އާސިރު އެންމެ ފަހުން ފެނުނީ އެއާޕޯޓު ޓާމިނަލްއަށް ވަންނަނިކޮށް: ފުލުހުން

މި މަހުގެ 04 ވަނަ ދުވަހުން ފެށިގެން ގެއްލިގެން ހޯދަމުން އަންނަ، އައްޑޫ މަރަދޫ ގަސްކަރަ މުހައްމަދު އާސިރު އެންމެ ފަހުން ފެނިފައި ވަނީ ވެލާނާ އިންޓަނޭޝަނަލް އެއާޕޯޓުގެ ޓާމިނަލްއަށް ވަންނަ މަންޒަރުކަމަށް ފުލުހުން ހާމަކޮށްފި އެވެ.

އުމުރުން 31 އަހަރުގެ އާސިރު ގެއްލިގެން ފުލުހުންނަށް ރިޕޯޓު ކުރީ މި މަހުގެ 04 ވަނަ ދުވަހު ރޭގަނޑުގެ 17:30 ހާއިރުން ފެށިގެން ފެނިފައި ނުވާކަމަށް ބުނެ އާއިލާއިންނެވެ.

މީޑިއާތަކަށް ފޮނުވި މެސެޖެއްގައި ފުލުހުން ބުނީ އާސިރު ހޯދުމުގެ މަސައްކަތް އަދިވެސް ދަނީ ކުރިޔަށް ކަމަށެވެ. އަދި މިހާތަނަށް އޭނާ ފެނިފައިނުވާއިރު މާލޭގެ ވަރަށް ގިނަ ސީސީޓީވީ ފުޓޭޖުތަކާއި ވެލާނާ އިންޓަނޭޝަނަލް އެއާޕޯޓުގެ ބައެއް ސީސީޓީވީ ބަލާފައިވާކަމަށް މައުލޫމާތު ދިނެވެ.

އެގޮތުން މާލޭގެ ބޮޑުތަކުރުފާނު މަގުގައި ހުންނަ ހުޅުމާލޭގެ ފެރީ ޓާމިނަލް ކުރިމަތިން އޭނާ ހުދު ކުލައިގެ ޓެކްސީއަކަށް އަރާ މަންޒަރު ފެންނަކަމަށާއި އެ ކާރުގައި އޭނާ ދިޔައީ އެއާޕޯޓަށްކަމަށް ފުލުހުން ބުންޏެވެ. އަދި ޓެކްސީ އެއާޕޯޓު ޓާމިނަލް ކައިރިއަށް މަޑު ކުރުމުން އޭނާ ފައިބައިގެން ގޮސް އެއާޕޯޓުގެ ޓާމިނަލްއަށް ވަންނަ މަންޒަރު ސީސީޓީވީން ދައްކާކަމަށް ފުލުހުން މައުލޫމާތު ދިނެވެ.

ފުލުހުން ބުނީ އެއާޕޯޓަށް އާސިރު ވަތް ނަމަވެސް، އޭނާ އެއްވެސް އެއާލައިނަކުން ރާއްޖެއިން ބޭރަށް ނުވަތަ ރާއްޖޭގެ އެހެން ރަށަކަށް ދިޔަކަން އެނގިފައި ނުވާކަމަށެވެ. އެހެންވެ، އަދިވެސް އޭނާ ހޯދުމަށް އިތުރު ސީސީޓީވީ ފުޓޭޖުތައް ބެލުމުގެ މަސައްކަތް ކުރިޔަށް ދާކަމަށް މީޑިއާތަކަށް ފުލުހުން ބުންޏެވެ.

މީގެއިތުރުން ފުލުހުން ބުނީ ޔާސިރު ހޯދުމުގެ ގޮތުން އަތޮޅުތަކުގެ ފުލުސް ސްޓޭޝަންތައް މެދުވެރިކޮށް މަސައްކަތް ކުރަމުންދާކަމަށެވެ.