ސަރުކާރުން ހިންގާ ބޮޑެތި މަޝްރޫއުތަކަށް ހަރަދުކުރާއިރު، ދައުލަތަށް ބޭރު ފައިސާ ނުވަތަ ޑޮލަރު ވަންނަ މިންވަރަށް ރިއާޔަތްކޮށް، އެ މަޝްރޫއުތައް ބައްޓަންކުރަންޖެހޭކަމަށް ނޭޝަނަލް ޓެންޑަ ބޯޑުގެ ކުރީގެ ޗެއާމަން އިސްމާއިލް ޒަރިޔަންދު ވިދާޅުވެއްޖެއެވެ.
ޒަރިޔަންދު މިހެން ވިދާޅުވީ، ”ސަންގު“ އާއި ”އަދަދު“ ނޫސް ގުޅިގެން ކުރިޔަށް ގެންދާ ޑޮލަރު ސައްލާ ޕްރޮގްރާމްގައި ވާހަކަ ދައްކަވަމުންނެވެ.
މިރޭގެ ޕެނަލް ބައްދަލުވުމުގައި ޒަރިޔަންދު ފާހަގަކުރެއްވި ގޮތުގައި، 1982 ވަނަ އަހަރުން ފެށިގެން މިއަދާ ހަމައަށް އައިއިރުވެސް، ކޮންމެ ސަރުކާރަކުންވެސް އެންމެ ބޮޑަށް ވިސްނަންޖެހޭ އެއް ކަމަކީ ދައުލަތަށް ލިބޭ ޑޮލަރުގެ މިންވަރެވެ.
ޒަރިޔަންދު ވިދާޅުވީ، ސަރުކާރުން އެތައް މިލިއަން ޑޮލަރެއްގެ ބޮޑެތި މެގަ ޕްރޮޖެކްޓްތައް އެއްފަހަރާ ފަށާއިރު، އެ މަޝްރޫއުތަކަށް ބޭނުންވާ ޑޮލަރު ރާއްޖޭގެ އެތެރޭގެ ބާޒާރުން ހޯދަން މަސައްކަތް ކުރުމަކީ އިގްތިސާދަށް ނުރައްކާވާނެ ކަމެއް ކަމަށެވެ. އެހެން ނޫންނަމަ، އިމްޕޯޓް އެކްސްޕޯޓް ޑެފިސިޓް ބޮޑުވެ، ރާއްޖެއަށް މުދާ އެތެރެކުރުމަށް ބޭނުންވާ ޑޮލަރުގެ މިންވަރު މަދުވެ، އިގްތިސާދަށް ނުރައްކާވެދާނެ ކަމަށް އޭނާ އިންޒާރު ދެއްވިއެވެ.
ޒަރިޔަންދު ވިދާޅުވީ، ޑޮލަރުގެ އެކްސްޗޭންޖް ރޭޓް ނުވަތަ ޕެގް ހިފެހެއްޓުމަށް ބަލާއިރުވެސް، ސަރުކާރުގެ ޚަރަދުތަކާއި މަޝްރޫއުތައް ރޭވުމުގައި ދައުލަތުގެ މާލީ ތަނަވަސްކަމަށް ވިސްނުން މުހިންމު ކަމަށެވެ.
ސަރުކާރުން އެއް ބިލިއަން ނުވަތަ 200، 300 މިލިއަން ޑޮލަރުގެ ތިން ހަތަރު ޕްރޮޖެކްޓް އެއްފަހަރާ ހިންގާލާ، އެތެރޭގެ މާރުކޭޓުން ޑޮލަރު ނަގައިގެން އެކަން ކުރަން ފަށައިފިނަމަ، އިމްޕޯޓް ކުރަން ހުންނަ ޑޮލަރުކޮޅު ހުސްވާނެ
މިކަމުގެ ސަބަބުން އިމްޕޯޓާއި އެކްސްޕޯޓުގެ ދެމެދުގައި އޮންނަ ފަރަގު ނުވަތަ ޑެފިސިޓް ބޮޑުވެ، ބާޒާރުގައި ޑޮލަރުގެ ތާށިކަން އިންތިހާއަށް އިތުރުވެގެންދާކަން ޒަރިޔަންދު ފާހަގަކުރެއްވިއެވެ. އެހެންކަމުން، ސަރުކާރުގެ ހަރަދުތައް ބައްޓަންކުރަންވާނީ ބޭރުން ޑޮލަރު ވަންނަ ގޮތްތަކަކަށް ބަލައިގެން ކަމަށާއި، މިކަމުގައި މައިގަނޑު ޒިންމާ ނަގަންޖެހޭނީ ސަރުކާރުންކަމަށް ވެސް ޒަރިޔަންދު ވިދާޅުވިއެވެ.
