްޓްމަންޓް ފޯރަމް“ އެވެ. ކައުންސިލްތަކުން ހިންގުމަށް ގަސްދު ކުރާ ޕްރޮޖެކްޓުތަކުގެ ތަފްސީލުތައް ޕްރެޒެންޓޭޝަންއެއްގެ ގޮތުގައި ވަނީ ހުށަހަޅާފަ އެވެ.
އެގޮތުން އައްޑޫ ސިޓީ ކައުންސިލުން ވެސް ވަނީ 100 މިލިއަން ޑޮލަރުގެ އެކި މަޝްރޫއުތައް ކުރިޔަށް ގެންދިއުމަށް އެކަމުގެ ތަފަސީލުތައް ހުށަހަޅުއްވާފަ އެވެ.
މިއަދު ކުރިޔަށް ގެންދިޔަ މި ޕްރެޒެންޓޭޝަންތަކުގައި، އައްޑޫ ސިޓީ މޭޔަރު އަލީ ނިޒާރުގެ ހުށަހެޅުން ނިމުމާއި އެކު ރައީސް ނަޝީދު ސުވާލު ކުރެއްވީ އީގަލްސް ހިލްސް ޕްރޮޖެކްޓާއި ގުޅޭގޮތުންނެވެ. އެގޮތުން އެ ކުންފުނިން އައްޑޫގައި އިންވެސްޓްކުރަން ތައްޔާރުވެއްޖެ ހާލަތެއްގައި ސިޓީ ކައުންސިލާއި ރައްޔިތުންގެ ވިސްނުން ހުންނާނެކަމަށް ނިޒާރު ގަބޫލު ކުރާ ގޮތް އެއްސެވި އެވެ.
ޖަވާބުގައި ނިޒާރު ވިދާޅުވީ، ރަސްމާލޭގައި މިހާރު އެ ޕްރޮޖެކްޓު ކުރިޔަށް ގެންދަން ރޭވިފައިވާ ގޮތަށް އޭނާ އެއްވެސް ތާއީދެއް ނުކުރާކަމަށެވެ. އެއަށްފަހު ރައީސް ނަޝީދު ސުވާލު ކުރެއްވީ، އައްޑޫއަށް އެ އިންވެސްޓްމަންޓު ގެންނަން ތާއީދުތޯ އެވެ.
އަޅުގަނޑުގެ ސުވާލު ވަރަށް ތަފާތު، މިސާލަކަށް އީގަލްސް ހިލްސްއިން އެ ޕްރޮޖެކްޓު އައްޑޫއަށް ގެންނަން އެ ކުންފުނިން އެއްބަސްވެއްޖެއްޔާ ކިހިނެއްބާ ސިޓީ ކައުންސިލާއި އައްޑޫ ރައްޔިތުން ދެކޭނީ..
ނިޒާރު ވިދަޅުވީ ރައްޔިތުންނަށް މައުލޫމާތުތައް ހާމަވެ، ދެ ފުށް ފެންނަ ގޮތަކަށް ކަންކަން ސާފުވެ ކުރިޔަށް ގެންދާ ޕްރޮޖެކްޓުތަކަށް ތާއީދު ކަމަށެވެ. އަދި އައްޑޫއަށް ބޭނުން ވަނީ އިތުބާރު އޮތް އިންވެސްޓްމަންޓުތަކެއްކަމަށް ނިޒާރު ވިދާޅުވި އެވެ.
މިހާރު އޮތް ގޮތަށް ގެންދަން ތާއީދެއް ނޫން.. ދެ ފުަށްފެންނަ ގޮތަށް އައްޑުއަށް ގެންނަޏާމު ހަމަ މަރުހަބާ..މަރުހަބާ ކިޔާނަން އެއްވެސް މައްސަލައެއް ނެތް
ރައީސް ނަޝީދު ދެން ސުވާލު ކުރެއްވީ އައްޑުއަށް މި ޕްރޮޖެކްޓު ގެނައުމަށް އެމްޑީޕީން ވަކާލާތު ކުރުމަށް ކައުންސިލުން ބޭނުންވޭތޯ އެވެ. ނުވަތަ އެމްޑީޕީން އީގަލްސް ހިލްސްގައި އެކަމަށް ލޮބީ ކުރުމަށް އެއްބަސްވޭތޯ އެވެ. ޖަވާބުގައި ނިޒާރު ވިދާޅުވީ އެކަމަށް ހުރަހެއް ނެތްކަމަށެވެ. އެއާއި އެކު އެމަނިކުފާނު ވިދާޅުވީ، އެ ކުންފުނި އައްޑުއަށް އަންނާނެ ކަމަށެވެ.
އީގަލްސް ހިލްސްގެ ޕްރޮޖެކްޓާއި ގުޅޭގޮތުން ރައީސް ނަޝީދު މީގެ ކުރިން ވެސް ގޮވާލީ އެއްބަސްވުން އާންމު ކުރުމަށެވެ. އަދި އެމަނިކުފާނުގެ މައިގަނޑު ކަންބޮޑުވުމަކީ، މި އިންވެސްޓްމަންޓު މާލެ ސަރަހައްދުގައި ކުރުމެވެ.
