އިދިކޮޅުގެ ރިޔާސީ ކެނޑިޑޭޓު އަދި ކުރީގެ ރައީސް އަބްދުﷲ ޔާމީންް އަބްދުލްގައްޔޫމްގެ މައްޗަށް 11 އަހަރުގެ ޖަލު ހުކުމެއް އިއްވާފައިވަނިކޮށް، “އެންމެ ބޮޑެތި ވަގުން ތިބީ ގޭގައި” ކަމަށް ކުރީގެ ޕްރޮސެކިއުޓަރ ޖެނެރަލް އަހުމަދު މުއިއްޒު ވިދާޅުވެއްޖެއެވެ.
އެމްއެމްޕީއާރްސީގެ މެދުވެރިކޮށް ވ އާރަށް ކުއްޔަށްދީ އެކަމުން މަންފާ ހާސިލު ކުރެއްވި ކަމުގެ ކުށް ސާބިތުވެ ރައީސް ޔާމީންގެ މައްޗަށް 11 އަހަރުގެ ޖަލު ހުކުމަކާއި 6 މަސް ދުވަހުގެ ތެރޭގައި 5 މިލިއަން ޑޮލަރު ދެއްކުމަށް ހުކުމް ކުރުމާއިއެކު، ރައްޔިތުން ދަނީ ޝަރުއީ ނިޒާމުގެ އަދުލުވެރިކަމާއިމެދު ސުވާލު އުފައްދަމުންނެވެ.
ރައީސް ޔާމީންގެ މައްޗަށް އިއްވި ހުކުމުގެ އަސަރު ދިވެހި ރައްޔިތުނަށް އެކި ގޮތް ގޮތަށް ކޮށްފިކަމަށާއި އިންސާފަކީ އެއިރެއްގައި ވެރިކަމުގައި ތިބި ބަޔަކު މިނެކިރާ އެއްޗެއްކަމަށް ފާހަގަކޮށް އާންމު މީހަކު ކުރި ޓްވީޓެއް ޝެއަރކުރައްވާ ކުރީގެ ޕީޖީ މުއިއްޒު ވަނީ ނައިބު ރައީސް އަހުމަދު އަދީބު ގޭގައި ހުންނެވި ކަމަށް އިޝާރާތްކުރައްވާ އެންމެ ބޮޑެތި ވަގުން ތިބީ ގޭގައިކަމަށް އަދި ގައުމުން ބޭރުގައި ތިބި އެސްއޯއެފްގެ އިސްވެރިންނަށްވެސް އިޝާރާތްކުރައްވާފައެވެ.
Emme bodethi vagun thibee geyga. Aneh bayaku raajjein beyruga. https://t.co/vRcbtcIC03
— Ahmed Muizzu (@AhmedMuizzu) December 25, 2022
ރައީސް ޔާމީންގެ މައްޗަށް އިއްވި 11 އަހަރުގެ ޖަލު ހުކުމުގެ ޝަރީއަތް ތާވަލު ކުރީ ޑިސެމްބަރު މަހުގެ 25 ވަނަ ދުވަހުގެ 9:00 ގައިކަމަށްވާއިރު، އެ މަރުހަލާ ފެށުނީ މެންދުރު 11:45 އާއި ގާތުންނެވެ. އިދިކޮޅުން ތުހުމަތުކޮށްފައިވާގޮތުން އެކަން އެގޮތަށް ދިމާވީ ސަރުކާރުން ޝަރީއަތަށް ނުފޫޒު ފޯރުވާތީއެވެ. އަދި އޭގެ ކުރިން ލީކުވެގެންދިޔަ ލިޔެ ކިޔުމަކަށް އިޝާރާތްކޮށް ރައީސް ޔާމިންގެ މައްޗަށް ވަކި ގޮތަކަށް ހުކުމް ކުރުމަށް ގާޒީ ޝަކީލަށް އަންގާފައިވާކަމަށްވެސް ތުހުމަތުކޮށްފައިވެއެވެ.