އެމްޑީޕީގެ ރައީސާއި، ނައިބު ރައީސްގެ މަގާމު އުވާލައި ޗެއާޕާސަނަކީ އެންމެ އިސް މަގާމުކަމުގައި ހެދުމަށް ތާއީދު ކުރައްވާކަމަށް ކުރީގެ ޑިފެންސް މިނިސްޓަރ މާރިޔާ އަހުމަދު ދީދީ ވިދާޅުވެއްޖެ އެވެ.
މިއަދު ކުރިޔަށް ގެންދާ އެމްޑީޕީގެ ކޮންގްރެސްއަށް ހުށަހަޅާފައިވާ އިސްލާހުތަކުގެ ތެރޭގައި ޕާޓީގެ ރައީސާއި، ނައިބު ރައީސްގެ މަގާމު އުވާލައި ޕާޓީގެ އެންމެ އިސް މަގާމަކީ ޗެއާޕާސަންކަމަށް ބަދަލު ގެނައުމެވެ.
އެމްޑީޕީގެ ޗެއާޕާސަންގެ މަގާމުވެސް އަދާކުރެއްވި މާރިޔާ އިސްލާހުގެ ބަހުސްގައި ވިދާޅުވީ، މީގެކުރިން ވެސް ބޭއްވި އެކި ކޮންގްރެސްތަކުގައި ޕާޓީގައި އެއް މަގާމެއް އޮތުމަށް ގިނަ ބަޔަކު ތާއީދުކޮށް ވާހަކަ ދެއްކި ކަމަށެވެ. އަދި ”އެއް އުރައިގައި ދެ ކަނޑިއަށް ނޯވޭނެ“ ކަމަށް ވިދާޅުވެ، މިގޮތަށް ޕާޓީގެ އިދާރީ ހިންގުން ހަރުދަނާކުރުމަށް މާރިޔާ ވެސް ތާއީދު ކުރެއްވި އެވެ.
މީގެ އިތުރުން ޕާޓީގެ ޖެނެރަލް މެންބަރުން ގިނަކުރުމަށާއި، އަންހެނުން ޕާޓީގެ ލީޑަޝިޕް މަގާމުތަކުގައި ބައިވެރިކުރުމަށް މާރިޔާ ތާއީދު ކުރެއްވި އެވެ. މާރިޔާ ވިދާޅުވީ އިންތިހާބުތަކުގައި ވޯޓަށް މަސައްކަތްކުރުމުގައި އެންމެ ބުރަކޮށް ނިކުންނަނީ އަންހެނުން ނަމަވެސް، މަގާމުތަކަށް ކުރިމަތިލާ ހިސާބުން އެ މީހުންނަށް އޮންނަ ފުރުސަތުތައް މަދުވަކަމަށެވެ.
މީގެއިތުރުން މާރިޔާ ވަނީ ޕާޓީގައި ވަކި މުއްދަތަކަށް ހިދުމަތް ކުރެވިފައިވާ ފަރާތްތަކަށް ނޫނީ، މަގާމުތަކަށް ކުރިމަތި ނުލެވޭ ގޮތަށް އެމްޑީޕީގެ ޕާލިމަންޓްރީ ގުރޫޕްގެ ލީޑަރު އިބްރާހިމް ނާޒިލް ހުށަހެޅުއްވި އިސްލާހަށް ތާއީދު ކުރައްވާފަ އެވެ.
އެހެންކަމުން ފައްޔާޒްގެ އިތުރުން، ނާޒިލްގެ އިސްލާހުތަކަށް ތާއީދު ކުރާކަމަށް މާރިޔާ ވިދާޅުވި އެވެ. މާރިޔާ ތާއިދު ކުރެއްވި އިސްލާހުގައި ނާޒިލް ވިދާޅުވީ، ޕާޓީގެ އެތެރޭގެ އިންތިހާބުތަކަށް ބޭބޭރު ޕާޓީތަކުން ގިނަ އަދަދަކަށް މީހުން ވަދެ ނިކުމެ، އިންތިހާބުގެ ނަތީޖާއަށް ބޮޑުތަނުން ބަދަލުތައް އަންނަ ވާހަކައަކީ، ޕާޓީގެ ތެރޭގައި އަބަދުވެސް ދެކެވޭ ވާހަކައެއް ކަމަށެވެ. މިކަމަށް ރަނގަޅު ހައްލުތަކެއް ހޯދުމުގެ ގޮތުން ޕާޓީގެ ގަވާއިދުގެ 105 ވަނަ މާއްދާއަށް އިސްލާޙެއް ހުށަހެޅުމަށް ނިންމެވީކަމަށް ނާޒިލް ވިދާޅުވި އެވެ.
ނާޒިލް ފާހަގަކުރެއްވި ގޮތުގައި، 2023 ވަނަ އަހަރުގެ އިންތިހާބަށް ބޭއްވި އެމްޑީޕީގެ ރިޔާސީ ޕްރައިމަރީގައި ވަރަށް ބޮޑު އިލްޒާމެއް އޭރުގެ ޗެއާޕާސަންގެ ބޮލުގައި އެޅުވުނެވެ. އެއީ ވޯޓާ ކައިރިކޮށް ގާތްގަނޑަކަށް 29,000 މެމްބަރުން ޕާޓީއިން ވަކިކުރިކަމުގެ ތުހުމަތެވެ. ނާޒިލް ވިދާޅުވި ގޮތުގައި، ރިޔާސީ އިންތިހާބު އެމްޑީޕީއަށް ނާކާމިޔާބުވި އެއް ސަބަބަކީ މިއީ އެވެ.
މިފަދަ މައްސަލަތައް ދިމާވަނީ ޕާޓީގެ އަސާސީ ގަވައިދުގައި ކަންކަން ސާފުކޮށް ލިޔެވިފައި ނެތުމުގެ ސަބަބުންކަން ފާހަގަކުރައްވައި ނާޒިލް ވިދާޅުވީ އޭނާ ހުށަހަޅާ އިސްލާހަކީ، ޕާޓީއަށް ވަދެފައި ތިންމަސް ދުވަސް ހަމަވެފައި ނުވާ ފަރާތްތަކަށް ޕާޓީގެ އެތެރޭގެ އިންތިހާބުތަކުގައި ވޯޓު ނުލެވޭ ގޮތަށް ބަދަލު ގެނައުން ކަމަށެވެ.
