ޤާނޫނުއަސާސީ އިސްލާހުކުރުމުގައި ލުއިފަސޭހަ ގޮތްތަކެއް ހަމަޖެއްސީ ސަރުކާރު ހިންގުމަށް ފަސޭހަކުރުމުގެ މަގްސަދުގައި ކަމަށާއި، ނަމަވެސް މަޖިލީހުގެ މެޖޯރިޓީ ބާރުގެ ބޭނުން ނަހަމަ ގޮތުގައި ބޭނުންވާހާ ގޮތަކަށް ހިންގަފާނެކަމަށް ކުރިން ހިތަށް ވެސް ނާރާކަމަށް ކުރީގެ ޑިފެންސް މިނިސްޓަރ މާރިޔާ އަހުމަދު ދީދީ ވިދާޅުވެއްޖެއެވެ.
”ބޮޑު ބަދަލު“ އަށް ތާއީދު ކުރައްވައި ވާހަކަ ދައްކަވަމުން މާރިޔާ ވަނީ ދިވެހިރާއްޖޭގެ ވެރިކަމުގެ ބާރުތައް ވަކިކުރެވިފައި އޮތުމުގެ މުހިންމުކަމާއި، ގާނޫނުއަސާސީން ރައްޔިތުންނަށް ލިބިދީފައިވާ ބާރުތައް ހިމާޔަތްކުރުމުގެ މުހިންމުކަން ފާޙަގަކުރައްވާފަ އެވެ.
މާރިޔާ ވިދާޅުވި ގޮތުގައި، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 4 ވަނަ މާއްދާގައި ބަޔާންކޮށްފައިވާ ފަދައިން ވެރިކަމުގެ ހުރިހާ ބާރެއް ފެށިގެން އަންނަނީ އަދި ދެމިއޮންނަނީ ރައްޔިތުންގެ ކިބައިގައެވެ. އަދި ވެރިކަމުގެ ނިޒާމު ބައްޓަންކުރެވިފައި ވަނީ އެއް ބާރު އަނެއް ބާރަށް ފާރަވެރިވެވޭ ގޮތަށް، ބާރުތައް ވަކިކުރެވިގެންކަމަށްވާއިރު، އެ އޮނިގަނޑު ހިފެހެއްޓުމަކީ ދިމިކްރާތީ ނިޒާމެއްގައި ކޮންމެހެން ބޭނުންތެރިކަމެއްގެ ގޮތުގައި ވިދާޅުވި އެވެ.
މާރިޔާ ވިދާޅުވީ، މާޒީގައި ޤާނޫނުއަސާސީ އިސްލާހުކުރުމުގައި ފަސޭހަކަމެއް ގެނައުމަށް މަސައްކަތްކުރެވުނީ ރައްޔިތުން ބޭނުންވާ އަވަސް ބަދަލުތައް ގެނައުމަށް ފުރުސަތު ފަހިކުރުމުގެ މަގްސަދުގައި ކަމަށެވެ. އަދި ރައްޔިތުންގެ މަޖިލީހުގެ މެޖޯރިޓީ އޮންނަ ގޮތަކުން ސަރުކާރު ހިންގުމަށް ކުރިމަތިވާ ގޮންޖެހުންތަކާއި، އޭގެ ސަބަބުން ނިޒާމަށް އަންނަ ލޮޅުންތައް ފާހަގަކުރެއްވި އެވެ.
މާރިޔާ ވިދާޅުވީ ލާމަރުކަޒީ ނިޒާމުގެ ތެރެއިން އަންހެނުން ބާރުވެރިކުރުވުމަކީ އެމްޑީޕީން އަބަދުވެސް ވަކާލާތުކުރާ އަދި އިސްކަންދޭ މުހިންމު ސިޔާސަތެއް ކަމަށެވެ. އެގޮތުން ރަށްރަށުގެ ތަރައްގީއަށާއި، ކައުންސިލްތަކުގައި އަންހެނުންގެ ދައުރު ފުޅާވަމުން އަންނަކަން ފާހަގަކުރައްވައި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ (ޑަބްލިއުޑީސީ) މަސައްކަތްތައް ހަމައެކަނި ”ޕާޓްޓައިމް“ މަސައްކަތެއްގެ ގޮތުގައި ނުބާއްވައި، އެ ފަރާތްތަކަށް ފުރިހަމަ ގޮތުގައި ހިދުމަތްކުރެވޭނެ އެކަށީގެންވާ ނިޒާމެއް އޮންނަން ޖެހޭކަމަށް ވިދާޅުވި އެވެ.
