ކޮވިޑް19 ކޮންޓްރޯލް ކުރުމަށް މިހާރު އަޅާފައިވާ ފިޔަވަޅުތައް އިތުރު ހަތް ދުވަހަށް ދިގު ދަންމަން އެޗްޕީއޭއިން ނިންމައިފި އެވެ.
މިިދިޔަ އަހަރުގެ މާޗް 12 ވަނަ ދުވަހުން ފެށިގެން ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާންކޮށްފައިވާ އިރު، ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ދިޔައީ ބަލި ފެތުރުން ކޮންޓްރޯލް ކުރުމަށް އެކިއެކި ފިޔަވަޅުތައް އަޅަމުންނެވެ.
ޑިރެކްޓާ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރު ސޮއިކޮށް އިއްޔެ ނެރުނު ބަޔާނުގައި ބުނީ، މިއަދުން ފެށިގެން އިތުރު ހަތް ދުވަހަށް އެ ފިޔަވަޅުތައް ދަމަހައްޓަން ނިންމާފައިވާ ކަމަށެވެ.
ހަތް ދުވަހުގެ މުއްދަތު އިތުރު ފިޔަވަޅުތައް
- ރޭގަނޑު 11:00 އިން ފަތިހު 4:30 އަށް މަގުމައްޗާއި އާއްމު ތަންތަނަށް މީހުން ނުނިކުތުން
- އެއް ފަހަރާ ފަސް މީހުންނަށް ވުރެ ގިނައިން މަގުމައްޗާއި އާންމުތަންތަނަށް އެއްވެއުޅުން
- ސިނަމާތަކާއި ފިލްމު ތިއޭޓަރުތައް ބަންދުކުރުން
- ދުވުމަށް ހާއްސަކޮށްފައިވާ ޓްރެކް ބަންދުކުރުން
- ޕާކްތަކާއި މައިޒާންތައް ބަންދުކުރުން.
- ޔުނިވަސިޓީތަކާއި ކޮލެޖްތަކަށް ދަރިވަރުން ހާޒިރުވެގެން ކްލާސްތައް ކުރިއަށް ގެންދިޔުން ހުއްޓާލުން
- އެކަނި ކުރާ ކަސްރަތުތައް ފިޔަވައި، ކުޅިވަރު އަދި ކަސްރަތު ހަރަކާތްތައް ހުއްޓާލުން
އެ ފިޔަވަޅުތަކުގެ އިތުރުން ބައެއް ފިޔަވަޅުތަކަކީ ވަކި ގޮތެއް އަންގަންދެން އެޅުމަށް ނިންމާފައިވާ ފިޔަވަޅުތަކެކެވެ. އެގޮތުން ހާއްސަ ހުއްދައިގެ ދަށުން މާލެ ސިޓީޏް ރަށްރަށަށް ދާ މީހުން، 72 ގަޑިއިރުގެ ތެރޭގައި ހަދާފައިވާ ނެގެޓިވް ކޮވިޑް ޓެސްޓޔ އޮތުމާއި ޕްރީ ސްކޫލާއި ނާސަރީ ގްރޭޑްތަކުގައި ކިޔަވައިދިނުން ހުއްޓާލުން ހިމެނެ އެވެ.