މުލި އަދި ބިލެތްފަހިގައި އެއާޕޯޓު އަޅަން ނިންމެވީ ރައީސް ޔާމީން: މުއިއްޒު

މ. މުލި އަދި ށ. ބިލެތްފަހީގައި އެއާޕޯޓު އަޅަން ނިންމެވީ ކުރީގެ ރައީސް އަބްދުﷲ ޔާމީން ކަމަށް ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވެއްޖެއެވެ.

މުއިއްޒު މިހެން ވިދާޅުވީ އަންނަ އަހަރު ބިލެތްފަހި އަދި މުލީގައި އެއާޕޯޓު އަޅާނެ ކަމަށް ޓްރާސްޕޯޓް މިނިސްޓަރު އައިޝަތު ނަހުލާ ވިދާޅުވުމާ ގުޅިގެންނެވެ.

އެކަމާ ގުޅިގެން މުއިއްޒު މިރޭ ވިދާޅުވީ މުލި އާއި ބިލެތްފަހި އެއާޕޯޓު އެޅުމަކީ ރައީސް ޔާމީން ކުރިއަށް ގެންދަން ނިންމަވައި، އެމަނިކުފާނު އިއުލާން ކުރައްވާފައިވާ އެއާޕޯޓުތަކެއް ކަމަށެވެ. އެގޮތުން މުލީގައި އެއާޕޯޓު އެޅުމަށް މުލީ ބިން ހިއްކުމުގެ މަޝްރޫއު ފަށްޓަވައި ނިންމެވި ކަމަށް މުއިއްޒު ވިދާޅުވިއެވެ.

”ބިލެތްފަހި ބިން ހިއްކުމާއި އެއާޕޯޓު އަދި ޓޫރިޒަމް ހިމެނޭ ގޮތަށް މެގަ ޕްރޮޖެކްޓުގެ މާސްޓަރ ޕްލޭން ހެއްދެވި.“ މުއިއްޒު ވިދާޅުވިއެވެ.

Muli, Billefahi Airport eyee Raees Yameen kuriyah gendhan nimmavaa emanikfaan iulaan kuravvaafaivaa airport thakeh. Muli ga airport elhumah Muli bin hikkumuge mashroou fattavaa nimmevi. Bileffahi bin hikkummaa Airport adhi tourism himeneygothah mega project ge masterplan hehdhevi https://t.co/VuX7hG1xC9

— Dr Mohamed Muizzu (@MMuizzu) November 13, 2020

ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހްގެ ސަރުކާރަށް ދެ އަހަރު ފުރުމާއި ދިމާކޮށް ސަރުކާރުގެ މީޑިއާއިން ގެނެސްދިން ޕްރަގްރާމެއްގައި ވާހަކަ ދައްކަވަމުން މިނިސްޓަރު އައިޝަތު ނަހުލާ ވިދާޅުވީ ކުރިއަށް އޮތް އަހަރު ށ. ބިލެތްފަހި އަދި މ. މުލީގައި އެއާޕޯޓް އެޅިގެންދާނެ ކަމަށެވެ. އަދި ބ. ތުޅާދޫގައި އެއާޕޯޓެއް އެޅުމުގެ ޕްލޭން ކުރެވިފައިވާ ކަމަށެވެ.

މިނިސްޓަރު ވިދާޅުވީ މ. މުލީގައި ހަދާ އެއާޕޯޓާއެކު ރާއްޖޭގެ ކޮންމެ ހިސާބަކުންވެސް ތިރީސް މިނެޓުން ހުރިހާ ރަށަކަށް ދަތުރުކުރެވޭނެ ކަމަށެވެ.