ގައުމީ އުފެދުންތެރިކަން އިތުރުކުރުމަށް ސަރުކާރުން ގެންގުޅޭ އަމާޒު ހާސިލުކުރުމަށް އަހަރެއްގެ މައްޗަށް 5 މިލިއަނާއި ގާތް ކުރާ އަދަދަކަށް ޓޫރިސްޓުން ރާއްޖެ ގެންނަންޖެހޭކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
ވެލާނާ އިންޓަރނޭޝަނަލް އެއަރޕޯޓް އަދި އިކޮނޮމިކް ޒޯން ތަރައްޤީކުރުމުގެ މަޝްރޫޢު އިފްތިތާޙުކުރުމުގެ ރަސްމިއްޔާތުގައި ވާހަކަދައްކަވަމުން މިނިސްޓަރު ސައީދު ވިދާޅުވީ އިކޮނޮމިކް ޒޯނެއް ކަނޑައަޅައި ވީއައިއޭ ތަރައްގީކުރުމުގެ މި ޕްލޭނަކީ ރާއްޖޭގެ އިގުތިސާދީ ހާލަތު ބަދަލުކުރުމަށް ސަރުކާރުން ނިންމި މުހިންމު ނިންމުމެއްކަމަށެވެ.
މިހާރު ރާއްޖޭގެ ޖުމްލަ ޖީޑީޕީ އަކީ 6 ބިލިއަން އެމެރިކާ ޑޮލަރުކަމަށް ފާހަގަކުރައްވާ ސައިދު ވިދާޅުވީ، މި ސަރުކާރުގެ އަމާޒަކީ ރާއްޖޭގެ ޖީޑީޕީ 12 ބިލިއަން ޑޮލަރަށް ބޮޑުކުރުންކަމަށެވެ. މިކަން ކުރެވެން އޮތީ ފަތުރުވެރިން އަންނަ ނިސްބަތް އިތުރުކޮށްގެންކަމަށާއި، ނޫންނަމަ ޑިފިސިޓް މައްޗަށްދާނެކަމަށް ސައީދު ވިދާޅުވިއެވެ.
ހަތަރު މިލިއަން ނުވަތަ ފަސް މިލިއަން ޓުއަރިސްޓުން އަހަރަކު ރާއްޖެ ގެނެވެންޖެހޭ. އެ ހާލަތު ބަދަލުކޮށްގެން މެނުވީ އަހަރުން އަހަރަށް އަޅުގަނޑުމެން މި އުފައްދާ ޑެފިސިޓް ދައުލަތުން އުފައްދާ ދަރަނި، ހަމަ ދާނީ މައްޗަށް.
މިނިސްޓަރު ސައީދު ވިދާޅުވިއެވެ.
މިނިސްޓަރު ވިދާޅުވި ގޮތުގައި މި ބިޔަ ބޮޑު މަޝްރޫއު ނިމުމުން، ޓޫރިޒަމް އިންޑަސްޓްރީ އާއި އެއާލައިން އަދި ކާގޯ އިންޑަސްޓްރީގެ ޝަކުވާތަކަށްވެސް ހައްލު ލިބޭނެއެވެ. މިއީ ރާއްޖޭގައި ބޮޑު ޓްރާންސިޓް މާކެޓެއް އުފެދުމަށް ފުޅާ ފުރުސަތަތުތަކެއް އުފެދިގެން އަންނާނެކަމެއްކަމަށް މިނިސްޓަރު ވިދާޅުވިއެވެ. އެގޮތުން ފިއުލް އަގުހެޔޮވެ، ކާގޯ އެތައް ގުނައަކަށް އިތުރުކުރުމުގެ ފުރުސަތު ދޭނެކަމަށާއި، ވިޒިޓާ ބޭސްޑް އިކޮނޮމީއެއް ހަރުދަނާކޮށް ފުޅާކުރަންވެސް ފުރުސަތު ލިބޭނެކަމަށް ފާހަގަކުރެއްވިއެވެ.
މި މަޝްރޫއުގެ ތެރެއިން ޖުމްލަ 25 މިލިޔަން ފަސިންޖަރުންނަށް ޚިދުމަތްދެވޭ ފެންވަރަށް ވެލާނާ އިންޓަރނޭޝަނަލް އެއަރޕޯޓް ތަރައްގީ ވެގެންދާނެއެވެ. ރޭ އިފުތިތާޙް ކުރެއްވި މަޝްރޫޢުގެ ތެރޭގައި މިހާރުގެ ސީޕްލޭން ޓަރމިނަލް އެހެންތަނަކަށް ބަދަލުކުރުމާއި، ޖެޓްތަކަށް ޚާއްޞަ ޓަރމިނަލެއް ހެދުމާއި، ގަޑިއަކު 2000 ފަސިންޖަރުންނަށް ޚިދުމަތްދެވޭ ވަރަށް ޑޮމެސްޓިކް ޓަރމިނަލް ތަރައްޤީކުރުމާއި، ކާގޯ ފެސިލިޓީ ތަރައްޤީކުރުމާއި އަދި ފުނަދޫގައި ހުންނަ ތެޔޮ ސްޓޯރޭޖް އެހެންތަނަކަށް ބަދަލުކޮށް އެރަށް އިންޓަރނޭޝަނަލް ފައިނޭންޝަލް ސެންޓަރެއްގެ ގޮތުގައި ތަރައްޤީކުރުން ހިމެނެއެވެ.
މީގެ އިތުރުން ފުނަދޫ، މަލެއާއި ހުޅުލެއާ ބްރިޖުން ގުޅުވާލުމާއި، ހުޅުލެއާއި ހުޅުމާލެއިން ސީޕްލޭން ޓަރމިނަލްއާވެސް ގުޅުވާލުމަށް ރާވާފައިވެއެވެ.
