ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިންޑިއާ ދަތުރުފުޅުގެ ތެރެއިން، ބެންގަލޫރުގައި ބޭއްވި ވިޔަފާރި ފޯރަމެއްގައި ވާހަކަފުޅު ދައްކަވަމުން، މިނިސްޓަރު ޒަމީރު ވިދާޅުވީ ޤައުމުގެ މާލީ ހާލަތު ރަނގަޅުކުރުމަށް ސަރުކާރުން މުހިންމު ފިޔަވަޅުތަކެއް އަޅުއްވަމުން ގެންދަވާ ކަމަށެވެ.
ޕަބްލިކް ސެކްޓަރ އިންވެސްޓްމަންޓް ޕްރޮގްރާމްގެ (ޕީއެސްއައިޕީ) މަޝްރޫޢުތައް ކަނޑައެޅުމުގައި ވަކި އުސޫލުތަކެއް ގެންގުޅޭނެ ކަމަށާއި، ސްޓޭޓް އޯންޑް އެންޓަރޕްރައިސަސް (އެސްއޯއީ) އިޞްލާޙު ކުރެވޭނެ ކަމަށްވެސް އެމަނިކުފާނު ވިދާޅުވިއެވެ.
އިޤްތިޞާދު ހަރުދަނާކޮށް، ތަފާތު ދާއިރާތަކަށް ފުޅާކުރުމަށްޓަކައި ބޭރުގެ އިންވެސްޓަރުންނަށް ފުރުޞަތުތައް ތަނަވަސްކޮށްދީ، އައު ދާއިރާތަކަށް މަގުފަހިކޮށްދިނުން ހިމެނޭ ކަމަށް މިނިސްޓަރު ޒަމީރު ވިދާޅުވިއެވެ. މިކަން ކުރުމަށް ހުރި ހުރަސްތައް ނައްތާލުމަށްޓަކައި ޤާނޫނީ އޮނިގަނޑަށް ގެންނަންޖެހޭ ބަދަލުތައްވެސް ގެނެވޭނެ ކަމަށް އެމަނިކުފާނު ވިދާޅުވިއެވެ.
އަމިއްލަ ވިޔަފާރިތައް ކުރިއެރުވުމަށް ސަރުކާރުން ޚާއްޞަ އަހައްމިއްޔަތުކަމެއް ދެއްވާ ކަމަށް ފާހަގަކުރައްވައި، ޓެކްނޮލޮޖީއާއި އީޖާދީ ދާއިރާތަކުން އިތުރު ފުރުޞަތުތައް ހޯދައިދިނުމުގެ މަސައްކަތްތައް ކުރިއަށްދާ ކަމަށް މިނިސްޓަރު ވިދާޅުވިއެވެ. ރާއްޖޭގެ އިޤްތިޞާދީ ދުވެލި 2028 ވަނަ އަހަރާ ހަމައަށް 5.8 އިންސައްތައިގައި ހިފެހެއްޓުމަކީ ސަރުކާރުގެ ލަނޑުދަނޑިއެއް ކަމަށް އެމަނިކުފާނު ވިދާޅުވިއެވެ.
މި ލަނޑުދަނޑި ހާސިލުކުރުމަށްޓަކައި ގިނަ ދާއިރާތަކެއް އިތުރަށް ކުރިއަރުވައި، ފުޅާކުރަން ޖެހޭ ކަމަށް މިނިސްޓަރު ފާހަގަކުރެއްވިއެވެ. މިގޮތުން މަސްވެރިކަމުން ލިބޭނެ އިތުރު މަންފާތަކެއް ހުރި ކަމަށާއި، މަހުގެ އައު އުފެއްދުންތައް ތަޢާރަފުކުރުމަށް ޚާއްޞަ އިސްކަމެއް ދެއްވާނެ ކަމަށް އެމަނިކުފާނު ވިދާޅުވިއެވެ. އަދި ފަތުރުވެރިކަމުގެ ދާއިރާ އިތުރަށް ތަރައްޤީކުރުމުގެ މަސައްކަތްތައްވެސް ކުރިއަށް ގެންދަވާނެ ކަމަށް ވިދާޅުވިއެވެ.
މި ބަޔާނުގައި، ސަރުކާރުގެ އިޤްތިޞާދީ ސިޔާސަތުތަކާއި، މާލީ އިޞްލާޙުތަކާއި، އިންވެސްޓްމަންޓް ފުރުޞަތުތަކާއި، އަދި ތަފާތު ދާއިރާތައް ތަރައްޤީކުރުމުގެ މަސައްކަތްތަކާ ބެހޭ ތަފްޞީލީ މަޢުލޫމާތު ހިއްސާކޮށްފައިވެއެވެ.
