ލޯކަލް ކައުންސިލް އިންތިޚާބު ފަސްކުރުމަށް ރައްޔިތުންގެ މަޖިލީހުން ފާސްކުރި ގާނޫނަށް އިސްލާހު ހުށައެޅުމަށް ބޭއްވި ޖަލްސާގައިވެސް ރައީސް އަބްދުﷲ ޔާމީން މިނިވަންކުރެއްވުމަށް ގޮޮވާލައްވައިފިއެވެ.
ގާތްގަނޑަކަށް ދެ މިނެޓެއްހާއިރަށް ކުރިއަށް ގެންދިޔަ، މިޖަލްސާއަކީ މިއަހަރުގެ ދައުރުން ބޭރުން ބޭއްވި ޚާއްސަ ޖަލްސާއެކެވެ. އެއީ ލޯކަލް ކައުންސިލް އިންތިޚާބު ބާއްވާނެ ތާރީޚަކާއި މެދު ގޮތެއް ނިންމުމަށް ސަރުޚޅާރުގެ ފަރާތުން މަޖިލީހަށް ހުށައެޅި އިސްލާހާއި ގުޅިގެންނެވެ.
މަޖިލީސް ކުރިއަށްދިޔަ ވަގުތު، އިދިކޮޅުން ވަނީ މަޖިލީހުގައި އަޑުގަދަކޮށް އެކި ވާހަކަތައް ދައްކަވާފައެވެ. އެގޮތުން، ލޯކަލް ކައުންސިލްތަކުގެ އިންތިޚާބުގެ ޚާއްސަ ގާނޫނަށް އިސްލާހު ގެނައުމުގެ ބިލުގެ ފުރަތަމަ ކިޔުން އިއްވަމުން ދިޔަ ވަގުތު އިދިކޮޅުގެ ބައެއް މެމްބަރުން ވަނީ މަޖިލީހުގެ ތަޅުމުގައި ކޮޅަށް ތިއްބަވައި އަޑުގަދަކުރައްވާފައެވެ. އެގޮތުން ރައީށް ޔާމީންގެ ޝަރީއަތް ކުރިއަށް ގެންދަނީ އިންސާފުވެރިކޮށް ނޫން ކަމަށް ވިދާޅުވެ، ލޯކަލް ކައުންސިލް އިންތިޚާބު ބާއްވަން ސަރުކާރުން އުޅުއްވާ ގޮތާއި މެދުވެސް ވަނީ ފާޑު ވިދާޅުވެފައެވެ.
ޖަލްސާ ކުރިއަށްދިޔަ ވަގުތު އެންމެ އަޑުގަދަ ކުރެއްވި ޞޭފުޅެއް ގޮތުގައި ފާހަގަކުރެވުނީ ނައިފްރު ދާއިރާގެ މެމްބަރު އަހުމަދު ޝިޔާމެވެ. ރިޔާސަތުގައި އިންނަވާ މަޖިލީހުގެ ނައިބްރައީސް އީވާ އަބްދުﷲ ވަނީ އިށީނދެވަޑައިގަތުމަށް މެމްބަރު ޝިޔާމަށް ދަންނަވާފައެވެ.
ބިލުގެ ފުރަތަމަ ކިޔުން އިއްވާފައިވަނީ އަދި ބިލާއި ގުޅޭ ގޮތުން ވާހަކަދައްކަވާފައިވަނީ، މެމްބަރު ހަޅޭއްލަވައި އަޑުގަދަކުރަމުން ދަނިކޮށެވެ. އަދި ބިލުގެ ފުރަތަމަ ކިޔުން އިއްވުމަށް ނުވަތަ ޖަލްސާ ކުރިއަށް ގެންދިޔުމަށް ހުރަސް ނޭޅުއްވުމަށް ނުވަތަ އަޑުގަދަކުރެއްވުން ހުއްޓާލުމަށްވެސް ރިޔާސަތުން އަންގަވާފައެއް ނުވެއެވެ.
ބިލުގެ ފުރަތަމަ ކިޔުން އިއްވުމަށްފަހު، ރިޔާސަތުގައި އިންނަވާ މަޖިލީހުގެ ނައިބް ރައީސް އީވާ އަބްދުﷲ ވިދާޅުވީ އިބްތިދާއީ ބަހުސް އޮންނާނީ 17 ވާ އާދިއްތަ ދުވަހު ކަމަށެވެ. އަދި އެދުވަހު ވާހަކަދެއްކުމަށް އެދިވަޑައިގެންފައިވާ ހުރިހާ މެމްބަރުންނަށް ފުރުސަތު ލިބެންދެން ޖަލްސާ ކުރިއަށް ގެންދަވާނެކަމަށް ވިދާޅުވިއެވެ. އެއަށްފަހު ކޮމެޓީ މަރުހަލާއަށް ބިލު ފޮނުވައި، އަލުން ތަޅުމަށް ބިލު ފޮނުވުމުން ވޯޓަށް އަހާނެކަމަށް އީވާ ވިދާޅުވިއެވެ.
advertisment