ބްރޯޑްކާސްޓިން ކޮމިޝަން (ބްރޯކްޑޮމް) ގެ މެންބަރު ކަމަށް ވީޓީވީގެ ސީނިއާ އެޑިޓަރު އަދި ޕްރެޒެންޓަރު އައިމިނަތު އަމީނާ އައްޔަން ކުރުމަށް ރުހުން ދޭން ރައްޔިތުންގެ މަޖިލީހުން މިއަދު ފާސްކޮށްފި އެވެ.
ބްރޯޑްކޮމްއަށް އައްޔަން ކުރުމަށް ފެންނަ ކަމަށް މަޖިލީހުގެ މިނިވަން މުވައްސަސާތަކާއި ބެހޭ ކޮމިޓީއިން ތަޅުމަށް 07 ނަމެއް ފޮނުވިއެވެ. އެ ލިސްޓުގެ އެންމެ ކުރީގައި އޮތީ އަނާގެ ނަމެވެ. އަނާގެ ނަން އެންމެ ފުރަތަމަށް ވޯޓަށް އެހިއިރު، ފާސްވާވަރަށް ވޯޓު ހަމަވުމުން އިތުރު ނަމަކަށް ވޯޓަށް އަހާފައި ނުވެއެވެ.
ބްރޯޑްކޮމްގެ މެމްބަރުކަމަށް އަނާ އައްޔަން ކުރަން ފެންނަކަމަށް ރުހުން ލިބިފައިވަނީ 63 މެމްބަރުންނެވެ.
އަނާއަދާ ކުރަމުން އަންނަނީ ވީޓީވީގެ ސީނިއާ އެޑިޓަރުގެ މަގާމެވެ. އަނާއަކީ މީގެ ކުރިން އެންމެ މޮޅު ނޫސްވެރިއާގެ އެވޯޑާއި، އިޖްތިމާއީ ދާއިރާގެ ބްރޯޑްކާސްޓިން ނޫސްވެރިޔާގެ އިނާމުވެސް ހޯދާފައެވެ.
އަނާ ވަނީ މީޑީއާ ދާއިރާއިން ޑިގްރީ ހާސިލް ކުރައްވާފައެވެ.
އަނާގެ ނަމުގެ އިތުރުން ތަޅުމަށް ފޮނުވި ނަންތަކުގެ ތެރޭގައި ރާއްޖެޓީވީގެ ނޫސްވެރިޔާ މުހައްމަދު ފަޒީނާއި، ސަންގުޓީވީގެ ޕްރެޒެންޓަރު އަހުމަދު ފައިރޫޒްގެ އިތުރުން ކުރީގެ އިންފޮމޭޝަން ކޮމިޝަނަރު އަބްދުލް އަޒީޒު ޖަމާލު އަބޫ ބަކުރުގެ ނަން ވެސް ހިމެނެ އެވެ.