އެއަރޕޯޓުގެ ހިދުމަތުގެ ފެންވަރު ރަނގަޅުކުރުމަށް އިސްކަމެއް ދެއްވާނެކަމަށް މޯލްޑިވްސް އެއަރޕޯޓްސް ކޮމްޕެނީގެ ސީއީއޯ އިބްރާހީމް ޝަރީފް ވިދާޅުވެއްޖެއެވެ.
މި ފޯރަމުގައި ވާހަކަ ދައްކަމުން ޝަރީފް ވިދާޅުވީ، އެއާޕޯޓުގެ ހިދުމަތުގެ ފެންވަރު ރަނގަޅުކުރުމަށްޓަކައި މަޝްރޫއުތަށް ކުރިއަށް ދާއިރު ހުރިހާ މަރުހަލާތެެއްގައި ވެސް ސަލަމާތީ ކަންކަން ހަރުދަނާކޮށް ބެލެހެއްޓުމަށް އިސްކަމެއް ދެއްވާނެ ކަމަށެވެ.
ކްރޮސްރޯޑުގައި ފޯރަމް ފައްޓަވައި ދެއްވާފައި ވަނީ މިނިސްޓަރ އޮފް ސްޓޭޓް ފޯރ ޑިފެންސް މުއާޒް ހަލީމްއެވެ.
ޝަރީފްގެ އިތުރުން ޑެޕިއުޓީ މެނޭޖިން ޑައިރެކްޓަރުންނާއ،ި ކުންފުނީގެ އިސްވެރިން އަދި އެއާޕޯޓުގެ އެމަޖެންސީގެ ހާލަތުގައި ޝާމިލުވާ ހުރިހާ ސްޓޭކްހޯލްޑަރުން ވަނީ މި ބައްދަލުވުމުގައި ބައިވެރިވެފަ އެވެ.
މި ފޯރަމުގެ މައިގަނޑު މަގުސަދަކީ އެއާޕޯޓުގައި ސަލާމަތީ ކަންކަން ހަރުދަނާ ކުރުމާއި، ދިމާވެދާނެ ކުއްލި ހާލަތަށް ތައްޔާރުވުމާއި އަދި އެކަމަށް ހުރިހާ ސްޓޭކްހޯލްޑަރުން އެކުގައި މަސައްކަތް ކުރުމެވެ. އަދި މި ފޯރަމުގައި ސެކުއުރިޓީއާއި ކުއްލި ޙާލަތްތަކުގައި އެކި މުއައްސަސާތަކުން އަދާކުރާ ދައުރާއި ބެހޭގޮތުން އެ މުއައްސަސާތަކުން މައުލޫމާތު ހުށައަޅައި ދޭނެއެވެ.
”އެއަރޕޯޓް އެމަރޖެންސީ އެންޑް ރެސިލިއަންސް ފޯރަމް 2024“ އަކީ ވެލާނާ އިންޓަރނޭޝަނަލް އެއަރޕޯޓުގެ ސަލަމަތާއި ރައްކާތެރިކަން ހަރުދަނާކޮށް ކަމާގުޅުންހުރި ހުރިހާ ފަރާތްތަކާއި ގުޅިގެން މަސައްކަތްކުރުމަށް އެމ.ްއ.ޭސ.ީއެލްއިން ބޭއްވި ފުރަތަމަ ފޯރަމެވެ.
