ސަރުކާރު ހިންގާ މައި ޕާޓީ އެމްޑީޕީގައި ޕީޕީއެމް ފެކްޝަނެއް އެބައޮތްކަމާ އެފެކްޝަނުން މަޖިލިސްތެރޭ ޕީޕީއެމް އާ އެކު މަސައްކަތް ކުރާކަން މީ މިހާރު ފޮރުވެން އޮތް ކަމެއްނޫންކަމަށް އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.
ޓްވީޓެއްގައި ރޮޒައިނާ ވިދާޅުވީ ޕީޕީއެމް މެމްބަރުންލައްވާ ސަރުކާރާ ދެކޮޅަށް އިސްލާހުތަށް ހުށައަޅުއްވަނީ ކޮން ބޭފުޅެއްކަން އިއްޔެގެ މަޖިލީހުން ސާފުވާކަމަށެވެ.
އެމްޑީޕީގައި ޕީޕީއެމް ފެކްޝަނެއް އެބައޮތްކަމާ އެފެކްޝަނުން މަޖިލިސްތެރޭ ޕީޕީއެމް އާ އެކު މަސައްކަތް ކުރާކަން މީ މިހާރު ފޮރުވެން އޮތް ކަމެއްނޫން. ޕީޕީއެމް މެމްބަރުންލައްވާ ސަރުކާރާ ދެކޮޅަށް އިސްލާހުތަށް ހުށައަޅުއްވަނީ ކޮންބޭފުޅެއްކަން އިއްޔެގެ މަޖިލިސް ބަލާލިމީހަކަށްވެސް ސާފުވާނެ
— 𝐌𝐏 𝐑𝐨𝐳𝐚𝐢𝐧𝐚 𝐀𝐝𝐚𝐦 🎈 (@Roxeyna) November 1, 2022
ބެލެވޭ ގޮތުގައި ރޮޒައިނާ އިޝާރާތްކުރެއްވީ ޓެކްސް ބޮޑުކުރުމުގެ ބިލާއި ގުޅިގެން ކުރެވުނު ބަހުސަށެވެ.
ދެ ފެކްޝަނަކަށް ހިނގާ އެމްޑީޕީގައި ސަރުކާރު ފެކްޝަން ނުވަތަ ރައީސް އިބްރާހީމް މުހައްމަދު ސާލިހަށް ތާއީދުކުރައްވާ މެންބަރުން ޓެކްސް ބޮޑުކުރުމަށް ތާއީދުކުރެއްވި ނަމަވެސް، އެމްޑީޕީގެ ރައީސް އަދި މަޖިލީހުގެވެސް ރައީސް މުހައްމަދު ނަޝީދު އާއި އަރިސް މެންބަރުން ގެންދަވަނީ މި ބިލާއި ދެކޮޅުވަމުންނެވެ. އަދި ފާހަގަކުރަމުން އަންނަނީ އިދިކޮޅު ކޮންގްރެސް ކޯލިޝަން ތަމްސީލުކުރައްވާ މެންބަރުން ފާހަގަކުރައްވާފަދަ ވާހަކަތަކެކެވެ.
އެގޮތުން ޓެކްސް ބޮޑު ކުރުމުގެ ބަދަލުގައި ސަރުކާރުން ކުރަން ޖެހޭ ކަމަކީ ސިޔާސީ މަގާމްތައް މަދުކޮށް ދައުލަތުގެ ހަރަދު ކުޑަކުރަންޖެހޭކަމަށް އެބޭފުޅުންވެސް ފާހަގަކުރެއެވެ.
ރައީސް ނަޝީދަށް ތާއީދުކުރައްވާ މެންބަރުން ދެކޮޅު ހެއްދެވި ނަމަވެސް ބިލު ވަނީ މުޅި މަޖިލީހުގެ ކޮމިޓީއިން ފާސްކޮށްފައެވެ.
މި އާއި ގުޅިގެން ރައީސް ނަޝީދުގެ މެންބަރެއްގެ ގޮތުގައި ފާހަގަވެފައިވާ އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ވަނީ ސަރުކާރަށް ބޮޑެތި ފާޑުކިޔުންތަކެއް އަމާކުރައްވާ ޓުވީޓެއްކުރައްވާފައެވެ.
އެމްއެމްޕީއާރުސީ/ވެންޓިލޭޓަރު ފައިސާ ނުހޯދުނީމާ،
ބިލިއަނުން ލިބެންޖެހޭ ރިސޯޓު ކުލީގެ ފައިސާ ނުހޯދުނީމާ،
އެސްއޯއީތަކުގެ ބިޔަބޮޑެތި އިސްރާފު ނުހުއްޓުވުނީމާ،
އަޗާތަޅަން ކުރާ ބޮޑެތި ބޭކާރު ޚަރަދު ދަށްނުކުރެވުނީމާ،
އެކަން ފޫބައްދަންވީ އެންމެ ނިކަމެތިންގެ ޖީބަށް އަތްބާނައިގެން؟— Waddey (@waddey_) October 31, 2022
އެގޮތުން އެމްއެމްޕީއާރުސީ ހިޔާނާތާއި ވެންޓިލޭޓަރު ހިޔާނާތުގެ ފައިސާ އާއި، ބިލިއަނުން ލިބެންޖެހޭ ރިސޯޓު ކުލީގެ ފައިސާ ހޯދިފައި ނުވާ ކަމަށާއި އެސްއޯއީތަކުގެ ބިޔަބޮޑެތި އިސްރާފު ނުހުއްޓުވި، ސަރުކާރުން އަޗާތަޅަން ކުރާ ބޮޑެތި ބޭކާރު ހަރަދު ދަށްނުކުރެވުންކަމަށް ފާހަގަކޮށް މުހައްމަދު ވަހީދު ސުވާލުއުފައްދަވާފައިވަނީ އެކަން ފޫބައްދަނީ ނިކަމެތިންގެ ޖީބަށް އަތްބާނައިގެންތޯއެވެ.
