ގދ. ގައްދޫ މަގުހެދުމުގެ މަޝްރޫޢުގެ މަސައްކަތުގެ ބޮޑުބައި ނިމިފައިވާކަމަށް ރޯޑް ޑިވެލޮޕްމެންޓް ކޯޕަރޭޝަނުން (އާރްޑީސީ)ން ބުނެފިއެވެ.
މިކަމާއި ގުޅިގެން އާރްޑީސީން ކުރި ޓުވީޓެއްގައި ބުނެފައިވަނީ ގައްދޫ މަގު ހެދުމުގެ މަސައްކަތް ހަލުވި ދުވެއްޔެއްގައި ކުރިއަށް ކަމަށެވެ. އަދި މަގުގެ ސައިޑްވޯކް ކޮނެ، ޝަޓަރިންގެ 93 އިންސައްތަ މަސައްކަތް ވަނީ ނިމިފައިކަމަށް އެކުންފުނިން ހާމަކުރެއެވެ. އެމަސައްކަތުގެ ދަށުން ކީވޯލްގެ 35 އިންސައްތަ މަސައްކަތްވެސް ވަނީ ނިމިފައި ވާކަމަށް އާރުޑީސީން މައުލޫމާތުދެއެވެ.
ގދ.ގައްދޫ މަގު ހެދުމުގެ މަސައްކަތް ދަނީ ބާރަށް ކުރިއަށް. ބޮޑުބައި ވަނީ ނިމިފަ. ހަލުވިކަމާއެކު އަވަހަށް ނިންމަން ވަނީ އަމާޒު ހިފާފައި. އެގޮތުން ވަތަބަނޑޭރި މަގުގެ ސައިޑްވޯކް ކޮނެ، ޝަޓަރިންގެ %93 ވަނީ ނިމިފައި. ކޮންކްރީޓް ކީވޯލްގެ %35 ވެސް ވަނީ ނިމިފައި.#ޓީމްއާރުޑީސީ pic.twitter.com/uLIv4pAmDi
— Road Development Corporation Ltd (@rdcmaldives) August 21, 2021
މި މަޝްރޫއުގެ ދަށުން ގައްދޫގެ ލިންކްރޯޑް ހިމެނޭގޮތަށް 6 މަގެއް ޒަމާނީ ފެންވަރަށް ތާރުއަޅައިގެން ހެދުމަށް ހަމަޖެހިފައިވާއިރު، އެރަށުގައި ހެދުމަށް ހަމަޖެހިފައިވަނީ 6 ކިލޯ މީޓަރުގެ މަގެކެވެ. އަދި ގަމީގެ ތެރޭގައި ހޮޅި އެޅުމުގެ މަސައްކަތްވެސް ހިމެނޭ ކަމަށް އާރްޑީސީން ވަނީ ބުނެފައެވެ.
މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރއިން އެކޯޕަރޭޝަނާއި ހަވާލުކޮށްގެން ކުރިއަށްގެންދާ މި މަޝްރޫއުއަކީ -/29،685،936ރ (ނަވާވީސް މިލިޔަން ހަސަތޭކަ އަށްޑިހަ ފަސް ހާސް ނުވަސަތޭކަ ތިރީސް ހަ ރުފިޔާ)ގެ މަޝްރޫއެކެވެ.
މިމަޝްރޫއު ނިންމުމަށް ހަމަޖެހިފައިވަނީ 510 ދުވަހުގެ ތެރޭގައެވެ.