މިނީ ބަހަށް ޓެކްސީ ޑްރައިވާސް ޔޫނިއަންގެ ފާޑުކިއުން: ”މާލެއަށް ގެންނަން ވީ ދިހަ ހާސް ކުރޮޅި“!

އެހެން މީހުންގެ ހައްގުތަކަށް ދަތިކަމާއި އުނިކަން ލިބޭ ގޮތަށް މާލޭގެ ހަލަބޮލި މާހައުލަށް ނުކަތާ ވަރުގެ ބަސްތަކެއް ފައްތައިގެން ނަމެއްގައި ހިދުމަތް ދިނުން ބުއްދިވެރިއެއް ނޫންކަމަށް ބުނެ، މިނީ ބަހުގެ ހިދުމަތަށް ޓެކްސީ ޑްރައިވަރުންގެ ޔޫނިއަންއިން ފާޑުކިޔައިފި އެވެ.

ރާއްޖޭގައި މިނީ ބަހުގެ ހިދުމަތް މިއަދު ފެށިއިރު، މިއީ ދުނިޔޭގެ އެތައް ގައުމެއްގައި އަމަލު ކުރަމުން އަންނަ އާއްމު ދަތުރުފަތުރުގެ ނިޒާމެކެވެ. އަގުތަކާއި މެދު ހިތްހަމަނުޖެހުން ފާޅުކޮށް، ޓެކްސީތަކަށް ބޭނުން އަގެއް ކަނޑައެޅުމުގެ ފުރުސަތު އޮންނަން ޖެހޭނެކަމަށް ބުނެ މީގެ ކުރިން ވެސް ޑްރައިވަރުން އިހުތިޖާޖު ކުރި އެވެ. އަދި މިނީ ބަހުގެ ހިދުމަތް ތައާރަފު ކުރުމުގެ ވާހަކަތައް ދެކެވެމުން އެއީ ޑްރައިވަރުންގެ އާމްދަނީވެ މަގު ބަންދު ކުރުންކަމަށް ސިފަކޮށް އެކަމާއި ދެކޮޅަށް ވެސް އަޑުއުފުލާފައި ވެއެވެ.

އާއްމުންގެ ބޮޑު ސަމާލުކަމަކާއި، ތަރުހީބު ލިބިގެން ދިޔަ މި ހިދުމަތަށް ބުރޫއަރާ ގޮތަކަށް ނުވަތަ ގަސްތުގައި ޖެއްސުން ކުރާ ބަޔަކާއި މެދު ފިޔަވަޅު އަޅާނެކަމަށް ފުލުހުން ވަނީ ބުނެފަ އެވެ. އަދި ބަސް ހުއްޓިތަކުގައި ޕާކު ކުރުން ފާހަގަ ކުރެވިއްޖެ ނަމަ އެ އުޅަނދުތައް ޓޯ ކުރަން ޖެހިއްޖެ ހާލަތެއްގައި އެ ފިޔަވަޅު އަޅާނެކަމަށް ވެސް ފުލުހުން ބުންޏެވެ.

ޑްރައިވާސް ޔުނިއަންއިން އާއްމު ކުރި ޕޯސްޓެއްގައި މިނީ ބަހުގެ ހިދުމަތަށް ފާޑުކިޔައި ބުނީ، އެކަށީގެންވާ ރަނގަޅު އިތުބާރެއް ހިފޭ ޕަބްލިކް ޓްރާންސްޕޯޓު ހިދުމަތެއް އާއްމު ރައްޔިތުންނަށް ފޯރުކޮށްދިނުން އެއީ ސަރުކާރުގެ ވަރަށް ރަނގަޅު ފިޔަވަޅެއް ކަމަށެވެ. ނަމަވެސް އެހެން މީހުންގެ ހައްގުތަކަށް ދަތިކަމާއި އުނިކަން ލިބޭ ގޮތަށް މާލޭގެ ހަލަބޮލި މާހައުލަށް ނުކަތާ ވަރުގެ ބަސްތަކެއް ފައްތައިގެން ނަމެއްގައި ހިދުމަތް ދިނުން އެއީ ބުއްދިވެރި ވިސްނުމެއް ނޫންކަށް ބުންޏެވެ.

ޔޫނިއަންއިން ބުނެފައި ވަނީ އަމިއްލަ ވަކިވަކި ފަރުދުންތަކެއް، ބޮޑު ހޭދައެއްކޮށް ކާރުތަކެއް ގަނެގެން ހިދުމަތް ފޯރުކޮށްދީގެން އާމްދަނީ ހޯދާ ޓެކްސީގެ ހިދުމަތް އެއީ ސަރުކާރުގެ ޕަބްލިކް ޓްރާންސްޕޯޓުކަމަށް ރައްޔިތުންނަށް ވިސްނޭ ގޮތަށް، ކަމާއި ގުޅުން ހުރި ވުޒާރާ ޓްރާންސްޕޯޓު މިނިސްޓްރީގެ އަމަލުތައް ބެހެއްޓުން ރަނގަޅެއް ނޫން ކަމަށެވެ.

”އެހެންމީހުންގެ ހައްގުތަކަށް ދަތިކަމާއި އުނިކަމެއް ލިބޭގޮތަށް، މާލޭގެ ހަލަބޮލި މާހައުލަށް މަގުތަކަށް ނުކަތާ ވަރުގެ ބަސްތަކެއް ގަދަކަމުން ފައްތައިގެން ނަމެއްގަ ރަގަޅު ޚިދުމަތެއް ދޭން އުޅުން ބުއްދިވެރި އެއް ނޫން.. އަމިއްލަ ވަކިވަކި ފަރުދުން ތަކެއް އަމިއްލަ އަށް ބޮޑު ހޭދަކޮށްގެން އަމިއްލައަށް ކާރު ގަނެގެން ޚިދުމަތް ފޯރުކޮށްދީގެން އާމްދަނީ ހޯދާޓެކްސީ ޚިދުމަތަކީ ސަރުކާރުން ފޯރުކޮށްދޭ ޕަބްލިކް ޓްރާންސްޕޯޓް ކަމަށް ރައްޔިތުންނަށް ވިސްނޭ ގޮތަށް ޓްރާންސްޕޯޓް މިނިސްޓްރީގެ އަމަލުތައް ބެހެއްޓުން ވެސް ބުއްދިވެރި އެއް ނޫން“ ޓެކްސީ ޔޫނިއަން

ޓެކްސީގެ ހިދުމަތް ދިނުމުގައި އެހެން ދަތުރުފަތުރުތަކާއި ބެހޭ ނިޒާމުތަކާއި އެއްގޮތަށް އަމިއްލަ އަގުތައް ކަނޑައެޅުމުގެ ފުރުސަތު ދޭން މީގެ ކުރިން ޑްރައިވަރުން ގޮވާލި އެވެ. އަދި ދުނިޔޭގެ ބާޒާރުގައި ތެލުގެ އަގު އުފުލި ރާއްޖޭގެ މާކެޓަށް އޭގެ އަސަރު ކުރުމުން ކުރި އިހުތިޖާޖުތަކަށް ފަހު މިނިސްޓްރީން ވަނީ ޓެކްސީތަކުގެ އަގަށް ބަދަލު ގެނެސްފަ އެވެ. ނަމަވެސް އެ އަގުތަކާއި މެދު ޑްރައިވަރުން ނުރުހުންފާޅު ކުރި އެވެ.

ބަހުގެ ހިދުމަތުގެ އަގު އެމްޓީސީސީން ކަނޑައެޅުމާއި، ފްލައިޓުތަކުގެ ދަތުރު މޯލްޑިވިއަން އަދި ރަށްތަކުގެ ފެރީ ލޯންޗުތަކުގެ އަގު އެ އޮޕަރޭޓު ކުރާ ބަޔަކު ކަނޑައަޅާނަމަ އެ ފުރުސަތު ޓެކްސީތަކަށް އޮންނަން ޖެހޭކަމަށް ބަޔާނުގައި ވެއެވެ. ބަޔާނުގައި ވަނީ މަސްދަތުރުތަކުގެ ލޯންޗުތަކުން ވެސް އަގު ކަނޑައަޅަނީ އެވަގުތަކު ކެޕްޓަނުގެ ހިތަށް އަންނަ އަގެއްކަމަށެވެ. އަދި ރެސްޓޯރަންޓު ކެފޭތަކުގައި ހިދުމަތުގެ އަގު ކަނޑައަޅަނީ އިކޮނޮމިކް މިނިސްޓްރީން ޏޫންކަމަށް ވެއެވެ. އަދި ކްލިނިކްތަކުން ވެސް އެ މީހުންގެ އަގުތައް ކަނޑައަޅައި، އަމިއްލަ ފަރުދުންވެސް އެ މީހުންގެ ވިޔަފާރީގެ ހިދުމަތްތަކުގެ އަގު އަމިއްލައިން ކަނޑައަޅާކަމަށް ބަޔާނުގައި ވެއެވެ.