ދިވެހި ވަތަނީ ހިދުމަތުގެ ފަންނީ ތަމްރީނު ޕްރޮގްރާމުގެ ދެވަނަ ބުރު ކާމިޔާބުކަމާއެކު ފުރިހަމަކޮށް، ރާއްޖޭގެ އެކި ކަންކޮޅުތަކަށް ނިސްބަތްވާ 73 ޒުވާނަކު ސަނަދު ހާސިލުކޮށްފިއެވެ.
މިއަދު ނިމުނު ބެޗުގެ ދަސްވެނިންނާއެކު މިހާތަނަށް ޖުމުލަ 136 ދަރިވަރުން ވަނީ ނޭޝަނަލް ސަރވިސް ސްކިލް ޓްރެއިނިންގ ފުރިހަމަކޮށްފައެވެ. އަދި ނޭޝަނަލް ސަރވިސް ސްކިލް ޓްރޭނިންގ ތިންވަނަ ބެޗު މި މަހުގެ މެދު ތެރޭގައި ފެށުމަށް އަންނަނީ ތައްޔާރުވަމުންނެވެ.
މިދިޔަ ޖޫން މަހުގެ 3 ވަނަ ދުވަހުން ފެށިގެން ސޯޅަ ހަފުތާގެ މުއްދަތަށް ހިންގި ކޯހުގައި 17 އަތޮޅަކުން ޖުމްލަ 75 ކުދިން ބައިވެރިވިއިރު، އޭގެ ތެރެއިން 73 ކުދިން ވަނީ ތަމްރީނުތައް ފުރިހަމަކޮށް ދަސްވެނިވެފައެވެ. ސަނަދު ހާސިލުކުރި ދަރިވަރުންގެ ތެރޭގައި ހިމެނެނީ 60 ފިރިހެން ދަރިވަރުންނާއި 13 އަންހެން ދަރިވަރުންނެވެ.
ސިފައިންގޭގެ ތަޖުރިބާކާރު ފަންނީ މުދައްރިބުންގެ ބެލުމުގެ ދަށުން ކުރިއަށް ގެންދިޔަ އެ ކޯހުގައި މައިގަނޑު ގޮތެއްގައި އުނގަންނައިދީފައި ވަނީ ތަފާތު ސިނާއީ މަސައްކަތްތަކަށް ބޭނުންވާ މުހިންމު ހުނަރުތަކެވެ.
އެ ތަމްރީނުގެ ތެރެއިން އޮޓޯ މޯބައިލް އިންޖިނިއަރިންގއާއި، މެރިން އިންޖިނިއަރިންގއާއި، އިލެކްޓްރީޝަންއާއި، ރެފްރިޖެރޭޝަން އެންޑް އެއަރ ކަންޑީޝަންއާއި، ވެލްޑިންގއާއި، މެޓަލް ފެބްރިކޭޝަން އަދި އޮފީސް މެނޭޖުމަންޓް ފަދަ ސިނާއީ ދާއިރާތަކުގެ ހުނަރުތައް، އުނގަންނައިދިނުމަށް ވަނީ ހަމަޖެހިފައިއެވެ.
އެ ފަންނީ ތަމްރީނަކީ ނޭޝަނަލް ސަރވިސްގެ އަސާސީ ތަމްރީނު ނިންމާ ޒުވާނުންނަށް ހާއްސަކޮށްގެން ކުރިއަށް ގެންދާ ޕްރޮގްރާމެކެވެ. ފާއިތުވި ނުވަ މަސްދުވަހުގެ ތެރޭގައި އެ ޕްރޮގްރާމުގެ ތެރެއިން ޖުމްލަ 136 ޒުވާނުން ވަނީ ތައުލީމާއި ހުނަރު ހޯދާފައެވެ. އަދި އެ ޕްރޮގްރާމުގެ ތިންވަނަ ބުރު މި ހިނގާ މަހުގެ 12ވަނަ ދުވަހު ފެށުމަށް މިހާރު ވަނީ ތާވަލުކުރެވިފައެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިސްނެންގެވުމަކަށް ފެށި މި ގައުމީ ހަރަކާތުގެ މައިގަނޑު އަމާޒަކީ ޒުވާނުންގެ ކިބައިގައި އިސްލާމީ ރިވެތި އަޚްލާގާއި ގައުމީ ލޯބި އަށަގެންނެވުމެވެ. ކުރިމަގުގައި ފަންނީ އިތުރު ދާއިރާތަކާއި އިންޓަރންޝިޕްގެ ފުރުސަތުތައް ވެސް އެ ޕްރޮގްރާމުގެ ތެރެއިން ތައާރަފުކުރެވިގެންދާނެ ކަމަށް ރައީސް ވަނީ ވިދާޅުވެފައެވެ. މިހާތަނަށް އެ ހަރަކާތުގެ އެކި ބުރުތަކުގައި އެއްހާހަށްވުރެ ގިނަ ދަރިވަރުން ވަނީ ބައިވެރިވެފައެވެ.
ދިވެހި ވަތަނީ ހިދުމަތަކީ ރާއްޖޭގެ ޒުވާނުންގެ މުސްތަގްބަލު ބިނާކުރުމަށްޓަކައި، ގައުމީ ރޫޙާއި އިސްލާމީ އަހްލާގު ދިރުވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ފެއްޓެވި ޕްރޮގްރާމެކެވެ. ދިވެހި ޒުވާނުންގެ މެދުގައި ގައުމިއްޔަތުގެ ރޫޙާއި ފަޚުރު ދިރުވައި އާލާކޮށް، އިސްލާމްދީނަށް ލޯބިކުރާ، އަދި ގައުމަށް ހިދުމަތްކުރުމުގެ ރޫހު ހުރި ރައްޔިތެއް ބިނާކުރުމަށް ކުރިއަށް ގެންދާ މި ޕްރޮގްރާމުގެ ދަށުން 3 ބެޗެއްގެ ތަމްރީނުތައް 1000އަށްވުރެ ގިނަ ދަރިވަރުން ވަނީ ފުރިހަމަކޮށްފައެވެ.
