އދ. ދަނގެތީގައި އަނިޔާވެރިގޮތަކަށް މަރާލާފައި އޮއްވާ ފެނުނު މީހާ މަރާލުމުގައި ޝާމިލްވާ މީހުން ހޯދާ ހަރުކަށި އަދަބު ދިނުމަށް ދަނގެތި ދާއިރާގެ މެމަބަރު ކާނަލް މުޙައްމަދު ނާޒިމް ގޮވާލައްވައިފިއެވެ.
މަރާލާފައި އޮއްވާ ފެނިފައިވަނީ ދަނގެތީގެ ވިޔަފާރިވެރިޔެއް ކަމުގައިވާ އެ ރަށު މޮނަލާޒް، މަހްމޫދު އަބޫބަކުރު އެވެ. އޭނާ ފެނިފައިވަނީ ގޯންޏަކަށްލާ ވަޅަކަށް އެއްލާލާފައިވަނިކޮށެވެ.
މިކަމާ ގުޅިގެން ނާޒިމް ކުރެއްވި ޓްވީޓެއްގައި ވަނީ މަހްމޫދު އަނިޔާވެރިގޮތަކަށް މަރާލައި ވަޅަކަށް ވައްޓާލާފައި އޮތްއޮތުން، ހަރުކަށި އިބާރާތުން ކުއްވެރިކުރާކަމަށެވެ. ނާޒިމް ވަނީމި ޖަރީމާ ހިންގި ބަޔަކު ހޯދާ ހަރުކަށި އަދަބު ދިނުމަށް ފުލުހުންނަށް ގޮވާލާފައެވެ.
ފުލުހުން ބުނީ އެ ހާދިސާ ތަހުގީގު ކުރަން ފުލުހުންގެ ހާއްސަ ޓީމެއް މިހާރު ދަނގެއްޗަށް ދަތުރުކުރަމުންދާ ކަމަށާއި ހާއްސަ އިސްކަމެއް ދީގެން މި މައްސަލަ ތަހުގީގު ކުރާނެ ކަމަށެވެ.
މައުލޫމާތު ލިބިފައިވާ ގޮތުގައި އެމިހާ ގެއްލިގެން ހޯދަން ފަށާފައިވަނީ މިއަދު ހެނދުނުން ފެށިގެންނެވެ. މި މައްސަލައާ ގުޅިގެން އަދި މިހާތަނަށް މީހަކު ހައްޔަރުކޮށްފައި ނުވާ ކަމަށް ފުލުހުން ބުނެއެވެ.
