ކޮވިޑް-19ގެ ސަބަބުން ސިއްހީ ގޮތުންނާއި އިގްތިސޯދީ ގޮތުން އަސަރުތައް ކުޑަ ކުރުމަށް ރާއްޖެއާއި އިންޑިޔާއިން ގުޅިގެން މަސައްކަތްކުރާނެ ކަމަށް އިންޑިޔާގެ ބޮޑުވަޒީރު ނަރެންދުރަ މޯދީ ވިދާޅުވެއްޖެއެވެ.
މޯދީ މިހެން ވިދާޅުވީ ކޮވިޑް-19ގެ ސަބަބުން ރާއްޖޭގެ އިގްތިޞާދަށް ލިބިފައިވާ ގެއްލުންތަކުން އަރައިގަތުމަށް ބަޖެޓް ސަޕޯޓްގެ ގޮތުގައި އިންޑިއާއިން 250 މިލިއަން ޑޮލަރުގެ އެހީއެއް ރާއްޖެއަށް އިއްޔެ ދިނުމާ ގުޅިގެން ރައީސް އިބްރާހީމް މުޙައްމަދު ޞާލިޙު އިންޑިޔާއަށް ޝުކުރު އަދާކުރައްވައި ކުރެއްވި ޓުވީޓަކާ ގުޅިގެންނެވެ.
އެގޮތުން ރައީސް ސޯލިހު ވިދާޅުވީ ރަހުމަތްތެރިއަކަށް ޖެހޭއިރު އިންޑިއާ އަބަދުވެސް އޮންނަނީ ތައްޔާރަށް ކަމަށެވެ.
ރައީސްގެ ޓްވީތާ ގުޅިގެން މޯދީ ކުރެއްވި ޓްވީޓެއްގައި ވިދާޅުވީ ރައީސް ޞޯލިޙުގެ ހެޔޮ ބަސްފުޅާއި ޝުޢޫރުތަކަށް ޝުކުރު އަދާކުރާ ކަމަށާއި ކޮވިޑް-19ގެ ސަބަބުން ޞިއްޙަތަށާއި އިޤުތިޞާދަށް ކުރަމުންދާ އަސަރުތަކާ ދެކޮޅަށް ރާއްޖެއާއި އިންޑިޔާ ގުޅިގެން މަސައްކަތްކުރާނެ ކަމަށެވެ.
Appreciate your warm sentiments, President @ibusolih! As close friends and neighbours, India and Maldives will continue to support each other in our fight against the health and economic impact of COVID-19. https://t.co/esNRBWJxZg
— Narendra Modi (@narendramodi) September 21, 2020
އިންޑިއާއިން ބަޖެޓް ސަޕޯޓްގެ ގޮތުގައި 250 މިލިއަން އެމެރިކާ ޑޮލަރު ދޭން ނިންމިކަން ހާމަކުރެއްވީ މިދިޔަ މަހު ފޮރިން މިނިސްޓަރ އަބްދުﷲ ޝާހިދު، އިންޑިއާގެ ހާރިޖީ ވަޒީރު ޑރ. އެސް ޖައިޝަންކަރާ އެކު ބޭއްވި ޑިޖިޓަލް ވީޑިއޯ ކޮންފަރެންސް ކޯލްގައެވެ.
އިންޑިއާ ސަރުކާރުން ރާއްޖެއަށް އެ ލޯނު ދިނުމަށް ނިންމާފައިވަނީ 10 އަހަރު ދުވަހުގެ ތެރޭ ދައްކާ ހަލާސްކުރާ ގޮތަށެވެ. އަދި އެ ލޯނުގެ އިންޓަރެސްޓްގެ ގޮތުގައި ނަގަނީ 3.5 ޕަސަންޓެވެ.
މި ސަރުކާރު ވެރިކަމަށް އައި ފަހުން އިންޑިއާ އިން އަންނަނީ ރާއްޖެ އަށް ގިނަ އެހީތަކެއް ފޯރުކޮށްދެމުންނެވެ.
