ދިވެހިރާއްޖޭގައި މިހާރު އަމަލުކުރަމުންދާ ތިން ބާރު ވަކިވެފައިވާ ވެރިކަމުގެ ނިޒާމަށް އިސްލާޙީ ބޮޑެތި ބަދަލުތަކެއް ގެނައުމަށްޓަކައި ހުށަހަޅާ ބޮޑު ބަދަލުގެ ބޭނުމަކީ ބަރުލަމާނީ ނިޒާމަކަށް ފުރޮޅާލުން ނޫންކަމަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެ އެވެ.
ކޮންގްރެސްއަށް ބޮޑު ބަދަލު ހުށަހަޅައި ފައްޔާޒް ވިދާޅުވީ ރައީސުލްޖުމްހޫރިއްޔާއަށް ލިބިދީފައިވާ ބޮޑެތި ބާރުތައް ކުޑަކުރުމަށްޓަކައި އެމްޑީޕީން ހުށަހަޅާ ގަރާރުގައި، ދައުލަތާއި ސަރުކާރަކީ ވަކި ދެ އެއްޗެއްގެ ގޮތުގައި ކަނޑައަޅައި، ދައުލަތުގެ ވެރިޔަކާއި ސަރުކާރުގެ ވެރިޔަކު ވަކިން ބެހެއްޓުމަށް ހިމަނާފައިވާކަމަށެވެ. ފައްޔާޒް ވިދާޅުވީ މިއީ އެއްގޮތަކަށްވެސް ބަރުލަމާނީ ނިޒާމުގެ ވާހަކައެއް ނޫން ކަމަށެވެ. އަދި މީގެ މައިގަނޑު މަގުސަދަކީ ސަރުކާރަކީ ރައްޔިތުން ސީދާ ވޯޓުން އިންތިޚާބުކުރާ ބަޔަކަށް ހަދައި، ދައުލަތުގެ ވެރިޔާގެ ދައުރާއި ސަރުކާރުގެ ދައުރު ވަކިކޮށް، އެއް ފަރާތަކަށް ހުރިހާ ބާރެއް ޖަމާވުން ހުއްޓުވުންކަމަށް އޭނާ ވިދާޅުވި އެވެ.
ފައްޔާޒް ވިދާޅުވީ، ޤާނޫނުއަސާސީން އުންމީދުކުރި ގޮތަށް ދައުލަތުގެ ބާރުތައް ފާރަވެރިވެ، ޗެކްސް އެންޑް ބެލެންސަސް ނިޒާމު މިހާރު ހިނގަމުން ނުދާ ކަމަށެވެ. އަދި ރައްޔިތުންގެ މަޖިލީހަކީ ސަރުކާރު ޖަވާބުދާރީ ކުރުވާނެ ތަން ކަމަށް ބެލެވުނު ނަމަވެސް، މަޖިލީހުގެ ސުޕަރ މެޖޯރިޓީ ވެރިކަންކުރާ ޕީއެންސީއަށް ލިބުމުން، މުޅި ނިޒާމުގެ ބާރުތައް ވަނީ އެއް ފަރާތަކަށް ބުރަވެފައިވާކަމަށް ވިދާޅުވި އެވެ. އަދި އޭގެ ސަބަބުން ޤާނޫނުއަސާސީން ރައްޔިތުންނަށް ކަށަވަރުކޮށްދޭ ހައްގުތައް ވެރިމީހާގެ މުށުތެރެއަށް ގޮސްފައިވާކަމަށް ވަނީ ވިދާޅުވެފަ އެވެ.
މީގެއިތުރުން ސުޕްރީމް ކޯޓުގެ ފަނޑިޔާރުން ފަދަ އިސް މަގާމުތަކުގައި ތިއްބަވާ ބޭފުޅުން މަޖިލީހުގެ އަޣުލަބިއްޔަތުން ވަކިކުރެވޭ ގޮތަށް އޮތުމަކީ ޝަރުއީ ދާއިރާގެ މިނިވަންކަން ގެއްލި، ސަރުކާރުން ބޭނުންވާ ގޮތަށް ކަންކަން ނިންމުމަށް މަގުފަހިވާ ކަމެއްގެ ގޮތުގައި ފައްޔާޒް ވިދާޅުވިއެވެ. ހަމައެއާއެކު، އެންޓި ކޮރަޕްޝަން ކޮމިޝަން (އޭސީސީ) ޕީޖީ އަދި ހިއުމަން ރައިޓްސް ކޮމިޝަން (އެޗްއާރުސީއެމް) ފަދަ މިނިވަން މުއައްސަސާތަކުގެ މެންބަރުން އައްޔަންކުރުމާއި ވަކިކުރުމުގައި ރައީސުލްޖުމްހޫރިއްޔާއާއި ސަރުކާރުގެ މެޖޯރިޓީ އޮންނަ މަޖިލީހުގެ ނުފޫޒު އޮތުމަކީ އެ މުއައްސަސާތަކުގެ މިނިވަންކަން ގެއްލޭ މައިގަނޑު ސަބަބުކަމަށް ވިދާޅުވި އެވެ.
