އެއްޖިންސުން ގުޅުންހިންގި ކަމުގެ ކުށް ސާބިތުވެ ހުކުމްތަންފީޒް ކުރަމުންދާ އެމްޑީ އަލަމްގިރީގެ މައްޗަށް އޮރިޔާން ކާޑް ހެދުމުގެ ކުށުގެ 40 ދައުވާ އަށް އިއުތިރާފްވެއްޖެއެވެ.
މިއަދު ކްރިމިނަލް ކޯޓްގައި ކުރިއަށްދިޔަ ޝަރީއަތުގައި އަލަމްގިރި އަމިއްލައަށް އިއުތިރާފް ވެފައިވާތީ ދެން އޮންނާނީ އޭނާގެ މައްޗަށް ހުކުމް އިއްވުމުގު ޝަރީއަތުގެ މަޖިލީހެވެ.
ކްރިމިނަލް ކޯޓްގެ މިއަދުގެ އަޑުއެހުން ވަނީ ސިއްރުކޮށްފައެެވެ.
އަލަމްގިރީގެ މައްޗަށް ގާނޫނުލް އުގޫބާތުގެ 622 ވަނަ މާއްދާގެ (ހ) ގެ ދެވަނަ ނަމްބަރާއި ހަވާލާދީ އެމާއްދާގެ (ބ) ގެ 2 ވަނަ ނަމްބަރުގެ ދަށުން އޮރިޔާން ކާޑު ހެދުމުގެ ކުށުގެ 40 ދައުވާ ޕްރޮސެކިއުޓަރ ޖެނެރަލްގެ އޮފީހުން ކްރިމިނަލް ކޯޓަށް ހުށައަޅާފައިވަނީ މި މަހުގެ 17 ވަނަ ދުވަހުއެވެ.
އަލަމްގިރިއާ އެކު އެއްޖިންސުން ގުޅުން ހިންގި ކަމުގެ ތުހުމަތުގައި ގާނޫނީ ވަކީލު ނާޒިމް ސައްތާރު އާއި ފުލުސް އޮފިސަރެއް ކަމަށްވާ އަބްދުއްރަހްމާން ރަފީއު ގެ މައްޗަށް ވަނީ ހުކުމް ކޮށްފައެވެ.
ނާޒިމް ސައްތާރުގެ މައްޗަށް ކުރެވުނު ހުކުމަކީ 3 މަސް ދުވަހު ގޭބަންދު ކުރުމެވެ. އަދި އަބްދުއްރަހްމާން ރަފީއު ގެ މައްޗަށް ވަނީ 1 އަހަރުގެ ޖަލުހުކުމެއް ކޮށްފައެވެ. ނަމަވެސް ޕޮލިސް އޮފިސަރުގެ މައްޗަށް މާބޮޑު ހުކުމެއް އިއްވާފައިވާކަމަށް ދެކޭތީ ދައުލަތުން ދަނީ އެ މައްސަލަ އިސްތިއުނާފު ކުރުމުގެ މަސައްކަތް ކުރަމުންނެވެ.
