އިނގިރޭސިވިލާތުން ފެނިގެންއުޅޭ ކޮރޯނާވައިރަސްގެ އާ ސްޓްރެއިންއާ ގުޅިގެން ރާއްޖެއިން އަޅާފައިވާ ފިޔަވަޅުތައް ހަރުދަނާ ކުރުމުގެ މަސައްކަތް ފަށާފައިވާ ކަމަށް ހެލްތު އެމްޖެންސީ އޮޕަރޭޝަން ސެންޓަރު (އެޗްއީއޯސީ) އިން ބުނެފި އެވެ.
އެޗްއީއޯސީގައި ބޭއްވި ނޫސްވެރިންގެ ބައްދަލުވުމުގައި ތަރުޖަމާނު ޑރ. ނަޒްލާ ރަފީގު ވިދާޅުވީ އާ ސްޓްރެއިންގެ ކަންކަން ވަރަށް ގާތުން ބަލަމުން އަންނަ ކަމަށާއި މިފަދަ ކަންކަމުން ސަލާމަތް ވެވޭނީ ކޮވިޑް19 އިން ރައްކާތެރިވުމަށް މިހާރުވެސް އަޅާފައިވާ ފިޔަވަޅުތަކަށް ސަމާލުކަން ދީ ފިޔަވަޅުތަކާ އެއްގޮތަށް އަމަލުކުރުމުން ކަމަށެވެ.
ކޮރޯނާ ވައިރަހުގެ އާ ސްޓްރެއިން ފެނި އެ ވައިރަސް ފެތުރެން ފަށާފައިވީ ނަމަވެސް އެއީ ކޮވިޑް19 އަށްވުރެ ފުރާނައަށް ނުރައްކާ ސްޓްރެއިން އެއް ކަމަށް އަދި ނުބެލެވޭ ކަމަށާއި ނަމަވެސް މިކަން ކަށަވަރުކުރުމަށް ދިރާސާތަކެއް ކުރަމުންގެންދާ ކަމަށް ސައިންސްވެރިންނާ ހަވާލާދީ ރިޕޯޓްތައް ބުނެ އެވެ.