ތައުލީމީ ދާއިރާގެ ހުރިހާ މުވައްޒަފުންގެ މުސާރަ ބޮޑުކުރަން ނިންމުމުން މޮޅެތި މުދައްރިސުން ވަޒީފާގައި ދެމިތިބޭނެ ކަމަށް އެޑިއުކޭޝަން މިނިސްޓަރު އައިޝަތު އަލީ ވިދާޅުވެއްޖެއެވެ.
2022 ވަނަ އަހަރުގެ ރިޔާސީ ބަޔާން އިއްވަވަމުން ރައީސް އިބްރާހިމް މުހައްމަދު ސޯލިހް ވިދާޅުވީ، ޓީޗަރުންނަށް އެކަށީގެންވާ މުސާރައެއް ދިނުމަކީ މިސަރުކާރުން ވެފައިވާ ވައުދެއް ކަމަށެވެ.
އެހެންކަމުން މޭ މަހުން ފެށިގެން ތައުލީމީ ދާއިރާގެ ހުރިހާ މުވައްޒަފުންގެ މުސާރަ ބޮޑުކުރުމަށް ނިންމާފައިވާކަމަށް ރައީސް ސޯލިހް ވިދާޅުވިއެވެ.
މިކަމާ ގުޅިގެން މިނިސްޓަރު އައިޝަތު އަލީ ކުރެއްވި ޓްވީޓެއްގައި ވިދާޅުވީ މީގެ ކުރީން ދުވަހަކުވެސް ބޮޑު ކޮށްދީފައި ނުވާ މިންވަރަކަށް މުދައްރިސުންގެ މުސާރަ ރައީސުލްޖުމްހޫރިއްޔާ ބޮޑުކޮށްދެއްވަން އިޢުލާނުކުރެއްވިކަމީ، ސްކޫލްތަކާއި ގުޅިފައިވާ ހުރިހާ ފަރާތްތަކަކަށް ލިބުނު މަތިވެރި އުފަލެއް ކަމަށެވެ.
އެ ހުރިހާ ފަރާތްތަކެއްގެ ނަމުގައި ރައީސްއަށް ޝުކުރު ދަންނަވަން. މުދައްރިސުންގެ މުސާރައިގެ މިންވަރު ގުޅިފައިވަނީ ދިވެހިރާއްޖޭގެ ތަރައްޤީ އާ. މިކަމުން އަޅުގަނޑު އެދެނީ ހުނަރުވެރި ދަރިވަރުން މުދައްރިސްކަމާ ކުރިމަތިލާން. މޮޅެތި މުދައްރިސުން ވަޒީފާގައި ދެމިތިބޭން. ޝުކުރިއްޔާ ރައީސް” މިނިސްޓަރު ވިދާޅުވިއެވެ.
ރިޔާސީ ބަޔާންގައި ރައީސް ވިދާޅުވީ، އެ ނިންމެވުމުގެ ނަތީޖާއަކީ ގްރެޖުއޭޓް ފެންވަރުގެ ސެކަންޑަރީ ޓީޗަރެއްގެ މުސާރަ 12،628ރ. އިން 19،640ރ. އަށް ބޮޑުވުން ކަަމަށެވެ. އެއީ 56 ޕަސެންޓްގެ ކުރިއެރުމެއް ކަމަށް ވާއިރު ރައީސް ވިދާޅުވިގޮތުގައި އެ އަދަދު ކަލްކިއުލޭޓް ކުރައްވާފައި ވަނީ އިތުރު ގަޑި ނުލަ އެވެ. އިތުރު ގަޑި ހިމަނައިފި ނަމަ މުސާރަ އެ އަށް ވުރެ ބޮޑުވާނެ އެވެ.
