އިދިކޮޅު ކޯލިޝަނަށް ބުއްދިވެރިވާނީ، ކުރިއަށް އޮތް ރިޔާސީ އިންތިހާބާއި ނޫޅެ، އެހެން ކަމެއް ކުރަން އުޅުނިއްޔާކަމަށް މަޖިލީހުގެ ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވެއްޖެއެވެ.
އިދިކޮޅު ކޯލިޝަންގެ އިސް މެމްބަރެއް ޕީއެންސީގެ ރައީސް އަބްދުއްރަހީމް އަބްދުﷲ އަށް ނޭދެވޭ ބަސްތަކަކުން، މުހާތަބުކޮށްފައިވުމުން ކޯލިޝަނުގެ ތެރޭގައި ބައިބައިވުންތަކެއް އުފެދިފައިވާކަމަށް އިޝާރާތްކުރައްވާ ނިހާދު ވިދާޅުވީ، މިހާކު ޓްވީޓެއް ކުރާއިރަށް، ބޯކޮށް ވާރޭ ވެހޭއިރަށް، ގަދަޔަށް ވައިޖެހިލާއިރަށް، ނުވަތަ މީހަކު ބާރަށް އެއްޗެއް ބުނެލާއިރަށް ”ރެންދުލާ“ ޕާޓިއަކަށް ރިޔާސީ އިންތިހާބެއްގައި ވާދައެއް ނުކުރެވޭނެކަމަށެވެ. އަދި އެފަދަ ޕާޓީއަކަށް ބުއްދިވެރިވާނީ އެހެން މަސައްކަތެއް ކުރިއްޔާކަމަށްވެސް އެނާ ފާހަގަކުރެއްވިއެވެ.
މީހަކު ޓްވީޓެއް ކޮށްލާއިރަށް، ބޯކޮށް ވާރޭ ވެހިލާއިރަށް، ގަދަޔަށް ވައި ޖެހިލާއިރަށް، މީހަކު ބާރަށް އެއްޗެއް ބުނެލާއިރަށް ރެނދުލާ ޕާޓީއަކަށް ރިޔާސީ އިންތިޚާބެއްގަ ކޮން ވާދައެއް ކުރެވޭނީ؟ އެހެންކަމަކާ އުޅުން ބުއްދިވެރި!
— Feydhoo Meehaa (Mohamed Nihad) (@nihad_m) August 26, 2022
އިދިކޮޅު ކޯލިޝަނުގެ ތެރޭގައި ބައިބައިވުންތަކެއް އުފެދިފައިވާކަމަށް ނިހާދު އިޝާރާތްކުރެއްވީ ރައީސް ޔާމީންގެ ސަރުކާރުގައި ޗީފް އޮފް ސްޓާފްގެ މަގާމުގައި ހުންނެވި، އަހުމަދު މުސްތަފާ ޕީއެންސީގެ ރައީސް އަބްދުއްރަހީމް އަބްދުﷲ އަށް ފާޑު ވިދާޅުވާ ފަދަ މޭރުމަކުން ކުރެއްވި ޓުވީޓަކާ ގުޅިގެންނެވެ.
އިދިކޮޅު ކޯލިޝަންގެ އިސް މެމްބަރުންވަނީ މުސްތަފާގެ އެ ޓްވީޓް ކުށްވެރިކުރައްވާފައެވެ. މުސްތަފާ ކުރެއްވި ޓުވީޓެއްގައި ވިދާޅުވީ މި ފަހަރު މިއޮތީ ”އެ އުޅޭ ޓިނު އަދުރޭގެ ހިސާބު ދިމާވެފައި“ ކަމަށެވެ. ކޯލިޝަންގެ އިސް މެމްބަރުންގެ ފަރާތުން ފާޑުކިއުން އަމާޒުވުމުން އޭނާ ވަނީ ޓުވީޓު ޑިލީޓް ކުރައްވާފައެވެ.
