އެމްޑީޕީގެ ދާއިރާ ގޮފިތައް އުފެއްދުމުގައި އެ ދާއިރާއަކަށް ނިސްބަތްނުވާ މީހުންގެ 30 އިންސައްތަ ހިމެނޭ ގޮތަށް އެ ޕާޓީގެ ގަވާއިދު އިސްލާހުކޮށްފިއެވެ.
މި ބަދަލު ގެނައުމަށް ނިންމާފައިވަނީ އާދީއްތަ ދުވަހު ބޭއްވި އެމްޑީޕީގެ ގައުމީ މަޖިލީހުގެ ބައްދަލުވުމުގައެވެ.
މި ބަދަލު ގެނައުމުގެ މައިގަނޑު މަގުސަދަކީ މާލޭގައި ދިރިއުޅޭ އެހެން ރަށްރަށުގެ މެންބަރުންނަށް ޕާޓީގެ ހަރަކާތްތަކުގައި ބައިވެރިވުމުގެ ފުރުސަތު ފަހިކޮށްދިނުމެވެ. މީގެ ސަބަބުން ދާއިރާތަކުގެ ހަރަކާތްތައް އިތުރަށް ވަރުގަދަވެ، މާލޭގައި ދިރިއުޅޭ އަތޮޅުތެރޭގެ މެންބަރުންނަށް ޕާޓީގެ ސިޔާސީ މަސައްކަތްތަކުގައި އަމަލީގޮތުން ބައިވެރިވުމަށް ފަސޭހަވެގެންދާނެއެވެ.
ދާއިރާ ގޮފިތަކުގެ އިތުރުން ފިކުރީ ގޮފިތައް އުފެއްދުމާ ގުޅޭ ގަވާއިދަށްވެސް ވަނީ ބަދަލުތަކެއް ގެނެސްފައެވެ. އެގޮތުން ފިކުރީ ގޮފިތައް އުފެއްދުމަށް ބޭނުންވާ މެންބަރުންގެ އަދަދު ކުރިން އޮތް 50 މެންބަރުންގެ ބަދަލުގައި 100 މެންބަރުންނަށް އިތުރުކުރުމަށް ވަނީ ނިންމާފައެވެ. ނަމަވެސް، ދާއިރާ ގޮފިތައް އުފެއްދުމަށް ބޭނުންވާ މެންބަރުންގެ އަދަދު ކުރިންވެސް އޮތް ގޮތަށް 50 ގައި ބޭއްވުމަށް ވަނީ ފާސްކޮށްފައެވެ.
މި އިސްލާހުތަކަކީ ޕާޓީގެ މަގުޗާޓު ކޮމިޓީން ތައްޔާރުކޮށް، ގައުމީ މަޖިލީހުގެ 53 މެންބަރުންގެ ވޯޓާއެކު ފާސްކުރި ބަދަލުތަކެކެވެ. މިއީ ޕާޓީގެ ހިންގުން ހަރުދަނާކުރުމަށް ކުރަމުންދާ މަސައްކަތުގެ ތެރެއިން ގެނެވުނު މުހިންމު ބަދަލުތަކެއްގެ ގޮތުގައި އެ ޕާޓީން ފާހަގަކުރެއެވެ.
ގައުމީ މަޖިލީހުގެ ބައްދަލުވުމުގައި ޕާޓީގެ ކުރިމަގާ ގުޅޭ މުހިންމު އެހެން ނިންމުމެއްވެސް ވަނީ ނިންމާފައެވެ. އެގޮތުން އެމްޑީޕީގެ ކޮންގްރެސް އަންނަ ސެޕްޓެމްބަރު 19 ގައި ބޭއްވުމަށް ވަނީ ރަސްމީކޮށް ނިންމާފައެވެ.
