ކުރިމަތިވާ ކޮންމެ ހުރަހަކާއި ގޮންޖެހުމަކީ ނުވަތަ ”ކަރުމަޅިއަކީ“ ހަގީގަތުގައި ކާމިޔާބީގެ ”މާފައްޗެއް“ އެމްޑީޕީގެ ޗެއާޕާސަން، ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އެމްޑީޕީ ކޮންގްރެސް ނިންމާލުމުގެ ގޮތުން މިރޭ އޮތް ބައްދަލުވުމުގައި ރައީސް ނަޝީދު ވިދާޅުވީ، ކަންކަން ރޭވުމާއި ހިންގުމުގައި ނުހަނު ބޮޑެތި ދަތިތަކާއި ހުރަސްތައް ކުރިމަތިވި ނަމަވެސް، އެ ގޮންޖެހުންތައް ވެގެންދިޔައީ ޕާޓީއަށް ލިބުނު ވަރަށް ބޮޑު ހިތްވަރަކާއި ކުރިއެރުމަކަށް ކަމަށެވެ. އަދި ދަތި އުނދަގޫ ކޮންމެ ހާލަތަކުން ވެސް ޕާޓީން ނެރެނީ ފޮނި ނަތީޖާއެއްކަމަށް ވިދާޅުވި އެވެ.
ރައީސް ނަޝީދު ވިދާޅުވީ، މި ކޮންގްރެސްގެ ތެރެއިން މުހިންމު ތިން މަސައްކަތެއް ނިންމައި، ސިޔާސަތުތަކެއް ފާސްކުރެވިފައިވާ ކަމަށެވެ. އަދި މިއަދު ފާސްކުރެވުނު ސިޔާސަތުތަކަކީ އެއްވެސް މީހަކަށް ގޯހެއް ނުވަތަ ނުރަނގަޅު ކަމެއް ނުކުރެވޭނެ ފަދަ ހަރުދަނާ ގޮތެއްގެ މައްޗަށް ކަންކަން ބައްޓަންކުރުމަށް އެޅުނު މުހިންމު ފިޔަވަޅެއްކަން ފާހަގަކުރެއްވި އެވެ.
މީގެއިތުރުން ޤާނޫނުއަސާސީގެ އަސްލުތަކާ އެއްގޮތަށް ގައުމު ބިނާކުރުމަށް އެމްޑީޕީން ކުރަމުންދާ މަސައްކަތްތަކަށް މި ކޮންގްރެސްގެ ސަބަބުން އައު ދިރުމަކާއި ބޮޑު ބަދަލެއް ގެނައުމުގެ މިސްރާބު ލިބިފައިވާކަމަށް އެމަނިކުފާނު ވިދާޅުވިއެވެ. އަދި ޕާޓީގެ އަސާސީ ގަވާއިދަށް ގެންނަން މެންބަރުން ބޭނުންވި މުހިންމު ބަދަލުތައް މިއަދު ގެނެވިފައިވާތީ އެކަމަށް ހުރިހާ މެމްބަރުންނަށް ވެސް ޝުކުރު އަދާކުރާކަމަށް ރައީސް ނަޝީދު ވިދާޅުވި އެވެ.
