ރައްޔިތުންގެ މަޖިލީހުގެ މެޖޯރިޓީ ބޭނުންކޮށްގެން ސަރުކާރުން ފާސްކުރި ބިނާވެށި ޕްލޭންކުރުމާއި ހިންގުމުގެ ގާނޫނަކީ ލާމަރުކަޒީ ނިޒާމަށް ދިން ވަރަށް ބޮޑު ހަމަލާއެއް ކަމަށާއި، އެ ގާނޫނުގެ ސަބަބުން ކައުންސިލްތަކަށް ލިބިފައިވާ ބިމާ ބެހޭ ގާތްގަނޑަކަށް ހުރިހާ އިހުތިޔާރެއް ނިގުޅައިގެންފައިވާކަމަށް އެމްޑީޕީގެ ލާމަރުކަޒީ ކޮމިޓީގެ މުގައްރިރު އަދި ރައްޔިތުންގެ މަޖިލީހުގެ ހުޅުމާލެ ދާއިރާގެ ކުރީގެ މެންބަރު އަލީ ނިޔާޒް ހުށަހަޅުއްވައިފިއެވެ.
ރައްޔިތުންގެ މަޖިލީހުގެ ސުޕަ މެޖޯރިޓީ ބޭނުންކޮށްގެން ސަރުކާރުން އަވަސް އަރުވާލައިގެން ފާސްކުރި ބިނާވެށި ޕްލޭންކުރުމާއި ހިންގުމުގެ ގާނޫނަށް ފާޑުކިއުން އަމާޒު ކުރައްވައި ނިޔާޒް ވިދާޅުވީ އެ ގާނޫނުގެ ސަބަބުން ލާމަރުކަޒީ ގާނޫނުން ކައުންސިލްތަކަށް ލިބިދީފައިވާ ބިމާ ބެހޭ ގާތްގަނޑަކަށް ހުރިހާ ބާރުތަކެއް އަތުލައި މަރުކަޒީކޮށްފައިވާ ކަމަށެވެ. އަދި އަތޮޅު ކައުންސިލްތަކަށް ބާރުތައް ނުދިނުމަކީ ކުރީން ވެސް ހެދުނު ގޯހެއް ކަމަށާއި، އެކަމުގެ ނާޖާއިޒު ފައިދާ ނަގައިގެން ސަރުކާރުން އަތޮޅު ކައުންސިލްތައް އުވާލަން މަސައްކަތް ކުރަމުންދާކަމަށް ތުހުމަތު ކުރެއްވިއެވެ.
ނިޔާޒް ވިދާޅުވީ ރަށްރަށާއި އަތޮޅުތަކުގެ އިހުތިސާސް ކަނޑައެޅުމުގެ ބާރު ސީދާ ގާނޫނުއަސާސީގައި ލިޔަން ޖެހޭ ކަމަށެވެ. އޭރުން އަންނަ ކޮންމެ ސަރުކާރަކަށް ފަސޭހައިން ގާނޫނު ބަދަލުކޮށްގެން ކައުންސިލްތަކުގެ ބާރުތައް ނިގުޅައިނުގަނެވޭނެސކަމަށް އޭނާ ވިދާޅުވިއެވެ. އަދި ފަޅުރަށްތަކާއި ވަސީލަތްތައް ދިނުމުގައި އަތޮޅު ކައުންސިލްތަކުގެ ހަގީގީ މަޝްވަރާ ހޯދަން ލާޒިމުކުރަން ޖެހޭކަމަށް ވަނީ ވިދާޅުވެފަ އެވެ.
ނިޔާޒް ފާހަގަކުރެއްވި ގޮތުގައި، ލާމަރުކަޒީ ގާނޫނުގެ ދަށުން ރަށްރަށުގެ ބިމާ ބެހޭގޮތުން ކައުންސިލްތަކަށް ލިބިދީފައި ހުރި އެންމެހައި ބާރުތަކާއި އިހުތިޔާރުތައް ބިނާވެށި ޕްލޭންކުރުމުގެ ޤާނޫނުގެ ތެރެއިން ވަނީ އެއްކޮށް ނަގާފައެވެ. އަދި ރަށްރަށުގެ ތަރައްގީއާއި ބިމުގެ ކަންކަން ނިންމުމުގެ ބާރު އަލުން ސަރުކާރުގެ މައި އިދާރާތަކަށް މަރުކަޒުކޮށްފައިވާކަމަށް ވިދާޅުވިއެވެ.
މީގެއިތުރުން ނިޔާޒް ވިދާޅުވީ، 2019 ވަނަ އަހަރު ލާމަރުކަޒީ ގާނޫނަށް ގެނެވުނު އަށްވަނަ އިސްލާހަކީ މިހާތަނަށް އެ ނިޒާމަށް ގެނެވުނު އެންމެ ހެޔޮ ބަދަލުކަމަށް ދިރާސާކުރާ ފަރާތްތަކުން ވެސް ގަބޫލުކުރާ ކަމަށެވެ. ނަމަވެސް މި ސަރުކާރުން އެ ހުރިހާ ކަމެއް އަނެއް ފުށަށް ޖަހައި، ލާމަރުކަޒީ ނިޒާމު ފަހަތަށް ޖައްސާލާފައިވާއިރު ދެން އުފެދޭ އެމްޑީޕީގެ ވެރިކަމެއްގައި އެ ބާރުތައް އަލުން ކައުންސިލްތަކަށް އިޔާދަކޮށްދޭން ޖެހޭކަމަށް ނިޔާޒް ވިދާޅުވި އެވެ.
