މިނިވަން މުވައްސަސާތަކުގެ ވެރިން މަގާމުތަކުން ވަކިކުރެވޭނީ ރައްޔިތުންގެ ވޯޓަކުންކަމަށް ހަދައި، ސިޔާސީ ނުފޫޒެއްގެ ތެރޭގައި މެމްބަރުން ބަނދެވިފައި ތިބޭ ތިބުން ނިމުމަކަށް ގެންނަން ޖެހޭކަމަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް ވިދާޅުިވެއްޖެ އެވެ.
ބޮޑު ބަދަލުގެ އިސްލާހުތައް ހުށަހަޅައި ފައްޔާޒް ވިދާޅުވީ ގާނޫނުއަސީން ރައްޔިތުންނަށް ލިބިދީފައިވާ ހައްގުތައް ނިގުޅައިގަންނަމުންދާއިރު ވެސް ދައުލަތުގެ މިނިވަން މުއައްސަސާތައް ހިމޭނުން ތިބޭތީ، އެ މުއައްސަސާތަކުގެ ހިންގުމުގެ ނިޒާމަށް ބޮޑެތި ބަދަލުތަކެއް ގެންނަންޖެހޭ ކަމަށެވެ.
ފައްޔާޒް ވިދާޅުވީ، މީގެ ކުރިން ރާއްޖެ ނުދެކޭ މިންވަރަށް ދައުލަތުގެ ހައިބަތާއި، އިސްލާމްދީނާއި އަދި ކޮރަޕްޝަންގެ މައްސަލަތައް ގޯސްވެފައިވާ މި ދަނޑިވަޅުގައި، މުއައްސަސާތަކުން އެކަށީގެންވާ ފިޔަވަޅުތަކެއް ނާޅައި ދޫކޮށްލާފައިވާ ކަމަށެވެ. އަދި މި ސަބަބާއި ހުރެ އެހެން މިނިވަން މުވައްސަސާތަކުގެ މިނިވަންކަން ކަށަވަރުކުރުމަށްޓަކައި، މުޅި ނިޒާމަށް ބޮޑު ބަދަލެއް ގެނައުމަށް މަޖުބޫރުވެފައިވާކަމަށް ވިދާޅުވި އެވެ.
ފައްޔާޒް ވިދާޅުވީ ދައުލަތުގެ ބޮޑެތި ނިންމުންތައް ނިންމުމުގައި، ވީހާވެސް ބޮޑަށް ރައްޔިތުންގެ ހިޔާލާއި ބައިވެރިވުން އޮންނަން ޖެހޭ ކަމަށެވެ. އެހެންކަމުން ވަރަށް ގިނަ ކަންކަން ރައްޔިތުންގެ ފެންނަ ނުފެންނަ ވޯޓަކަށް ގެންދަންޖެހޭކަން ފާހަގަކުރައްވައި ވިދާޅުވީ ސުޕްރީމް ކޯޓުގެ ފަނޑިޔާރުން ވަކިކުރުމުގެ މަރުހަލާ އިސްލާހުކުރަން ޖެހޭ ކަމަށެވެ.
އެގޮތުން ބޮޑު ބަދަލުގެ ތެރެއިން ފައްޔާޒް ހުށަހެޅުއްވި ގޮތުގައި، ސުޕްރީމް ކޯޓުގެ ފަނޑިޔާރަކު ވަކިކުރުމަށް ރައްޔިތުންގެ މަޖިލީހުން ނިންމާ ނިންމުންތަކަކީ ސީދާ ރައްޔިތުންގެ ތާއީދާއި ރުހުން އޮވެގެން ނިންމޭ ނިންމުމަކަށް ބަދަލު ކުރަން ޖެހެ އެވެ. އަދި އެގޮތަށް ބަދަލުކުރުމުން ފަނޑިޔާރުންނަށް ސިޔާސީ ނުފޫޒުން އެއްކިބާވެ، ފުރިހަމަ މިނިވަންކަމާއެކު މަސައްކަތް ކުރުމުގެ ޖާގަ ލިބިގެންދާނެކަމަށް އޭނާ ވިދާޅުވި އެވެ.
ފައްޔާޒް ވިދާޅުވީ އެ ބަދަލުގެ ނަތީޖާއެއްގެ ގޮތުން މަޖިލީހުގެ މެންބަރުންގެ ސިޔާސީ ބޭނުމަކަށް ފަނޑިޔާރުން ވަކިކުރުމުގެ ފުރުސަތު ހަނިވެގެންދާނެ ކަމަށެވެ. އަދި ފަނޑިޔާރުންނަށް ވެސް ވަކި މައްސަލައެއް ބައްލަވާތީ، ނުވަތަ ހުކުމެއް ނެރުނު ގޮތަކުން މަގާމު ގެއްލިދާނެކަމުގެ ބިރެއް ނޯންނާނެކަމަށެވެ.
ފައްޔާޒް ވިދާޅުވީ މިއީ އަދުލު އިންސާފު ގާއިމުކޮށް، ދައުލަތުގެ ބާރުތައް އެއީ ވަކިވެފައިވާ ނިޒާމަކަށް ބަދަލު ކުރުމަށްޓަކައި އެޅިގެންދާ ފިޔަވަޅެއް ކަމަށެވެ.
